ابايدىڭ «كوزىمنىڭ قاراسى» ولەڭى كىمگە ارنالعان
«ءبىر ءارىپ ۇيرەتكەن ۇستازعا قىرىق جىل قىزمەت قىل» دەيدى. بىردە پايعامباردىڭ، بىردە شىعىس عۇلامالارىنىڭ ەسىمىنە تەلىنىپ كەلگەن وسى ءبىر ءسوز شىنىمەن- اق قاعباداي ءتاۋ ەتۋگە لايىق. مۇنى باسپالاپ ايتىپ وتىرعانىمىز قازاق رۋحنياتىنا ولشەۋسىز ۇلەس قوسقان ءبىر ادام بولسا، ول - تۇرسىن جۇرتباي. يمانداي شىنىم، بۇل تۇلعانى وزىمە يدەال تۇتامىن جانە جان- جۇرەگىممەن جاقسى كورەمىن.
نە نارسەنىڭ نارقى سالىستىرۋ ارقىلى عانا انىقتالىپ جاتادى عوي. وسى ادامنىڭ الدىندا ءبىزدىڭ ەتكەن ەڭبەك، توككەن تەر (ول ەندى بار بولسا دەڭىز) راس، تۇرسەكەڭنىڭ توبىعىنان دا كەلمەيدى. مۇنى ءسوز جوق مويىندايمىن. ءبىراق، اعاممەن انا ءبىر جولى كەزدەسكەنىمدە ابايدىڭ «كوزىمنىڭ قاراسى» ولەڭىنە قاتىستى جازعان دۇنيەمە بىلدىرگەن پىكىرى مەن ەسكەرتپەسىنە ەندى ەش كەلىسە المايمىن.
بىرىنشىدەن، سول از عانا تىلدەسۋدەن تۇرسەكەڭنىڭ ءبىزدىڭ تومەندەگى ماقالانى ەش وقىماعانىن، تەك سىرت كوز سىنشىلاردىڭ ايتاعىمەن ايتا سالعاندىعىن جان- جۇرەگىممەن تۇسىنگەندەي بولدىم (ول ايتاقشىلاردىڭ بار ماقساتى ايتەۋىر ادام اراسىنان وت سالىپ، سودان بۇرق ەتكەن جالىنعا الاقانىن «جىلىتىپ» وتىرۋ ەكەندىگى بەسەنەدەن بەلگىلى عوي).
ەكىنشىدەن، عالىمنىڭ «بۇل عازال تەك ايەل زاتىنا عانا ارنالعان» دەگەن قۇمالاقتىڭ تىلىندەي عانا از اقپارىنا كوڭىلىمنىڭ ەش تۇشىنباي، قوڭىلتاقسىپ قالعاندىعىن دا نەسىن جاسىرايىن. بالكىم، «بالا بايقارسىڭ مىناداي دا مىناداي دۇنيەلەر بار» دەپ اقىلعا جاتىق، بۇلتارتپاس دالەلدەر كەلتىرگەندە، وندا ءبىز پاقىرىڭىز اعانىڭ الدىن كەسىپ، ايتقانىنان شىعىپ قايدا باراتىن ەدىك. قالاي دەسەك تە «اداسقانىڭ ايىبى جوق، قايتا ءۇيىرىن تاپقانعا» دەپ ءسوز قالدىرعان ەلدىڭ ءزاۋزاتى مەن شىن جۇراعاتى ەدىك قوي...
مىنا تومەندەگى ماقالا «اتىڭ شىقپاسا جەر ورتەنىڭ» لەپەسى ەمەس، كوڭىلىمە كوپ دۇنيە تومپاق كەلگەن سوڭ، وسىدان كوپ ىلگەرىدە جازعان ەدىم. بۇگىن ساقال مۇرتىن ءسال باسىپ، وزدەرىڭىزگە قايىرا ۇسىنىپ وتىرمىن. بۇل ۇلى ۇستازىمنىڭ جاعاسىنان الىپ ىلىك ىزدەۋ ەمەس، تاۋەلسىز تۇرعىدان ءوز اۆتونومدى پىكىرىمدى ءبىلدىرۋ ەكەندىگىن تاعى دا قاپەرلەرىڭىزگە سالا كەتسەم دەيمىن...
«كوزىمنىڭ قاراسى» (گەرمەنيەۆتيكالىق تالداۋ)
بالا - جانىڭدى جالعانمەن بايلانىستىرىپ تۇرعان بەينە ءبىر كوپىر ىسپەتتى. ومىردە جىبەرگەن ەسەڭ مەن انتەك باسقان اتتەگەنايلارىڭنىڭ قارىمتاسىن تەك ۇرپاعىڭمەن عانا تۇگەندەي الاسىڭ. ەندەشە بالا اتاۋلىنى اكە مۇراتىنىڭ جاس تانگە الماسقان جاڭا ءبىر مۇمكىندىگى دەسەك تە بولاتىنداي. قىتايدىڭ كونە ءبىر ماقالى دا وسى ويىمىزدىڭ وندىعىنا ءدوپ كەلەدى. «بالا اكەدەن قانشا جاس كىشى بولسا، سونشا جاس ۇلكەن» ءپالساپاسىنىڭ استارىندا كەلەر مەزگىل مۇراگەرىنىڭ كىم ەكەندىگىن مويىنداعان ءادىل بىتىمگەرشىلىك جاتىر. بازبىرەۋلەر ءۇشىن بالا - بەل قىزىعىنىڭ قۇربانى. مۇنداي تاسىر تۇسىنىكتىڭ توڭىرەگىنەن «جاۋاپكەرشىلىك» تۋرالى وي ىزدەۋدىڭ دە اسا قاجەتى بولا قويماس. بۇل فريدريح نيتسشەنىڭ ايگىلى «زاراتۋسترا سولاي دەگەن» ەڭبەگىندە دە ايىرىقشا ايتىلادى. مىنە، الدىمدا قوس پاراعى ايقارا اشىلىپ، فرانس كافكانىڭ كىتابى جاتىر. جازۋشىنىڭ «اكەگە حات» دەپ اتالاتىن وسى ءبىر تۋىندىسىنداعى اكە مەن بالا اراسىنداعى قاتىناستى وقىپ وتىرىپ، جون ارقاڭ مۇزداپ سالا بەرەدى. ارينە، مۇنداعى قاتىگەزدىك توركىنى وزگە تاقىرىپقا جۇك. ءبىزدىڭ جازباعىمىز كەرىسىنشە، مەيىرىم مەن سۇيىسپەنشىلىك ماسەلەسى. الەم ادەبيەتىندە اكە مەن بالا اراسىنداعى ماحابباتتى ابايداي ءيىن قاندىرىپ جازعان اقىن نەكەن- ساياق شىعار. مۇنداي عاجايىپ عازالعا بالاما بولۋعا جارايتىن بىردەن- ءبىر شىعارما كونە داۋىردەگى يسپان اقىنى حورحە مانريكەنىڭ «اكە ولىمىنە ارناۋ» اتتى تۋىندىسى دەگەن بولار ەدىك.
پوەمانىڭ قىسقاشا عانا مازمۇنى مىناعان سايادى. ءومىردى وزەنگە تەڭەگەن اقىن «ءولىم اتاۋلى سول وزەندى وزىنە تارتقان ءتۇپسىز تەرەڭ تەڭىز سەكىلدى، ءبارىمىز دە اعىپ كەلىپ سوعان قۇيامىز» دەيدى. اكەسى دون رودريگەنى جوقتاپ ومىراۋىن جاسقا بوياعان شايىر اكە داڭقىن اسپانداتا جىرلاپ، ونىڭ باتىرلىعى مەن بىلگىرلىگىن يۋليي سەزارگە، ال شىنشىلدىعى مەن شەشەندىگىن سيتسەرونعا تەڭەيدى. ءولىمدى ونەر دارگەيىندە قابىلداۋعا ۇيرەتكەن وسى ءبىر پوەمانىڭ نەگىزگى وزەگىندە قۋراي ۇنىندەي ۋىلدەپ تاعى ءبىر سارىن ەستىلىپ تۇرادى. وسى سارىن ابايدىڭ اكەسى قۇنانباي مەن باۋىرى وسپاندى جوقتاعانداعى زارىنا قاتتى كەلەدى ( ءبىر قىزىعى، حاكىمنىڭ قۇنانبايدى شىڭعىس حان مەن ەسكەندىرگە، وسپاندى پلاتون مەن سوكراتقا تەڭەگەن جولدارى حورحە ولەڭىنىڭ بەينە ءبىر جالعاسى سەكىلدى). قوس شىعارمانى ءوزارا جىمداستىرىپ تۇرعان ورتاق ماسەلە اكە مەن بالا اراسىنداعى عاجايىپ ماحاببات تاقىرىبى. مىنە، ءبىزدىڭ دە ىزىنە ءتۇسىپ ىندەتپەك شارۋامىز ءدال وسى بولعالى تۇر.
ۋاقىت تىلشەسى حورحەدەن قۇنانباي بالاسىنا قاراي اۋىسقاندا اتالعان كەيىپكەرلەر توبى تولىعىمەن ورىن الماستىرىپ ۇلگەرەدى. مۇنداعى ەڭ باستى ايىرماشىلىق، اكە ءوز پەرزەنتىن ولگەننەن كەيىن ەمەس، كەرىسىنشە كوزى تىرىسىندە ۇلىقتايدى. وسى ورايدا مىنا ءبىر ماسەلەنىڭ دە باسىن بارىنشا اشالاپ ايتقىمىز كەلەدى. گۋمانيتارلىق عىلىمدا سىرەسكەن ستەرەوتيپتەردى ءسوز قىلماعاندا، بەلگىلى اۆتوريتەتتەردىڭ اتاعى مەن داڭقى الدىڭعى شەپتە جۇرەدى. ولاردىڭ ەڭبەگىنەن كورى ەسىمدەرىنىڭ ءبىرىنشى بولىپ كۋاگەرلىككە تارتىلىپ جاتاتىنى دا سوندىقتان. ءبىر قىزىعى، سول «دانىشپاندار» دۇرىس دەپ تاۋىپ، باتاسىن بەرگەن دەرەكتى سەنىڭ اقىلىڭ مەن جۇرەگىڭ، تۇيسىگىڭ مەن تانىمىڭ ەش قابىل ەتپەسە شە؟ سوندا نە ىستەۋگە بولادى؟ مىنە، بۇل شاققا دەيىن مىڭ عالىمنىڭ اۋىزىمەن «عاشىقتىق جىرى» دەپ مويىندالىپ، ات قويىلىپ، ازان شاقىرىلعان حاكىم ەڭبەگىنىڭ ءبىرى - «كوزىمنىڭ قاراسى» ولەڭى. ال ءبىزدىڭ پايىمداۋىمىزشا مۇنىڭ «ماحابباتقا»، ونىڭ ىشىندە ايەل زاتىنا ەشقانداي دا قاتىسى جوق. بۇل ابايدىڭ ءتانى بولەك دەمەسەڭ شىعاردا جانى ءبىر، جالعانداعى شىن «عاشىعى» ءابدىراحمانعا ارنالعان ولەڭى دەيمىز.
كوزىمنىڭ قاراسى، كوڭىلىمنىڭ ساناسى. بىتپەيدى ىشىمدە، عاشىقتىڭ جاراسى. راس، ءابدىراحمان اباي ءۇشىن «كوزىنىڭ قاراسى» مەن «كوڭىلىنىڭ ساناسى» ەدى. بالقوجا ءبيدى بەك ىنتىزار ەتكەن ىبىراي سەكىلدى «ءۇمىت ەتكەن كوزىمنىڭ نۇرى بالام» ىقىلاسىنىڭ شىن يەسى- تۇعىن. بۇعان ەندى پەرزەنت اتاۋلى دوڭگەلەك دۇنيەگە قايىرا كەلگەن ءوزىڭنىڭ جاس «كوزقاراسىڭ» مەن «قاراشىعىڭ» ەكەندىگىن تاعى دا قوسىڭىز.
وسى جەردە ماسەلەنىڭ ميا تامىرىنداي ماتاسىپ، باسقا جاققا قاراي باعدار تارتىپ كەتۋىنە ءتورتىنشى جولداعى تۇرعان «عاشىقتىق» ءسوزىنىڭ كوپ اسەرى بولعانعا ۇقسايدى. بۇعان باستى سەبەپ، كەشەگى ماتەرياليستىك يدەيا «ماحاببات» پەن «جار» ۇعىمدارىن سانامىزعا تەك ايەل وبرازى رەتىندە عانا ءسىڭىرىپ، ودان اسىرا ويلاي المايتىن موجانتوپاي تۇسىنىككە ءتۇسىردى عوي. ال باعزىداعى بابالار پايىمى ءۇشىن «ماحاببات» پەن «جار» ۇعىمدارى كادىمگى قۇدايلىق تانىم بولاتىن. بۇل سوزىمىزگە شاكارىم قاجىنىڭ مىنا ءبىر ولەڭى كۋا. «... مەنىڭ جارىم قىز ەمەس، حاقيقاتتىڭ شىن نۇرى. ونى سەزەر ءسىز ەمەس، كوزگە تاسا بۇل سىرى. جاسىرىپ تۇر جار ءوزىن، باس كوزىمەن قاراما. جۇرەگىڭنىڭ اش كوزىن...» قازاقتىڭ «قۇداي جار بولسىن» ءسوزىنىڭ شىن ماعىناسى دا وسى ءبىر ويدا جاتقانعا ۇقسايدى.
عاشىقتىق - اسقاق ۇعىم. عاشىقتىقتا تەك بيىكتەۋ مەن قۇرباندىق قانا بار. ايتالىق، ادام وزىنەن تومەن جانعا ەشقاشان عاشىق بولمايدى. ال قۇمارلىقتا كەرىسىنشە، شالبارلىق شەككە دەيىن قۇلدىراۋ مەن تومەندەۋ بار. عاشىقتىق جان قالاۋىنان تۋسا، قۇمارلىق كەرىسىنشە ءتان قالاۋىنان تۋادى. ەكەۋى سىرتتاي بىرىنە- ءبىرى قاتتى ۇقساعانى بولماسا، مۇلدە كەراعار ۇعىمدار. حاكىمنىڭ «عاشىقتىق، قۇمارلىق پەن ول ەكى جول» دەپ اراسىن اشالاپ ايتىپ وتىرعانى دا سول.
ءبىزدىڭ ەڭ باستى قاتەلىگىمىز «عاشىقتىق» ءسوزىنىڭ شىن تابيعاتىن تاني الماعانىمىزدا بولىپ وتىر عوي. شاكارىم ولەڭدەگى «جار» تۇسىنىگى سەكىلدى بۇل جەردەگى «عاشىقتىق» ءسوزى دە ساكرالدى ۇعىم. ەندەشە «عاشىقتىق» ۇلت پەن ۇلىس، ەركەك پەن ايەل دەپ استە بولىنبەيدى. وندا تەك ىنتىزار ادرەسكە دەگەن الاپات سۇيىسپەنشىلىك پەن ءسارۋار ماحاببات قانا بولادى. مىنە، ابايدىڭ اقۋالى دا وسىنى مەڭزەيدى.
قازاقتىڭ داناسى،
جاس ۇلكەن اعاسى.
بار دەمەس سەندەي ءبىر
ادامنىڭ بالاسى.
قۇدايشىلىعىن ايتايىقشى، وسى ءبىر شۋماقتىڭ ايەل زاتىنا نەندەي قاتىسى بار؟ ولەڭ الاش بالاسىنىڭ «داناسى» مەن «اعاسى» بولار ازاماتىنا سالماق ءتۇسىرىپ تۇرعان جوق پا؟ اكەنىڭ ءابدىراحمانعا ارناعان:
«جاسقا جاس، ويعا كارى ەدىڭ»، «... كورگەنى مەن بىلگەنى، جۇزگە كەلگەن شالدان كوپ». «... باسىڭا قۇداي بەرىپتى، ولشەۋسىز قىلىپ اقىلىن» دەگەن ولەڭ جولدارى توبەدەگى شۋماقتىڭ شىن دالەلى عوي. مۇنى مىسە تۇتپاساڭىز، اقىننىڭ «ءابدىراحمان ناۋقاستانىپ جاتقاندا» جازعان ولەڭدەرى مەن ول دۇنيەدەن وتكەننەن كەيىنگى توپتاماسىنا قايىرا ءبىر نازار اۋدارۋىڭىزدى سۇرايمىز.
جىلايىن، جىرلايىن، اعىزىپ كوز مايىن.
ايتۋعا كەلگەندە، قالقاما ءسوز دايىن.
اباي سول سۇيىكتى پەرزەنتىنە عانا ارناپ ون ەكى ولەڭ جازعانى ءمالىم. كەز كەلگەن قالامگەردىڭ وزىندىك سوزدىك قورى مەن وي اعىسى بولادى دەسەك، اتالعان ولەڭدەگى: «... وزگەشە بولىپ جارالعان، ايىرىلدىم قالقام جارىمنان». «... مەن بىلەمىن، قايتەيىن، مۇنداي اسىل تۋمايدى». «... قىلىعىڭ، قالقام، كەتەر مە، جالعاندا مەنىڭ ويىمنان». «... سول قالقامدى قويماعان، زامانا نەتكەن تار ەدى» دەپ كەلەتىن ولەڭ جولدارى جوعارىداعى شۋماقتىڭ ەش اينا- قاتەسىز قايتالانعان ءوز انالوگياسى ەمەس پە؟
وسى جەردەگى ءتورت شۋماق ولەڭنىڭ ءون بويىنان تابىلعان «عاشىقتىق جاراسى»، «جاس ۇلكەن اعاسى»، «قالقاما ءسوز دايىن» سەكىلدى ءوز ەن تاڭباسى بار ۇعىمدار، بۇل جەردە دە كەڭىنەن تارقاتىلىپ، قايىرا بوي كورسەتىپ تۇرعاندىعىن انىق اڭعارۋىمىزعا بولادى.
جۇرەكتەن قوزعايىن،
ادەپتەن وزبايىن.
ءوزى دە بىلمەي مە،
كوپ سويلەپ سوزبايىن.
مۇرسەيىت بىكى بالاسىنىڭ قولجازباسىمەن جاريالانعان ابايدىڭ العاشقى جيناعىندا «كوزىمنىڭ قاراسى» ولەڭى 1891 - جىلى جازىلعان دەپ كورسەتىلگەن ەكەن. ءابدىراحماننىڭ 1895- جىلى نە بارى جيىرما جەتى جاسىندا مەرت بولعاندىعىن ەسكەرسەك، اتالعان عازال سۇيىكتى ۇلىنىڭ كوزى تىرىسىندە تۋعان. ءبىز اقىننىڭ «ءوزى دە بىلمەي مە» يشاراسىنان وسىنى اڭعارامىز.
ەكىنشى جاعىنان، وسى ءبىر ولەڭ جولدارى اكە مەن بالا اراسىندا ورناعان شىن اسىقتىقتىڭ ۇلىنا دا ايپاراداي انىق ەكەندىگىن ايگىلەپ تۇر. نە بارى ءتورت شۋماق ولەڭنەن عانا تۇراتىن وسى عازالدىڭ سوڭعى جولى اقىننىڭ ءسوز ءتۇيىنى ىسپەتتى. ەندى «كوپ سويلەپ سوزبايىن» دەپ ءوز- وزىنە توقتام جاسايدى. جالپى ابايدىڭ شىعارماشىلىق داعدىسىندا ەكى سويلەۋدىڭ اتىمەن جوق ەكەندىگىن ەسكەرسەك، وسىمەن ولەڭ ءتامامدالۋعا ءتيىس ەدى. قايىرا ايتايىق، «كوپ سويلەپ سوزبايىن» دەگەن سوڭ، وسىمەن ولەڭ بىتۋگە ءتيىس- تۇعىن. جوق، وكىنىشكە قاراي ولاي بولماي شىقتى. «تەرەڭدەپ قارايسىڭ، تەلمىرىپ تۇرمايسىڭ...» دەپ باستالاتىن وزگە ينەرتسيالى ون سەگىز شۋماقتان تۇراتىن بۇعان ءبىر قاتىسى جوق ەكىنشى ءبىر ولەڭنىڭ ەش سەبەپسىز بۇعان قوسىلىپ كەتۋى، نەگىزگى شىندىقتىڭ كوزىن بىتەپ تاستاعان.
ءسىز بەن ءبىزدىڭ تاپا- تالتۇستە ايداي اقيقاتتى اجىراتا الماي ساندالىپ وتىرعانىمىزدىڭ سەبەبى دە سودان. اباي شىعارماشىلىعىندا مۇنداي ءبىر- بىرىنە ەش قاتىسى جوق ەكى ولەڭنىڭ قوسىلىپ كەتۋى نەمەسە كەرىسىنشە بىرگە بەرىلۋگە ءتيىس ولەڭدەرىنىڭ اجىراپ كەتۋى سەكىلدى جايلاردى كوپ بولماسا دا كوزىڭ شالىپ قالادى. ايتالىق، «ءبىر داۋرەن كەمدى كۇنگە - بوزبالالىق» ولەڭىندەگى: «توي بولسا، تون كيەلىك، ءجۇر، بارالىق، ءبىرىمىزدى ءبىرىمىز اۋدارالىق. ات ارىقتار، تون توزار، قادىر كەتەر، كۇلكىنى ونشا كۇيلەپ، شۋلامالىق» ولەڭى ءبىزدىڭ ويىمىزشا «جىگىتتەر، ويىن ارزان، كۇلكى قىمبات» ولەڭىنىڭ ساناتىندا تۇرۋى ءتيىس. نەگە دەسەڭىز، ولەڭنىڭ ءبىرىنشى شۋماعى ەكىنشى شۋماعىنا ءاماندا ءوز ساۋلەسىن تۇسىرەدى دەسەك، وسى جەردەگى تۇسىنىكسىز بولىپ تۇرعان «اۋدارالىق» ءسوزى تومەندەگى ولەڭنىڭ ەش سولىعى باسىلماعان ءوز جالعاسى ەكەندىگىن بىردەن ءبىلدىرىپ تۇر. ارينە، بۇل جەردەگى «اۋدارالىق» ۇعىمىنىڭ ات اۋدارىسپاق ويىنىنا ەشقانداي دا قاتىسى جوق.
«.. ءبىر جەردە بىرگە جۇرسەڭ باسىڭ قوسىپ، ءبىرىڭنىڭ ءبىرىڭ سويلە ءسوزىڭ توسىپ. ءبىرىڭدى ءبىرىڭ عيززات قۇرمەت ەتىس، تۇرعانداي بەينە قورقىپ، جانىڭ شوشىپ». وسى قاز- قاتار تۇرۋعا ءتيىس قوس شۋماق ولەڭ ءوزارا ەكى ولەڭگە بارىپ ءسىڭىپ كەتپەگەندە جوعارىداعى قارامەن بەرىلگەن «اۋدارالىق» ۇعىمىنىڭ «.. ءبىرىڭنىڭ ءبىرىڭ سويلە ءسوزىڭ توسىپ» ەسكەرتپەسىنە قاراپ- اق مۇنىڭ «اۋدارالىق» ەمەس، ياعني ءبىر ءبىرىمىزدى قاشاندا «اڭعارالىق» ەكەندىگىن وپ وڭاي- اق اجىراتىپ الا قوياتىن ەدىك قوي.
ءدال وسىنداي ەكى قوسپا ولەڭدى «جازعىتۇرىم» اتتى عازالىنان دا ۇشىراتۋعا بولادى. وسى ولەڭنىڭ 11 شۋماعىنان كەيىنگى جالعاساتىن «كۇن جوقتا كىسىمسىنەر جۇلدىز بەن اي» دەپ باستالاتىن بەس شۋماق ولەڭنىڭ باستاپقى تاقىرىپقا ءتىپتى دە قاتىسى جوق. ارينە، ءسوز ورايى كەلگەن سوڭ ايتىپ وتىرعانىمىز بولماسا، مۇنىڭ ءبارى كولەمدى ءبىر زەرتتەۋ ماقالاعا لايىق شارۋالار عوي.
ايتپاقشى، ۇمىتىپ تا بارادى ەكەنبىز. ابايدىڭ وسى «كوزىمنىڭ قاراسى» ءانى جۇمىر جەر بەتىندەگى ءار قازاق بالاسىنا تانىس دەسەك اسىرا ايتقاندىعىمىز ەمەس. سول ءبارىمىز «بىلەتىن» ءان ابايدىڭ ءتۇپنۇسقا تۋىندىسى ەمەس، وزگەرىسكە ۇشىراپ وپەراعا بەيىمدەلگەن ۆەرسياسى عانا. العاش دومبىرا تابيعاتىنداعى ءوزىنىڭ ءتول نۇسقاسىن ارۋاقتى ءانشى مادەنيەت ەشەكەيەۆتىڭ ءۇنتاسپاسىنان ەستىگەندە، كوڭىلدىڭ ايران- اسىر بولعانى بار. باقساق، ءان اۋەنىندە ايەل بەينەسى دەگەن اتىمەن جوق، كەرىسىنشە كەلەر ۋاقىتقا دەگەن سەنىم مەن ۇلكەن ءۇمىتتى كورەمىز. سول ۇكىلى ءۇمىتتىڭ الاۋگەر كەيىپكەرى ءان اۋەزىنىڭ ءون بويىندا ۇنەمى مەنمۇندالاپ تۇرادى.
مۋزىكا ماماندارى «قازاقتىڭ كوپتەگەن اندەرى ايەل زاتىنا ارنالعان» دەيدى. بالكىم، سولاي دا شىعار، ءبىراق بۇل جەردەگى «عاشىقتىقتىڭ» وعان ءۇش قايناسا دا سورپاسى قوسىلمايتىنىن قاداپ تۇرىپ ايتقىمىز كەلەدى. «كوزىمنىڭ قاراسى» - كوزىنىڭ قاراشىعىنداي بولعان ءابدىراحمانعا اكە تاراپىنان جازىلعان عاجايىپ تۋىندى. اقىننىڭ اماناتىنداي بولعان وسى ءبىر ولەڭدى تالداۋعا، شىنىمدى ايتسام، كوپكە دەيىن جۇرەكسىنىپ ءجۇردىم. ءيا، ۋاقىت تولعاعىمەن ىشكە تۇسكەن شەمەن ويدىڭ «شەر تولقىتقانداعى» شىققان ءساتى بۇگىن بولدى. نە نارسەنىڭ بولسىن ءوز ادەبى بار عوي. ەندەشە «كوپ سويلەمەي»، ءبىز دە ءسوزىمىزدى وسى جەرىنەن ءتامام ەتەيىك.
اۆتور: ىقىلاس وجاي ۇلى
