التايدىڭ ايۋىن نوقتالاپ مىنگەن تورعايتى اۋليەنىڭ جايلاۋى - شەتەلدەگى قازاق ءتىلدى ب ا ق- قا شولۋ

نۇر- سۇلتان. قازاقپارات- «قازاقپارات» ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

تابيعاتى اسەم تورعايتى جايلاۋى - «اعاجاي- التاي اقپارات» سايتى

قىتايدىڭ التاي ايماعىنداعى تابيعاتى اسەم تورعايتى جايلاۋى جاز ايلارىندا تۇرلەنىپ، وزگەشە تۇسكە ەنەدى، دەپ جازادى kazakh.altxw.com سايتى.

«كوركى كوز ارباعان تورعايتىنىڭ ءشوبى شۇيگىن، تاۋى جاسىل، ءمولدىر سۋلى، تازا اۋاسى جانعا جايلى مەكەن. كوز جەتەر ماڭدا، تاۋدىڭ بەل جوتاسىنا تۇمان شوگىپ، تابيعاتتىڭ جاراسىمدىلىعىن ايگىلەيدى. كىلەمنىڭ تۇگىندەي كوگالا مايساڭ توسىندە قورالى قوي، تابىندى سيىر جايىلا وتتاپ، تىنىستى تىرشىلىكتى اڭعارتادى. جولىڭىز ءتۇسىپ تورعايتى جايلاۋىنا بارساڭىز، تابيعاتتىڭ سۇلۋ سيپاتىنا ەرىكسىز تاڭداي قاعاسىز. نازارلارىڭىزعا وسى كوركەم تابيعات كورىنىستەرىنەن فوتورەپورتاج ۇسىنامىز»، - دەپ جازادى «اعاجاي- التاي اقپارات» سايتى.

ەسكە سالا كەتەيىك، التاي ايماعىنداعى ولكەتانۋشىلاردىڭ دەرەگىنشە، ХIX عاسىردىڭ سوڭى مەن XX عاسىردىڭ باسىندا ق ح ر- دىڭ التاي وڭىرىندە تورعايتى اتتى اۋليە ءومىر سۇرگەن. التايدىڭ اڭ مەن قۇسىمەن تىلدەسىپ، ايۋىن ءمىنىپ، قۇپيا ۇڭگىرلەرىن مەكەندەگەن اۋليە تۋرالى ەل اراسىنا تاراعان اڭىزدار كوپ.

بۇل اڭىزداردىڭ كوبى تورعايتى اۋليەنىڭ كوزىن كورگەن كونە كوز قاريالاردىڭ اۋىزىنان جازىلىپ الىنعانىمەن قۇندى. قازىرگى كەزدە التايدا اۋليەنىڭ اتىمەن اتالعان «تورعايتى» جايلاۋى جانە ول كىسى مەكەندەگەن «تورعايتى ۇڭگىرى» بار. تورعايتىنىڭ ەلدەن وڭاشا، ديۋانالىق ءومىر كەشكەنى ايتىلادى. ەل قىستاۋعا تۇسكەندە ول جايلاۋعا، ەل جايلاۋعا كوشكەندە ول قىستاۋعا تۇسەتىن بولىپتى.

التايدا قازىرگى كۇنگە دەيىن جۇرت تورعايتىنىڭ وڭگىرىنە كەلىپ، بۇتا- بۇرگەنگە اقتىق بايلاپ، اراسانعا ءتۇسىپ، ۇڭگىرگە كىرىپ اۋليە رۋحىن زيارات ەتەدى ەكەن.

قازاقستاننان جاردەمگە 2 تىكۇشاق كەلدى - TRT

قازاقستان ورمان ورتىمەن كۇرەسىپ جاتقان تۇركياعا 2 دانا Mİ -8AMT ءتيپتى تىكۇشاق پەن 16 كىسىلىك ارنايى ءورت ءسوندىرۋ توبىن جىبەردى، دەپ حابارلايدى تۇركيا راديو تەليەۆيزيا پورتالى.

«قازاقستان توتەنشە جاعدايلار مينيسترلىگىنەن جاسالعان مالىمدەمەدە پرەزيدەنت قاسىم- جومارت توقايەۆتىڭ بۇيرىعىمەن مينيسترلىككە قاراستى ەكى دانا تىكۇشاق پەن ارنايى توپتىڭ ورمان ورتىمەن كۇرەسىپ جاتقان تۇركيانىڭ مۋگلا ءۋالاياتىنا ۇشقانى حابارلاندى. مالىمدەمەدە قازاقستاننىڭ ورمان ورتىندە زاقىمدالعان ورمانداردىڭ بۇرىنعى كۇيىنە كەلتىرىلۋى ءۇشىن گۋمانيتارلىق جاردەم بەرۋگە دايىن ەكەنى دە اتاپ كورسەتىلدى»، - دەپ جازادى TRT.

ورتالىق ازيا حالىقتارىنىڭ ۇلتتىق تاعامدارىنىڭ فەستيۆالى مەن گالا - كونسەرتى ءوتتى - «ءو ز ا» اقپاراتتىق اگەنتتىگى

تۇرىكمەنستاندا وتكەن ورتالىق ازيا مەملەكەت باسشىلارىنىڭ كونسۋلتاتيۆتىك كەزدەسۋ اياسىندا «اۆازا» ۇلتتىق تۋريستىك ايماعىندا ورتالىق ازيا حالىقتارىنىڭ ۇلتتىق تاعامدارىنىڭ فەستيۆالى مەن گالا- كونتسەرتى ءوتتى، دەپ جازادى وزبەكستاننىڭ «ءو ز ا» مەملەكەتتىك اقپاراتتىق اگەنتتىگى.

«پرەزيدەنتتەر قاسىم-جومارت توقايەۆ، سادىر جاپاروۆ، ەمومالي راحمون، گۋربانگۋلى بەردىمۇحامەدوۆ جانە شاۆكات ميرزيەيەۆ الدىمەن ايماق ەلدەرىنىڭ ۇلتتىق تاعامدارى حالىقارالىق فەستيۆالىنىڭ قوناعى بولدى. سودان كەيىن ورتالىق ازيا ەلدەرىندەگى ونەر قايراتكەرلەرىنىڭ قاتىسۋىندا سالتاناتتى كونسەرتتىك باعدارلامامەن جالعاستى. فولكلورلىق - ەتنوگرافيالىق انسامبل مەن ەسترادا انشىلەرىنىڭ قويىلىمدارى، زاماناۋي ساحنالىق بەزەندىرۋلەر، ۇلتتىق ءان مەن بي وا حالىقتاردىڭ بىرلىگى مەن مادەني جاقىندىعىن ايقىن كورسەتتى»، - دەپ جازادى «ءو ز ا» اقپاراتتىق اگەنتتىگى.

قازاقستاندا ەرتە تەمىر داۋىرىنە جاتاتىن التىن سەمسەر تابىلدى – TRT

قازاقستاننىڭ اقتوبە وبلىسىنىڭ اۋماعىنان ەرتە تەمىر داۋىرىنە، ياعني ب. د. د. VI- V عاسىرلارعا جاتاتىن سارمات ءداۋىرىنىڭ قورىمى تابىلدى، دەپ حابارلايدى تۇركيا راديو تەليەۆيزيا پورتالى.

«اقتوبە وبلىس اكىمشىلىگىنىڭ مالىمدەمەسىنە قاراعاندا مۇعالجار اۋدانى اۋماعىندا جاعابۇلاق قورىمىنان ءبىر اي بۇرىن تابىلعان بىرەگەي ولجا - تاستان جاسالعان قۇربان شالىناتىن ورىن جانە التىن جالاتىلعان سەمسەر ەرتە تەمىر داۋىرىنە تيەسىلى. قازبا جۇمىستارى بارىسىندا سونداي- اق، قولا اينا، التىن توعا جانە ت. ب. ەجەلگى زاتتار تابىلدى. ارحەولوگيالىق ەسكەرتكىشتى زەرتتەۋ جۇمىستارى ءالى دە جالعاسۋدا»، - دەپ جازادى TRT.

اشحاباتتا ورتا ازيا ەلدەرى باسشىلارىنىڭ بەيرەسمي كەزدەسۋى بولدى – فارس

وزبەكستان، قازاقستان، قىرعىزستان، تاجىكستان مەن تۇركىمەنستان باسشىلارى اشحاباتتا ورتا ازيا ەلدەرى باسشىلارىنىڭ كونسۋلتاتيۆتىڭ وتىرىسىن وتكىزۋ ماقساتىندا جينالىپ، بەيرەسمي كەزدەسۋ وتكىزدى، دەپ حابارلايدى يراننىڭ Parstoday اقپارات اگەنتتىگى.

«قازاقستان پرەزيدەنتىنىڭ باسپا ءسوز حاتشىسى بەرىك ءۋالي كاسپي تەڭىزىنىڭ جاعالاۋىندا ورتا ازيانىڭ 5 ەلى باسشىلارىنىڭ بەيرەسمي كەزدەسكەنىن حابارلادى. ونىڭ ايتۋىنشا، ورتا ازيا ەلدەرىنىڭ باسشىلارى قاسىم- جومارت توقايەۆ، قۇربانق ۇلى بەردىمۇحامەدوۆ، ەمومالي راحمون، شاۆكات ميرزيەيەۆ پەن سادىر جاپاروۆ كاسپي تەڭىزىنىڭ جاعالاۋىندا بەيرەسمي كەزدەستى. سونىمەن بىرگە ورتا ازيا ەلدەرىنىڭ باسشىلارى تۇركىمەنباشى قالاسىنا جاقىن جەردەگى «اۆازا» ۇلتتىق تۋريستىك ايماعىن ارالادى»، - دەپ جازادى Parstoday اگەنتتىگى.

اۆتور: باقىتجول كاكەش