قازاقستاندىق ۆاكسينانى سىناۋدىڭ ءۇشىنشى كەزەڭى قاشان اياقتالاتىنى بەلگىلى بولدى
دەنساۋلىق ساقتاۋ مينيسترلىگى وسى ءۇشىنشى كەزەڭنىڭ قورىتىندىسى قاشان جاريالاناتىنى تۋرالى تۇسىنىكتەمە بەردى، دەپ حابارلايدى قازاقپارات.
«شىلدە ايىندا سىناقتاردىڭ ءۇشىنشى كەزەڭىنىڭ التى ايلىق مەرزىم اياقتالادى. بۇل مەرزىم شىلدە ايىنىڭ ورتاسىندا بولادى. تيىسىنشە وسىدان كەيىن كلينيكالىق سىناقتاردىڭ ءۇشىنشى فازاسى بويىنشا ءتيىستى ەسەپتەر رەسىمدەلىپ، دارىلىك زاتتاردى ساراپتاۋ ورتالىعىنا بەرىلەدى. سوڭعى قورىتىندىنىڭ قاشان شىعاتىنى ەكپەنى ازىرلەۋشىلەردىڭ دارىلىك زاتتاردى ساراپتاۋ ۇلتتىق ورتالىعىنا ەگجەي- تەگجەي ەسەپتى قاشان تولىق وتكىزەتىنىنە بايلانىستى»، - دەدى ۆيتسە-مينيستر مارات شورانوۆ.
سونداي-اق، ول QazVac ۆاكسيناسىنىڭ دۇنيەۇزىلىك دەنساۋلىق ساقتاۋ ۇيىمىنىڭ تىركەۋىنە الىنۋى تۋرالى پىكىر ءبىلدىردى.
«ءبىزدىڭ QazVac ۆاكسيناسى بويىنشا وتارداعى بيولوگيالىق قاۋىپسىزدىك ينستيتۋتىنىڭ عالىمدارى قازىر دۇنيەجۇزىلىك دەنساۋلىق ۇيىمىمەن جۇمىس ىستەپ، ءوز وتىنىمدەرىن تولتىرىپ جاتىر. سونىمەن قاتار تاعى ءبىر ۇيىمداستىرۋ جۇمىستارى بار. ەندى ءبىز دۇنيەجۇزىلىك دەنساۋلىق ساقتاۋ ۇيىمىنىڭ ماماندارىمەن بىرگە كەستەگە ەنگىزۋگە تىرىسامىز. قاراعاندىدا شىعاتىن «سپۋتنيك V» ۆاكسيناسىنىڭ بىزدە تەك قۇتىعا قۇيىلاتىنىن بىلەسىزدەر. جالپى رەسەي فەدەراتسياسى د د س ۇ- مەن بىرگە جۇمىس ىستەپ جاتىر. جاقىن ارادا بىزگە مالىمەت ءتۇسۋى كەرەك. ول ەندى د د س ۇ- دا تىركەلسە، دۇنيەجۇزى مويىنداعان دەپ ەسەپتەلەدى»، - دەدى دەنساۋلىق ساقتاۋ ءمينيسترىنىڭ ءبىرىنشى ورىنباسارى.
