اسقار مامين: ۆاكسينالاۋ قارقىنىن كۇشەيتۋ قاجەت

نۇر-سۇلتان. قازاقپارات - ۆاكسينالاۋ قارقىنىن كۇشەيتۋ قاجەت. بۇل تۋرالى ۇكىمەت وتىرىسىندا ق ر پرەمەر-ءمينيسترى اسقار مامين ايتتى، دەپ حابارلايدى قازاقپارات ءتىلشىسى.

«ناۋقاس تانۋدىڭ ءوسۋ قارقىنى باياۋلادى جانە ەپيدەميولوگيالىق جاعداي بىرتىندەپ تۇراقتانىپ كەلەدى. ۆيرۋستىڭ رەپرودۋكتيۆتىلىك يندەكسى - 1,01. ينفەكسيالىق ورىندار سانىنىڭ 54 پايىزى، ال رەانيماتسيالىق ورىنداردىڭ 45 پايىزى تولىق. پاندەميادان شىعۋدىڭ بىردەن-ءبىر جولى - ول ۆاكسينالاۋ. قازىرگى كەزدە 5,9 ميلليوننان استام ادام ۆاكسينانىڭ ءبىرىنشى كومپونەنتىن، شامامەن 4,5 ميلليون ادام ەكىنشى كومپونەنتىن الدى»، - دەدى ۇكىمەت باسشىسى.

الايدا اسقار مامين بۇل جەتكىلىكسىز ەكەندىگىن باسا ايتتى.

«ۆاكسينالاۋ قارقىنىن كۇشەيتۋ قاجەت. بۇل ماسەلەنى، اسىرەسە، باتىس قازاقستان، ماڭعىستاۋ جانە اتىراۋ وبلىستارىنىڭ اكىمدەرى باقىلاۋعا الۋى جانە تامىزدا ۆاكسينالاۋ جوسپارىنىڭ ورىندالۋىن قامتاماسىز ەتۋى ءتيىس. بارلىق وڭىردە ەپيدەميولوگيالىق جاعدايدى باقىلاۋدا ۇستاۋ قاجەت. نۇر-سۇلتان، الماتى، شىمكەنت قالالارى مەن قاراعاندى وبلىسىنىڭ اكىمدىكتەرى بۇل ماسەلەگە ەرەكشە نازار اۋدارۋ كەرەك. حالىقتىڭ شەكتەۋ شارالارىن، اسىرەسە، بەتپەردە رەجيمىن ساقتاۋىن قامتاماسىز ەتۋ قاجەت. ول ءۇشىن مونيتورينگىلىك توپتاردىڭ جۇمىسىن جانداندىرىپ، ءتارتىپ بۇزۋشىلاردى جاۋاپكەرشىلىككە تارتۋ كەرەك»، - دەدى ول. پرەمەر-مينيستر «Ashyq» جۇيەسىنە قاتىساتىن كاسىپكەرلىك سۋبەكتىلەرىنىڭ سانى ۇنەمى ارتىپ كەلە جاتقانىن دا اتاپ ءوتتى.

«ولاردىڭ سانى 5 ەسەگە - 21 مىڭنان 101 مىڭعا دەيىن كوبەيدى. بۇل بيزنەستىڭ جۇمىسىن جالعاستىرۋعا مۇمكىندىك بەرەدى. سوندىقتان «Ashyq» قوسىمشاسىن قولدانۋ اياسىن ودان ءارى دە كەڭەيتۋ قاجەت»، - دەگەن اسقار مامين ماسەلەنى جالپى باقىلاۋدا ۇستاۋدى ورىنباسار ەرالى توعجانوۆقا جۇكتەدى.

اۆتور: مارلان جيەمباي