وليمپيادا ويىندارى: كورسەتىلىم بويىنشا كەلىسسوز قالاي ءجۇرىپ جاتىر
بۇل تۋرالى پرەزيدەنت اكىمشىلىگى باسشىسىنىڭ ءبىرىنشى ورىنباسارى داۋرەن ابايەۆ «اشىق ديالوگ» سۇحباتىندا ايتتى.
«ءدال قازىر ءسىز ەكەۋمىز سۇحباتتاسىپ وتىرعان ساتتە جاپونيادا وليمپيادا كورسەتىلىمىن ۇيىمداستىرۋ قۇقىعىنا يە تاراپپەن كەلىسسوز ءجۇرىپ جاتىر. كورسەتىلىم قۇقىعىن ساتىپ الۋ مۇمكىندىگى ءالى بار دەگەن ويدامىن. ۇكىمەت ازاماتتارىمىزدىڭ ءوز سپورتشىلارىنا تىكەلەي ەفيردە جانكۇيەر بولۋى ءۇشىن ءبارىن جاسايدى. ءبىر عانا پروبلەما بار جانە ول تەك باعاعا بايلانىستى. بۇگىنگە دەيىن بىزگە تىم قىمبات باعا ۇسىنىلعان بولاتىن. ونىڭ ۇستىنە بۇل جاعداي ىلعي، جىلدان- جىلعا قايتالانىپ وتىر. قازاقستانعا كەيبىر كورشى ەلدەرگە قاراعاندا ونداعان ەسە قىمبات باعا ۇسىنىلىپ كەلدى. مۇنى ەلىمىزدىڭ ەكونوميكالىق دامۋ دەڭگەيىمەن بايلانىستىرادى»، - دەگەن داۋرەن ابايەۆ سوڭعى كەلىسسوز ناتيجەسىندە كورسەتىلىم باعاسى باستاپقىدان ارزانداي باستاعانىن ايتتى.
«ارينە، ءبىزدى حالىقتى سپورت مەرەكەسىنەن ايىراتىن بولدى دەپ ايىپتاپ جاتقان شىعار. ءبىراق مۇنداعى جالعىز سەبەپ - سالىق تولەۋشىلەردىڭ اقشاسىن ۇنەمدەپ قالۋ نيەتى عانا. كوممەرتسيالىق قۇپياعا بايلانىستى ازىرگە باعانى اتاي المايمىن. ءبىراق باستاپقى ايتىلعان تاريفكە قاراعاندا ءتۇسىپ كەلەدى. كەلىسسوز ءجۇرىپ جاتىر. جۋىق ارادا ماسەلە كۇن تارتىبىنەن الىنادى دەپ ويلايمىن»، - دەدى پرەزيدەنت اكىمشىلىگى باسشىسىنىڭ ءبىرىنشى ورىنباسارى.
اۆتور: ەسىمجان ناقتىباي
