ليمون قوسىلعان ىستىق سۋسىن كوروناۆيرۋستى جانە ونكولوگيالىق اۋرۋلاردى ەمدەيدى – فەيك

نۇر- سۇلتان. قازاقپارات - الەۋمەتتىك جەلى قولدانۋشىلارى ليموننىڭ ەمدىك قاسيەتى تۋرالى حابارلاما تاراتۋدا.

سيترۋس جەمىستى ىستىق سۋعا قوسقاندا كوروناۆيرۋسقا قارسى ءدارى- دارمەكتى الماستىرا الادى جانە وبىر جاسۋشالارىين ولتىرەدى. بۇل جالعان، دەپ حابارلايدى stopfake.kz سايتى.

ليمونمەن كوروناۆيرۋستى ەمدەۋ تۋرالى حابارلاما 2019 -جىلدان بەرى الەم بويىنشا الەۋمەتتىك جەلىلەردە تاراۋدا. ونىڭ اۆتورلارى بەيجىڭ اسكەري اۋرۋحاناسىنىڭ باس ديرەكتورى چەن حورينگە سۇيەنەدى، ول ليموننىڭ ۇشتەن ءبىر بولىگىن ىستىق سۋعا قوسىپ، كۇندە ىشۋگە كەڭەس بەردى. بۇل سۋسىن ۆيرۋسقا قارسى ءدارى- دارمەكتى الماستىرۋى كەرەك. بۇل جالعان مالىمدەمە. زەرتتەۋشى چەن حورين تۋرالى كوپشىلىككە قول جەتىمدى اقپارات جوق. س دارۋمەنىنىڭ كوروناۆيرۋسقا قارسى اسەرىن راستايتىن دا زەرتتەۋلەر جوق.

«ليموننىڭ COVID-19 جۇقتىرۋعا جول بەرمەيتىنىنە عىلىمي دالەلدەر جوق. الايدا، جالپى العاندا، د د ۇ دۇرىس تاماقتانۋدىڭ ءبىر بولىگى رەتىندە جەمىس پەن كوكونىستى جەتكىلىكتى مولشەردە جەۋدى ۇسىنادى»، - دەلىنگەن دۇنيەجۇزىلىك دەنساۋلىق ساقتاۋ ۇيىمىنىڭ سايتىندا.

ليمون سۋى وبىر جاسۋشالارىن جويۋعا كومەكتەسەدى دەگەن پىكىر دە دۇرىس ەمەس. ليمون مەن باسقا دا سيترۋس جەمىستىڭ قۇرامىندا قاتەرلى ىسىككە قارسى قاسيەتتەرگە يە تابيعي زاتتار - موديفيكاتسيالانعان سيترۋس پەكتينى مەن ليمونويدتار بار ەكەندىگى تۋرالى زەرتتەۋلەر بار. ءبىراق ولار ادامداردا تەكسەرىلمەگەن. سوندىقتان ولاردىڭ تيىمدىلىگى تۋرالى قورىتىندى جاساۋ مۇمكىن ەمەس.

دارىگەرلەر ليموننىڭ قۇرامىنداعى قوسىلىستاردىڭ كەيبىر تۇرلەرى قاتەرلى ىسىك اۋرۋىنىڭ الدىن الۋدا پايدالى بولۋى مۇمكىن ەكەنىن جوققا شىعارمايدى. الايدا، بۇل زاتتار اعزانىڭ قاتەرلى ىسىكپەن كۇرەسۋ قابىلەتىن ارتتىرادى، ءبىراق وبىر جاسۋشالارىن ولتىرمەيدى.