سوڭعى جەتى ايدا مەملەكەتتىك بيۋدجەتكە قانشا سومادا كىرىس ءتۇستى

نۇر-سۇلتان. قازاقپارات - بۇگىن ۇكىمەت وتىرىسىندا بيىلعى جەتى ايداعى الەۋمەتتىك- ەكونوميكالىق دامۋدى تالقىلاۋ كەزىندە قارجى ءمينيسترى ەرۇلان جاماۋبايەۆ بيۋدجەت كىرىسى تۋرالى باياندادى، دەپ حابارلايدى قازاقپارات ءتىلشىسى.

«مەملەكەتتىك بيۋدجەتكە 5 تريلليون 832 ميلليارد تەڭگە سوماسىندا كىرىس ءتۇستى نەمەسە جوسپار 105,8 پايىزعا اتقارىلدى. رەسپۋبليكالىق بيۋدجەتكە 3,6 تريلليون تەڭگە ءتۇستى نەمەسە جوسپار 100,1 پايىزعا ورىندالدى. جالپى، كىرىستەر بويىنشا جوسپار 4 ميلليارد تەڭگەگە اسىرا ورىندالدى، ونىڭ ىشىندە سالىقتار بويىنشا 3 ميلليارد تەڭگەگە اتقارىلمادى. سالىقتار بويىنشا اتقارىلماۋدىڭ نەگىزگى سومالارى يمپورتقا قوسىلعان قۇن سالىعىنا، كورپوراتيۆتىك تابىس سالىعىنا، مۇنايعا ەكسپورتتىق كەدەن باجىنا جانە پايدالى قازبالاردى وندىرۋگە سالىناتىن سالىققا تيەسىلى بولدى»، - دەدى ە. جاماۋبايەۆ.

ونىڭ ايتۋىنشا، يمپورتقا قوسىلعان قۇن سالىعى بويىنشا جوسپاردىڭ ورىندالماۋى قازاقستان رەسپۋبليكاسىنىڭ ءۇشىنشى ەلدەرمەن تاۋار اينالىمىنىڭ 2020 -جىلدىڭ 1-جارتىجىلدىعىمەن سالىستىرعاندا %1,7 كە نەمەسە 593 ملن دوللارعا تومەندەۋىنە بايلانىستى بولدى. كورپوراتيۆتىك تابىس سالىعى بويىنشا جوسپاردىڭ ورىندالماۋى 2021 -جىلعى قاڭتار- شىلدەدە 744 ءىرى سالىق تولەۋشى بويىنشا مالىمدەلگەن اۆانستىق تولەمدەر سوماسىنىڭ وتكەن جىلدىڭ سايكەس كەزەڭىمەن سالىستىرعاندا %28 عا ازايۋىنا بايلانىستى.

«شيكى مۇنايعا ەكسپورتتىق كەدەن باجى بويىنشا جوسپاردىڭ ورىندالماۋىنىڭ نەگىزگى سەبەبى تەڭىز كەن ورنىندا شيكى مۇناي ءوندىرۋ كولەمىنىڭ تومەندەۋى بولدى. پايدالى قازبالار وندىرۋگە سالىناتىن سالىق بويىنشا جوسپاردىڭ ورىندالماۋى جەراستى سۋلارىنا مولشەرلەمەنىڭ تومەندەۋىنە جانە پايدالى قازبالاردى ءوندىرۋ كولەمىنىڭ ازايۋىنا بايلانىستى بولدى. دەگەنمەن، تاۋارلاردى وتكىزۋ بويىنشا اينالىمداردىڭ 1,6 ەسە ۇلعايۋىنا بايلانىستى ىشكى ءوندىرىس تاۋارلارىنا سالىناتىن قوسىلعان قۇن سالىعى بويىنشا جوسپار اسىرا ورىندالدى. بۇل رەتتە، قايتارۋ سوماسى %8,3 عا وسكەنىنە قاراماستان، قوسىلعان قۇن سالىعىن قايتارۋ بويىنشا بيزنەس الدىنداعى مىندەتتەمەلەر ۋاقتىلى ورىندالۋدا»، - دەدى مينيستر.