كانن فەستيۆالىندە «التىن پالما بۇتاعىن» ەكىنشى رەت ايەل رەجيسسەر جەڭىپ الدى
قازىلار ءتوراعاسى امەريكالىق رەجيسسەر سپايك لي جەڭىمپازداردى جاريالاۋ رەتىن شاتاستىرىپ الىپ، ءتىزىمدى باس جۇلدەدەن باستادى، دەپ حابارلايدى قازاقپارات Еuronews اگەنتتىگىنە سىلتەمە جاساپ.
دجۋليا ديۋكورنو فەستيۆال تاريحىندا باس جۇلدەگە يە بولعان ەكىنشى ايەل بولدى. «تيتان» قاندى دراماسىنىڭ ەگجەي-تەگجەيى كاننداعى پرەمەراعا دەيىن قۇپيا ساقتالدى.
رەجيسسەر دجۋليا ديۋكورنو ايتقانداي، قورقىنىشتى جانر ادامداردىڭ ۇرەيلەرى مەن تىلەكتەرى تۋرالى تەرەڭىرەك اڭگىمەلەسۋگە مۇمكىندىك بەرەدى.
«تيتاننىڭ» سيۋجەت جەلىسىندە ادامدار، روبوتتار، اۆتوموبيلدەرگە دەگەن قۇشتارلىق، زورلىق- زومبىلىق جانە جوعالعان بالانى ىزدەۋ قامتىلعان. بيىل باستى سىيلىق ءۇشىن 24 فيلم باق سىنادى. امەريكالىق كينواكتەر جانە مۋزىكانت كالەب لەندري دجونس اۋستراليالىق رەجيسسەر دجاستين كۋرزەلدىڭ «نيترام» كينوكارتيناسىنداعى ءرولى ءۇشىن «ەڭ ۇزدىك ەر ادام ءرولى» سىيلىعىن جەڭىپ الدى. فيلمنىڭ سيۋجەتى ومىردە بولعان وقيعالارعا نەگىزدەلگەن جانە اۋستراليانىڭ پورت- ارتۋر قالاسىنداعى جاپپاي كىسى ءولتىرۋ تۋرالى باياندايدى.
نورۆەگيالىق اكتريسا رەناتە رەينسۆە نورۆەگيالىق رەجيسسەر يواكيم تريەردىڭ «الەمدەگى ەڭ ناشار ادام» فيلمىندەگى ءرولى ءۇشىن «ەڭ ۇزدىك ايەل ءرولى» سىيلىعىن الدى. كارتينا 30 جاستاعى ايەلدىڭ ومىرىندەگى داعدارىس كەزەڭىندەگى وقيعالاردى باياندايدى.
يزرايل رەجيسسەرى ناداۆ لاپيد «احەدتىڭ تىزەسى» فيلمى ءۇشىن كانن كينوفەستيۆالىنىڭ قازىلار القاسى سىيلىعىنا يە بولدى. كينوفەستيۆالدىڭ قۇرمەتتى «التىن پالما بۇتاعى» يتاليالىق رەجيسسەر ماركو بەللوكوعا تابىس ەتىلدى.
بايقاۋدى ۇيىمداستىرۋ كوميتەتىنىڭ شەشىمى بويىنشا ول بۇل سىيلىققا «زاماناۋي كينەماتوگرافياعا كۇش پەن ەركىندىك بەرگەن بىرەگەي شىعارماشىلىعى ءۇشىن» يە بولدى. ۇزدىك ستسەناريي جۇلدەسىن ريۋسۋكە حاماگۋتي «مەنىڭ كولىگىمدى جۇرگىز» فيلمى ءۇشىن الدى. «اننەتت» فيلمى ءۇشىن فرانسۋز لەوس كاراكاس ۇزدىك رەجيسسەر دەپ تانىلدى.
اۆتور: اياۋلىم التىنبەك
