ق ر پرەزيدەنتى: باستى ماقسات - ەكونوميكانى ۇدەتۋ جانە حالىقتىڭ ءال- اۋقاتىن ارتتىرۋ
«باستى ماقسات - ەكونوميكانى ۇدەتۋ جانە حالىقتىڭ ءال- اۋقاتىن ارتتىرۋ. ىندەتكە جانە شەكتەۋ ءىس- شارالارىنا قاراماستان ەل ەكونوميكاسى جارتى جىلدىڭ ىشىندە 2,2 پايىزعا ءوستى. بۇل قۋانتارلىق جايت. بىلتىر پاندەميانىڭ سالدارىنان ىشكى جالپى ءونىم 2,6 پايىزعا تومەندەدى. ءبىز ونى تەزىرەك قالپىنا كەلتىرۋىمىز كەرەك»، - دەدى ۇكىمەتتىڭ كەڭەيتىلگەن وتىرىسىن اشقان قاسىم- جومارت توقايەۆ.
مەملەكەت باسشىسىنىڭ ايتۋىنشا، داعدارىسقا قارسى ءىس- شارالاردىڭ جانە كارانتيندىك شەكتەۋلەردىڭ تومەندەۋىنە بايلانىستى ىسكەرلىك بەلسەندىلىك قالپىنا كەلدى.
«ءبىزدىڭ مىندەتىمىز - ەكىنشى جارتىجىلدىقتا ەكونوميكا ءوسىمى قارقىنىن ارتتىرۋ»، - دەپ اتاپ ءوتتى ق ر پرەزيدەنتى.
قازىرگى ۋاقىتتا ق ر پرەمەر- ءمينيسترى اسقار مامين 2021 -جىلدىڭ 1-جارتىجىلدىعىنداعى ەلىمىزدىڭ الەۋمەتتىك- ەكونوميكالىق دامۋى جانە جىل سوڭىنا دەيىنگى ۇكىمەتتىڭ جوسپارلارى جايىندا بايانداۋدا. ودان كەيىن ۇلتتىق بانك ءتوراعاسى ەربولات دوسايەۆ، ق ر پرەمەر- ءمينيسترىنىڭ ورىنباسارى ەرالى توعجانوۆ ءسوز سويلەيدى. سونداي - اق ماڭعىستاۋ، سولتۇستىك قازاقستان وبلىستارىنىڭ جانە شىمكەنت قالاسىنىڭ اكىمى بايانداما جاسايدى.
اۆتور: مارلان جيەمباي
