ليونەل مەسسي رەسمي تۇردە فرانسۋز كلۋبىنىڭ ويىنشىسى اتاندى
كەلىسىمشارت «2+1» سحەماسىمەن جاسالعان، ونى 2024 -جىلدىڭ ماۋسىمىنا دەيىن سوزۋعا مۇمكىندىك بار. مەسسي 30- نومىرمەن ويناپ، ءبىر ماۋسىمدا 35 ميلليون ەۋرو الادى.
«مانسابىمنىڭ پاريجدە جالعاسۋىن اسىعا كۇتىپ ءجۇرمىن. كلۋب پەن ونىڭ ماقساتى مەنىڭ امبيتسياما تولىق سايكەس كەلەدى. مۇندا دارىندى ويىنشىلار مەن قىزمەتكەرلەر جۇمىس ىستەيتىنىن بىلەمىن. كلۋب پەن جانكۇيەرلەرگە ەرەكشە اسەر سىيلاعىم كەلەدى»، - دەدى مەسسي كەلىسىمشارتقا قول قويعاننان كەيىن.
سەيسەنبى كۇنى ليونەل مەسسي جۇبايىمەن جانە بالالارىمەن بارسەلونادان پاريجگە كەلىپ، كەلىسىمشارتقا قول قويماس بۇرىن مەديتسينالىق تەكسەرۋدەن ءوتتى. «پ س ج» جاڭا ويىنشىنى سارسەنبى كۇنى وتەتىن باسپا ءسوز ءماسليحاتىندا رەسمي تانىستىرادى.
ءوز مانسابىندا تەك «بارسەلونادا» ويناعان مەسسي كەلىسىمشارتتى ۇزارتۋ تۋرالى كەلىسىمگە كەلە الماعاندىقتان كاتالوندىق كلۋبتان كەتۋگە ءماجبۇر بولعان ەدى. كوپ ۇزاماي ونىڭ جاڭا كلۋبقا قاتىستى ءوز تاڭداۋىن جاساعانى تۋرالى اقپارات تاراتىلدى. 34 جاستاعى فۋتبولشى «بارسامەن» 36 رەت جەڭىسكە جەتىپ، 672 گول سوقتى. مەسسي وتكەن جىلى جازدا «بارسەلونادان» كەتپەكشى بولدى، ءبىراق كلۋب ونى جىبەرگەن جوق. وسى جىلدىڭ 1-شىلدەسىندە ول بوس اگەنت اتاندى. سەنبى كۇنى مەسسي كلۋبپەن كوزىنە جاس الىپ قوشتاسىپ، جانكۇيەرلەرى مەن كلۋبتاعى ارىپتەستەرىنە العىس ايتتى. مەسسيدىڭ ءوزى جالاقىسىن ەكى ەسە ازايتۋعا دايىن ەكەنىن ايتىپ، «بارسادا» قالۋ ءۇشىن بارىن سالدى.
ءبىراق، لا ليگانىڭ قاتاڭ ەرەجەسى مەن 1 ميلليارد ەۋرودان اساتىن «بارسەلونانىڭ» قارىزىنا بايلانىستى جاڭا كەلىسىمشارت جاساۋعا مۇمكىندىك بولمادى. سوندىقتان، «بارسا» ونىڭ جالاقىسىن تومەندەتسە دە مەسسيمەن كەلىسىمدى ۇزارتا المايتىن ەدى. ۋەفا- نىڭ قارجى ەرەجەسىنە (فۋتبول كلۋبتارى تاپقان پايداسىنان كوبىرەك اقشا جۇمساماس ءۇشىن جاسالعان) سايكەس، كلۋبتار ءوز اينالىمىنىڭ %70 دان استامىن جالاقىعا جۇمسايتىن بولسا، جاڭا ويىنشى تىركەي المايدى. مەسسيدىڭ ۇسىنعان جاڭا كەلىسىمىندەگى بۇل سوما %100 اساتىن بولدى.
«مەن مۇندا 13 جاستان باستاپ تۇرىپ كەلەمىن. 21 جىلدان كەيىن كەتىپ بارامىن. جۇبايىممەن جانە ءۇش بالاممەن بىرگە. قايتا ورالمايمىز دەپ ۋادە بەرە المايمىن. سەبەبى، بۇل - مەنىڭ ءۇيىم»، - دەدى فۋتبولشى قوشتاسىپ جاتىپ.
اۆتور: اقبوپە ءابدراسۋل
