مىندەتتى ۆاكسيناتسيا كونستيتۋتسيا نورمالارىنا ساي كەلەدى - ادىلەت مينيسترلىگى

نۇر-سۇلتان. قازاقپارات - مىندەتتى ۆاكسيناتسيا كونستيتۋتسيا تالاپتارىنا قايشى ەمەس.

بۇل تۋرالى ق ر ادىلەت مينيسترلىگىنىڭ رەسمي سايتىنان ءمالىم بولدى، دەپ حابارلايدى قازاقپارات.

سايتتا جاريالانعان مالىمەتتەرگە قاراعاندا، ينفەكتسيالىق جانە پارازيتتىك اۋرۋلاردىڭ پايدا بولۋى مەن تارالۋىنىڭ الدىن الۋ ماقساتىندا دەنساۋلىق تۋرالى كودەكستە كوزدەلگەن سانيتاريالىق-ەپيدەمياعا قارسى ءىس-شارالاردىڭ ءبىرى - پروفيلاكتيكالىق ەكپەلەر.

مەديتسينالىق قارسى كورسەتىلىمدەرى جوق، ق ر اۋماعىندا تۇراقتى تۇراتىن جەكە تۇلعالار ينفەكتسيالىق جانە پارازيتتىك اۋرۋلارعا قارسى ەكپەلەردى الۋعا مىندەتتى (كودەكستىڭ 85-بابىنىڭ 4 جانە 8-تارماقتارى)، ولاردىڭ قاتارىنا ك ۆ ي- عا قارسى پروفيلاكتيكالىق ەكپە دە جاتادى (قازاقستان رەسپۋبليكاسى ۇكىمەتىنىڭ 2020-جىلعى 24- قىركۇيەكتەگى 612№ قاۋلىسىنا سايكەس).

وسىلايشا، مەديتسينالىق قارسى كورسەتىلىمدەرى جوق ادامدار ءۇشىن ك ۆ ي- عا قارسى مىندەتتى ۆاكسيناتسيالاۋدىڭ قۇقىقتىق نەگىزدەرى بار جانە بۇل «مەملەكەت ادامنىڭ ءومىر ءسۇرۋى مەن دەنساۋلىعىنا قولايلى اينالاداعى ورتانى قورعاۋدى ماقسات ەتىپ قويادى» دەگەن كونستيتۋتسيالىق نورماعا سايكەس كەلەدى (كونستيتۋتسيانىڭ 31-بابى).

«ادامنىڭ جانە ازاماتتىڭ قۇقىقتارى مەن بوستاندىقتارىنا كەپىلدىك بەرە وتىرىپ، ق ر كونستيتۋتسياسى مۇنداي شەكتەۋدىڭ جول بەرىلەتىن شەكتەرىن بەلگىلەي وتىرىپ، ولاردى شەكتەۋ مۇمكىندىگىن جوققا شىعارمايدى. ادامنىڭ قۇقىقتارى مەن بوستاندىقتارىن جانە حالىقتىڭ دەنساۋلىعىن قورعاۋ ماقساتىندا عانا قۇقىقتار مەن بوستاندىقتار شەكتەلۋى مۇمكىن (كونستيتۋتسيانىڭ 39-بابىنىڭ 1-تارماعى)»، - دەلىنگەن مينيسترلىك حابارلاماسىندا.