باعانى باقىلاۋ: پرەزيدەنت دەلدالدىق سحەمالاردى تەرگەپ- تەكسەرۋدى تاپسىردى
بۇل تۋرالى مەملەكەت باسشىسى قاسىم- جومارت توقايەۆ ايتتى، دەپ حابارلايدى قازاقپارات ءتىلشىسى.
«الەمدىك، اسىرەسە ىرگەلەس نارىقتارداعى سۇرانىستى، ۇسىنىستى جانە باعانى بولجاۋ جۇيەسىنىڭ بولۋى وتە ماڭىزدى. قازاقستان، رەسەي، وزبەكستان، قىرعىزستان اراسىنداعى ساۋدا اعىندارى - تىرشىلىكتىڭ ءبىر بولىگى، ولاردىڭ بولۋى ءسوزسىز. سوندىقتان اۋىل شارۋاشىلىعى مينيسترلىگىنىڭ بولجامدىق- تالداۋ اپپاراتى ولاردىڭ اسەرىن تولىعىمەن ەسكەرۋى كەرەك. ال قازىر بۇل جۇمىستاردى كورىپ وتىرعان جوقپىز»، - دەدى پرەزيدەنت ۇكىمەتتىڭ كەڭەيتىلگەن وتىرىسىندا.
سونىمەن بىرگە، ق. توقايەۆ ۆەدومستۆوارالىق ىنتىماقتاستىق تا ماڭىزدى ەكەنىن، نەگىزگى داقىلدار مەن تاۋارلار بويىنشا بولجامدىق بالانستار ازىرلەپ، ارىپتەستەرمەن اقپارات الماسۋ قاجەتتىگىن ايتتى.
«شامادان تىس جانە كولەڭكەلى دەلدالدار ماڭىزدى ماسەلە بولىپ وتىر. ءادىل ساۋدا دەلدالدىعى - نارىقتىق ەكونوميكانىڭ اجىراماس جانە قاجەتتى بولىگى. ءبىراق دەلدالدار نارىقتى ءوز ىڭعايلارىنا «سىندىرىپ»، وندىرۋشىلەر مەن تۇتىنۋشىلار ەسەبىنەن اسا كوپ پايدا تاۋىپ جاتادى - بۇعان جول بەرۋگە بولمايدى. كوبىنەسە جەرگىلىكتى بيلىكتىڭ ءوزى انىقتاي المايتىن وتە تۇراقتى سحەمالار بولادى. ۇكىمەت باسەكەلەستىكتى قورعاۋ اگەنتتىگىمەن جانە اكىمدەرمەن بىرلەسىپ، وڭىرلەردە وسىنداي دەلدالدىق سحەمالاردى تەرگەپ- تەكسەرۋ جونىندە كوميسسيا قۇرۋى قاجەت. بۇل جۇمىسقا قارجى مونيتورينگى اگەنتتىگى دە قوسىلۋى ءتيىس. ولار باعانىڭ بۇكىل تىزبەگىن تەكسەرىپ، ناتيجەلەرىن بايانداۋى كەرەك. ءىرى قالالاردىڭ كوتەرمە ساۋدا نارىقتارىنا ەرەكشە نازار اۋدارۋ كەرەك»، - دەپ تاپسىرما بەردى پرەزيدەنت.
بۇعان دەيىن قاسىم- جومارت توقايەۆ ەلدەگى ازىق- تۇلىكتىڭ قىمباتتاۋى جونىندە پىكىر ءبىلدىرىپ، پاندەميا ازىق- تۇلىك قاۋىپسىزدىگىندەگى وسالدىقتى اشىپ كورسەتكەنىن ايتقان ەدى.
اۆتور: ايجان سەرىكجان قىزى
