پرەزيدەنت الاش قايراتكەرلەرىنە ارنالعان ەسكەرتكىشتىڭ اشىلۋىنا قاتىستى

نۇر-سۇلتان. قازاقپارات - پرەزيدەنت ءاليحان بوكەيحان، احمەت بايتۇرسىن ۇلى جانە ءمىرجاقىپ دۋلات ۇلى سىندى ۇلتىمىزدىڭ ۇلى تۇلعالارىنا ارنالعان ەسكەرتكىشتىڭ سالتاناتتى اشىلۋ راسىمىنە قاتىستى، دەپ حابارلايدى اقوردا.

ەسكەرتكىشتى اشقان قاسىم-جومارت توقايەۆ الاش قايراتكەرلەرىنىڭ مەموريالىنا گۇل شوعىن قويىپ، سالتاناتتى شاراعا قاتىسۋشىلاردىڭ الدىندا ءسوز سويلەدى.

پرەزيدەنت الاش ارىستارىنا ارنالعان ەسكەرتكىشتىڭ تاۋەلسىزدىگىمىزدىڭ 30 جىلدىعى مەن ەلوردا كۇنىنە وراي اشىلۋىنىڭ سيمۆولدىق ءمانى زور ەكەنىن اتاپ ءوتتى.

«ءاليحان - الاشوردا ۇكىمەتىن باسقارعان مەملەكەت قايراتكەرى. احمەت - حالقىمىزدى ءبىلىم مەن عىلىمعا جەتەلەپ، رۋحاني ۇستاز بولعان ايگىلى اعارتۋشى. ءمىرجاقىپ - ۇلت بىرلىگى ۇرانىنا اينالعان «ويان قازاق» پەن تۇڭعىش قازاق رومانىنىڭ اۆتورى، كورنەكتى قالامگەر. ءۇش قايراتكەر دە - بىرەگەي تاريحي تۇلعالار. بۇل ەسكەرتكىش - بارشا الاش ارداقتىلارىنا دەگەن قۇرمەتىمىزدىڭ كورىنىسى»، - دەدى قاسىم-جومارت توقايەۆ.

مەملەكەت باسشىسى «الاش» ءسوزىنىڭ قاستەرلى ۇعىم ەكەنىن اتاپ ءوتىپ، الاش قايراتكەرلەرىنىڭ حالىقتىڭ رۋحىن وياتۋ جولىنداعى قاجىرلى ەڭبەگىنە توقتالدى. «الاش» ءسوزى - حالقىمىز ءۇشىن قاشاندا قاسيەتتى ۇعىم.

وتكەن عاسىردىڭ باسىندا ۇلتىمىزدىڭ باس كوتەرەر ازاماتتارى الاش يدەياسىنىڭ توڭىرەگىنە بىرىكتى. ولار ەلىنىڭ ازاتتىعى مەن وركەندەۋى جولىندا قىزمەت ەتتى. حالىقتىڭ رۋحىن وياتىپ، ساناسىنا سىلكىنىس اكەلدى. جەرىمىزدىڭ تۇتاستىعىنىڭ ساقتالۋىنا ىقپال ەتتى. ءتول ادەبيەتىمىز بەن مادەنيەتىمىزدى بۇرىن-سوڭدى بولماعان دەڭگەيگە كوتەردى. وركەنيەتتى زيالىلىقتىڭ نەگىزىن قالادى. الاش ارىستارى زاماننىڭ سىن-قاتەرىنە قاراماي، قازاق ەلىنىڭ مەملەكەتشىلدىك يدەياسىن جاڭعىرتتى، - دەدى پرەزيدەنت.

قاسىم-جومارت توقايەۆ تاۋەلسىزدىكتىڭ ارقاسىندا ۇزاق جىلدار بويى حالىق جاۋى اتانىپ، قۋعىن- سۇرگىنگە ۇشىراعان الاش ارىستارىنىڭ ەڭبەكتەرى لايىقتى باعاسىن الىپ، ولاردىڭ ەسىمدەرى قايتا جاڭعىرىپ جاتقانىنا توقتالدى.

«وكىنىشكە قاراي، تۇگەلگە جۋىعى حالىق جاۋى اتانىپ، قۋعىن-سۇرگىن قۇربانى بولدى. ەڭبەكتەرى جويىلدى، ۇزاق جىلدار بويى ولاردىڭ اتىن اتاۋعا تىيىم سالىندى. ءبىراق، ۇلتىمىز ۇلى پەرزەنتتەرىنىڭ ەسىمىن ساناسىنان وشىرمەي، جادىندا ساقتاي ءبىلدى. تاۋەلسىزدىك جىلدارىندا الاش يدەياسى مەن الاش مۇراسى تۇبەگەيلى قايتا قارالدى. وسىدان بىرنەشە جىل بۇرىن «الاش» اۆتونومياسىنىڭ 100 جىلدىعىن اتاپ وتتىك. بيىل ءاليحان بوكەيحاننىڭ 155 -جىلدىعى تاۋەلسىزدىك مەرەكەسى اياسىندا ءوتىپ جاتىر. ءبىز الاش ارىستارىنىڭ ەسىمىن جاڭعىرتىپ، تاريحي رولىنە باعا بەرۋدى قولعا الدىق. مەنىڭ جارلىعىممەن ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيا قۇرىلدى»، - دەدى مەملەكەت باسشىسى.

پرەزيدەنت ءوز سوزىندە الاش قايراتكەرلەرىنىڭ ەڭبەكتەرى الاش تانۋ عىلىمىنىڭ اياسىندا جان-جاقتى زەرتتەلۋ قاجەتتىگىنە نازار اۋداردى.

«الاش تانۋ عىلىمى ارىستارىمىزدىڭ ەڭبەكتەرىن بارىنشا قامتۋى كەرەك. جىل وتكەن سايىن الاشتىڭ ابىرويى اسقاقتاپ، بەدەلى بيىكتەي بەرەدى. ولاردىڭ اتقارعان ءىسى ەشقاشان ماڭىزىن جوعالتپايدى. سەبەبى، ۇلت مۇددەسى، ەل قامى دەگەن ۇعىمدار - ماڭگى قۇندىلىقتار»، - دەدى قاسىم-جومارت توقايەۆ.

جيىن سوڭىندا مەملەكەت باسشىسى الاش قايراتكەرلەرىنىڭ دەربەس مەملەكەت بولىپ، جەر جۇزىمەن تەرەزەسى تەڭ قاتىناس ورناتۋ جونىندەگى ارمان-ماقساتى جۇزەگە اسقانىن اتاپ ءوتىپ، ەلىمىز بۇگىندە الەم قاۋىمداستىعىنىڭ بەلدى مۇشەسىنە اينالعانىن ايتتى.