ماۋلەن اشىمبايەۆ ساۋد ارابياسىنىڭ ەلشىسىمەن كەزدەستى

نۇر-سۇلتان. قازاقپارات - سەنات ءتوراعاسى ماۋلەن اشىمبايەۆ ساۋد ارابياسىنىڭ قازاقستانداعى توتەنشە جانە وكىلەتتى ەلشىسى ابدۋلازيز بەن ابدۋللا ءال-داۋدتى قابىلدادى، دەپ حابارلايدى قازاقپارات.

تاراپتار كەزدەسۋ بارىسىندا ەكى ەلدىڭ ىنتىماقتاستىعى مەن پارلامەنتارالىق بايلانىستار بويىنشا ءوزارا ءىس-قيمىلى ماسەلەلەرىن تالقىلادى.

سەنات سپيكەرى ساۋد ارابياسى قازاقستاننىڭ تاياۋ شىعىستاعى ماڭىزدى سەرىكتەسىنىڭ ءبىرى ەكەنىن ايتتى.

«قازاقستاننىڭ تۇڭعىش پرەزيدەنتى - ەلباسى نۇرسۇلتان نازاربايەۆتىڭ كۇش-جىگەرىنىڭ ارقاسىندا ءبىزدىڭ ەلدەرىمىز اراسىندا ءوزارا قۇرمەت پەن سەنىمگە نەگىزدەلگەن ساۋدا-ەكونوميكالىق، مادەني جانە ساياسي بايلانىستار قالىپتاستى. قازىرگى تاڭدا مەملەكەت باسشىسى قازاقستان پەن ساۋد ارابياسىنىڭ اراسىنداعى كوپ قىرلى ىنتىماقتاستىقتى ودان ءارى نىعايتۋعا باسا نازار اۋدارىپ وتىر»، - دەدى ماۋلەن اشىمبايەۆ.

پالاتا ءتوراعاسى ءوزارا پارلامەنتارالىق ديالوگتى ودان ءارى دامىتۋعا دا بارلىق مۇمكىندىكتەر بار ەكەنىنە نازار اۋداردى. ول سونداي-اق قازاقستاندا وتكىزىلىپ كەلە جاتقان الەمدىك جانە ءداستۇرلى دىندەر ليدەرلەرىنىڭ سەزىنە ساۋد ارابياسىنىڭ وكىلدەرى بەلسەندى قاتىسقانى ءۇشىن جۇزدەسۋشىگە العىس ايتتى جانە پاندەميادان كەيىنگى كەزەڭدە مەملەكەتارالىق ىنتىماقتاستىققا قارقىن بەرۋ قاجەتتىگىن اتاپ ءوتتى.

«ءبىزدىڭ ەلدەرىمىزدى تاريحي، رۋحاني جانە مادەني تىعىز بايلانىستار جاقىنداستىرادى. ساۋد ارابياسىنىڭ ەكونوميكالىق دامۋى ءبىزدىڭ كوز الدىمىزدا. ەكونوميكانى ءارتاراپتاندىرۋعا، دەنساۋلىق ساقتاۋدى، ءبىلىم بەرۋدى، ينفراقۇرىلىمدى جانە ءتۋريزمدى دامىتۋعا باعىتتالعان «Saudi vision 2030» باعدارلاماسىن جەكە اتاپ وتكىم كەلەدى. ءبىز ۇقساس ماسەلەلەردى شەشىپ كەلەمىز. ءبىزدىڭ ەلدەرىمىزدەگى ەكونوميكالىق رەفورمالاردىڭ كوپتەگەن اسپەكتىلەرى مەن باعىتتارى دا ۇقسايدى، ويتكەنى ونىڭ باستى ماقساتى - ءبىزدىڭ مەملەكەتىمىزدەگى حالىقتاردىڭ ءال-اۋقاتىن ارتتىرۋ بولىپ تابىلادى»، - دەدى ماۋلەن اشىمبايەۆ.

سونىمەن قاتار سەنات ءتوراعاسى «G-20» ۇيىمىنا تابىستى ءتوراعالىق ەتۋىنە وراي ساۋد ارابياسىنىڭ ۇكىمەتىنە قۇتتىقتاۋىن جەتكىزدى.