پرەزيدەنت: اۋىل شارۋاشىلىعى ءمينيسترى ساپارحان وماروۆ وتستاۆكاعا كەتۋى ءتيىس

نۇر- سۇلتان. قازاقپارات - مەملەكەت باسشىسى قاسىم- جومارت توقايەۆ ۇكىمەتتىڭ كەڭەيتىلگەن وتىرىسىندا قۋاڭشىلىققا تاپ بولعان وڭىرلەرگە كومەك كورسەتۋدى تاپسىردى، دەپ حابارلايدى قازاقپارات ءتىلشىسى.

«جالپى وسىعان دەيىن بۇل مينيسترلىكتە ءبىرقاتار باسشىلار بولدى. الايدا ءار مينيستر ءوز باعدارلاماسىن جۇزەگە اسىرعان ەدى. ناتيجەسىندە مۇنداي جۇمىس سالانى قاۋقارسىز كۇيگە ءتۇسىردى، شارۋالاردى ابدەن قاجىتتى. ۇكىمەت پەن اكىمدەر «بايتەرەك» حولدينگىمەن بىرلەسىپ، زيان شەككەن فەرمەرلەرگە قولداۋ كورسەتۋ ءۇشىن شۇعىل تۇردە كەشەندى شارالار ازىرلەۋى ءتيىس. ۇكىمەتتىڭ توتەنشە جاعدايلارعا ارنالعان رەزەرۆىن پايدالانىڭىزدار، قاجەتتى كومەكتى بەرىڭىزدەر»، - دەدى پرەزيدەنت.

مەملەكەت باسشىسى ءوڭىرارالىق جانە سالاارالىق ماسەلەلەردى شەشۋ ءۇشىن قۇرىلعان رەسپۋبليكالىق شتابتىڭ جۇمىسىنا كوڭىل تولمايتىنىن ايتتى.

«جالپى رەسپۋبليكالىق شتاب جەدەل جۇمىس جۇرگىزۋى كەرەك. قابىلدانعان شارالاردىڭ باعىتى فەرمەرلەرگە انىق ءارى تۇسىنىكتى بولۋعا ءتيىس. مىنا نارسەلەرگە نازار اۋدارعىم كەلەدى: مەملەكەت مىندەتتى تۇردە قاجەتتى كومەكتى كورسەتەدى. سونداي- اق، شارۋالار دا ورتاق جۇمىسقا اتسالىسۋى قاجەت. ەڭ الدىمەن قيىندىققا تاپ بولعان وڭىرلەرگە جەم- ءشوپتى جەدەل جەتكىزىپ، مالدىڭ قىرىلۋىن توقتاتۋ كەرەك. توتەنشە شارا رەتىندە ەرەكشە قورعالاتىن تابيعي اۋماقتاردان ءشوپ جيناۋ مۇمكىندىگىن قاراستىرعان ءجون»، - دەدى پرەزيدەنت.

ايتا كەتەيىك، قاسىم- جومارت توقايەۆ ۇكىمەتتىڭ كەڭەيتىلگەن وتىرىسىندا وڭىرلەردەگى قۋاڭشىلىقتا ءتيىستى جۇمىس اتقارماعانى ءۇشىن اۋىل شارۋاشىلىعى ءمينيسترىن وتستاۆكاعا جىبەردى.

اۆتور: ايجان سەرىكجان قىزى