14:44, 09 - تامىز 2021 | GMT +5
قازاقستاندا ۇشاققا مىنەر الدىندا جولاۋشىلاردىڭ سالماعى ولشەنەدى
نۇر- سۇلتان. قازاقپارات - 9-31- تامىز ارالىعىندا الماتى مەن نۇر- سۇلتان اۋەجايلارىندا كامەلەتكە تولعان جولاۋشىلاردىڭ سالماعىن ەرىكتى تۇردە ولشەۋ شاراسى قولعان الىنادى، دەپ حابارلايدى قازاقپارات ءتىلشىسى.
ۇشاققا مىنەر الدىندا سالماق ولشەۋ حالىقارالىق اۋە كولىگى قاۋىمداستىعىنىڭ (IATA) ەرەجەلەرىندە كوزدەلگەن. قازاقستان اۋەجايلارى دا وسى تاجىريبەنى قولعا الىپ وتىر. بۇل شارا ءبىر جاعىنان ۇشۋ قاۋىپسىزدىگىن ارتتىرۋ ءۇشىن، ەكىنشى جاعىنان ستاتيستيكالىق دەرەكتەردى جيناۋ ءۇشىن قاجەت.
«2021 -جىلعى 9-31 - تامىز ارالىعىندا الماتى جانە نۇر- سۇلتان اۋەجايلارىنان ىشكى جانە حالىقارالىق رەيستەرمەن ۇشاتىن 18 جاستان اسقان جولاۋشىلارعا ەرىكتى سالماق ولشەۋ ۇسىنىلادى. پروتسەدۋرا بەس جىلدا ءبىر رەت جۇرگىزىلەدى»، - دەپ حابارلادى Air Astana.
اۋە كومپانياسى سالماق ولشەۋدىڭ بيلەت قۇنىنا ەش اسەر ەتپەيتىنىن مالىمدەپ وتىر.
اۆتور: ەسىمجان ناقتىباي
