قازاقستاندىق ۆاكسينانىڭ ۆيرۋستى بەيتاراپتاندىرۋ قابىلەتى الەم مويىنداعان جەتەكشى ۆاكسينالاردان جوعارى - كۇنسۇلۋ زاكاريا
«QazVac ۆاكسيناسىن سالعان اعزانىڭ يممۋندىق رەاكسياسى قانداي دەڭگەيدە بولاتىنىن ءتىرى ۆيرۋستى بەيتاراپتاندىرۋ رەاكسياسى ايعاقتاي الادى. 3244 ادامعا جۇرگىزىلگەن ءۇش فازالى كلينيكالىق زەرتتەۋ مەن 200-دەن استام ەرىكتىگە حاتتامادان تىس جاسالعان زەرتتەۋ QazVac ۆاكسيناسى سالىنعان ادامداردىڭ % 95- دان استامىندا SARS- CoV-2 ۆيرۋسىنا ۆيرۋس بەيتاراپتاندىراتىن انتيدەنە قالىپتاسقانىن كورسەتتى»، - دەيدى مامان.
ۆاكسينا جاساۋشى توپتىڭ جەتەكشىسى نۇر- سۇلتان قالاسىندا جاسالعان زەرتتەۋگە قاراپ QazVac-تىڭ تيىمدىلىگىنە ءبىرجاقتى باعا بەرۋگە بولمايتىنىن ەسكەرتىپ وتىر.
«ال نۇر- سۇلتان قالاسىنداعى زەرتحانادا جۇرگىزىلگەن سىناق يممۋندىق- فەرمەنتتىك تالداۋ ارقىلى جۇرگىزىلدى. مۇنداي تاسىلمەن ۆاكسيناتسيادان كەيىنگى انتيدەنەنى ۆيرۋس جۇقتىرىپ اۋىرعاننان كەيىن قالىپتاساتىن انتيدەنەدەن اجىراتۋ مۇمكىن ەمەس. قازىر ەل ىشىندە سيمپتومسىز كوروناۆيرۋسپەن اۋىرۋ ناتيجەسىندە پايدا بولعان انتيدەنەلەرى بار ادامدار كوپ. سوندىقتان يممۋندىق- فەرمەنتتىك تالداۋ مالىمەتتەرى بويىنشا ۆاكسيناتسيا ناتيجەلەرىن جانە ونىڭ تيىمدىلىگىن باعالاۋ دۇرىس ەمەس»، - دەيدى عالىم.
كۇنسۇلۋ زاكاريا دۇنيەجۇزىلىك دەنساۋلىق ساقتاۋ ۇيىمى مويىنداعان جەتەكشى ۆاكسينالاردىڭ ءوزى تۋرالى ءتۇرلى زەرتتەۋلەردىڭ اركەلكى ناتيجە كورسەتكەنىن ەسكە سالدى.
«سوڭعى جاريالانعان دەرەكتەردىڭ بىرىندە قىتايدا جاسالعان ۆاكسينانىڭ تيىمدىلىگى % 52- دان اسپايتىنىن، ال Pfizer ۆاكسيناسىنىڭ تيىمدىلىگى % 64 دەپ تۇزەتىلدى. بۇل كورسەتكىش ناقتىلاۋدى قاجەت ەتەدى. دەگەنمەن زەرتحانالىق تەستىلەۋ قورىتىندىسى بويىنشا بۇل ۆاكسينالاردىڭ يممۋنيتەت قالىپتاستىرۋ قابىلەتى 90-95 پايىزدان جوعارى دەپ باعالانعان بولاتىن. جاريالانىپ جاتقان ناتيجەلەر زەرتتەلگەن ۆاكسينالاردىڭ تيىمدىلىگىن ناقتى كورسەتە المايدى دەپ ەسەپتەيمىز. سونداي- اق، زەرتتەۋلەر ۆاكسينا ەگىلگەننەن كەيىن قانداي مەرزىمدە جۇرگىزىلگەنى بەلگىسىز كۇيىندە قالىپ وتىر»، - دەيدى ورتالىقتىڭ باس ديرەكتورى.
مامان QazVac ۆاكسيناسىنا جاسالعان سىناقتىڭ III فازاسى ەكپەنىڭ تيىمدىلىگىن كورسەتكەنىن ايتادى.
«ۆاكسينانى باعالاۋ قورىتىندىسى % 79 جانە ودان جوعارى بولسا، بۇل بارلىق ۆاكسينالار ءۇشىن، سونىڭ ىشىندە اتتىڭ جالى، تۇيەنىڭ قومىندا شىعارىلىپ جاتقان QazVac ءۇشىن وتە جاقسى ناتيجە دەگەن ءسوز. QazVac ۆاكسيناسىنىڭ COVID-19-دىڭ الدىن الۋعا ءتيىمدى ەكەنىن كلينيكالىق زەرتتەۋلەردىڭ III فازاسى كورسەتتى. QazVac ۆاكسيناسىنان كەيىن پايدا بولعان انتيدەنەلەردىڭ ۆيرۋستى بەيتاراپتاندىرۋ دەڭگەيى قىتاي شىعارعان ۆاكسيناعا (Hayat-Vax) قاراعاندا ەداۋىر جوعارى جانە سپۋتنيك- V ۆاكسيناسىنان 1-2 ساتى عانا تومەن. ياعني، QazVac جانە سپۋتنيك- V ۆاكسيناسىنان كەيىن پايدا بولعان انتيدەنەلەر ۆيرۋستىڭ بريتاندىق جانە ۇندىلىك شتامدارىنان سەنىمدى قورعايدى. ال Hayat-Vax-تىڭ قابىلەتى بۇل تۇرعىدا وتە ءالسىز»، - دەيدى عالىم.
اۆتور: ەسىمجان ناقتىباي
