الماتى «قويۋ قىزىل ايماققا» ەندى: بەكشين جاڭا قاۋلىنى ءتۇسىندىردى

الماتى. قازاقپارات - الماتىنىڭ باس سانيتارلىق دارىگەرى جانداربەك بەكشين كوروناۆيرۋس بويىنشا قالانىڭ «قويۋ قىزىل» ايماققا اۋىسقانى تۋرالى جاڭا قاۋلىنى ءتۇسىندىردى، دەپ حابارلايدى «قازاقپارات» ح ا ا ءتىلشىسى.

سپيكەر 29 - شىلدەدەگى قاۋلىعا سايكەس، 2-16 - تامىز كۇندەرى «قويۋ قىزىل» ايماق بويىنشا شەكتەۋ شارالارى ەنگىزىلگەنىن اتاپ ءوتتى.

«ەلىمىزدىڭ باس مەملەكەتتىك سانيتارلىق دارىگەرىنىڭ قاۋلىسىندا الماتى، نۇر- سۇلتان، شىمكەنت، اتىراۋ جانە قاراعاندى قالالارىندا تامىزدىڭ 2-نەن 16-نا دەيىن «قويۋ قىزىل» ايماق بويىنشا، ياعني دەمالىس كۇندەرى شەكتەۋ شارالارىن ەنگىزۋ كەرەكتىگى ايتىلعان. وسىعان بايلانىستى ءبىز دە قاۋلى قابىلدادىق. بۇل جۇمىس اۋرۋدىڭ الدىن الۋ ءۇشىن قاجەت. جاعدايدىڭ وتە كۇردەلى ەكەنىن وزدەرىڭىز دە كورىپ وتىرسىزدار. جاڭا عانا ارىپتەسىم ناريمان بولتاي ۇلى (الماتى قالاسى قوعامدىق دەنساۋلىق باسقارماسىنىڭ باسشىسى - رەد.) دەنساۋلىق ساقتاۋ ينفراقۇرىلىمىمىز قانداي قيىن جاعدايدا جۇمىس ىستەپ جاتقانىن، مەديتسينا قىزمەتكەرلەرى اۋرۋدى تومەندەتۋ ءۇشىن قانداي كۇردەلى جۇمىس اتقاراتىنىن ايتىپ بەردى. ءبىز دە شەكتەۋ شارالارىن ەنگىزدىك، ەندى بارلىق نىساندار «Ashyq» جۇيەسىندە بولماسا، جۇمىس كۇندەرى دە جابىق بولادى. ال جۇيەگە قوسىلعاندار - جۇمىس كۇندەرى 20:00-گە دەيىن قىزمەت كورسەتە الادى. دەمالىس كۇندەرى بارلىق نىساندار «Ashyq» جۇيەسىندە بولسا دا، جۇمىس ىستەمەيدى»، - دەپ ءتۇسىندىردى ج. بەكشين.

«ءبىز قازىر بۇعان دەيىن ايتىلعان ەپيداحۋالدىڭ شارىقتاۋ شەگىندە تۇرمىز. وسىعان دەيىن 3-4 - تامىزدا تاۋلىگىنە اۋرۋدىڭ 1600 جاعدايى كۇتىلەدى دەگەنبىز. وسى اپتادا 1558، 1570 جاعداي انىقتالدى، بولجام ءىس جۇزىندە سايكەس كەلدى. ءبىز ودان ءارى ءوسىمدى بولدىرماۋعا تىرىسامىز، دەگەنمەن ءبىزدىڭ بولجامىمىز شىلدە ايىنىڭ سوڭىندا مىناداي بولدى: تامىزدىڭ ورتاسىندا 1900 جاعدايعا دەيىن كۇتىلەدى دەگەنبىز. ەگەر ەشتەڭە جاساماساق، ءوسىم ودان دا كوپ بولۋى مۇمكىن»، - دەدى ول.

باس سانيتار قالا تۇرعىندارىن شەكتەۋ شارالارىن ساقتاۋعا، ءتارتىپتى ۇستانۋعا جانە توسەك ورىنداردىڭ تولۋىنا جول بەرمەۋگە شاقىردى.

ونىڭ ايتۋىنشا، سوڭعى اپتادا الماتىدا كۇنىنە اۋرۋ جۇقتىرۋ دەڭگەيى 1,6 مىڭعا جۋىق جاعدايعا تۇراقتانىپ، ك ۆ ي بويىنشا ەپيدەميولوگيالىق جاعداي ناشارلاعان. 28- شىلدەدەن باستاپ ك ۆ ي- ءدىڭ تاۋلىكتىك تىركەلۋى 1,5 مىڭنان اسىپ، شىلدە ايىندا 25544 جانە بيىلعى جىلدىڭ باسىنان باستاپ 89035 جاعدايدى قۇرادى.

«الماتىدا COVID-19-دىڭ بريتاندىق نۇسقاسىنان تۋىنداعان ەپيدەميانىڭ ءۇشىنشى تولقىنى 8-20 - ماۋسىم ارالىعىندا (پلاتو 11 كۇن) تۇراقتالعاننان كەيىن جانە 20 - شىلدەدەن كەيىن «دەلتا» شتامىنىڭ تارالۋىنان كەيىن 25 كۇنى ەپيدەميانىڭ ءتورتىنشى تولقىنى باستالدى، ونىڭ شارىقتاۋ شەگى ءىس جۇزىندە بيىلعى جىلدىڭ 30- شىلدەسىنەن باستالادى، تاۋلىگىنە شامامەن 1,5 - 1,6 مىڭ جاعداي تىركەلىپ وتىردى. تامىز ايىنىڭ سوڭىنا قاراي اۋرۋ تومەندەپ، ك ۆ ي جاعدايلارىن اپتالىق تىركەۋ 12 مىڭ جاعدايعا دەيىن وسەدى دەپ بولجانۋدا»، - دەدى بەكشين.

اۆتور: ايجان سەرىكجان قىزى