فۋتبولدان قازاقستان بىرىنشىلىگى: «توبىل» قايتادان كوش باسىنا شىقتى
كەشەگى العاشقى كەزدەسۋدە تالدىقورعاندا جەرگىلىكتى «جەتىسۋ» ءوز الاڭىندا پەتروپاۆلدىڭ «قىزىلجار» كومانداسىن قابىلدادى. اتالعان ويىندا 0:0 ەسەبى تىركەلدى. تالدىقورعاندىق كلۋب ءبىر ۇپاي عانا ولجالاپ، تۋرنير كەستەسىندە سوڭعى ورىندا تۇر. تاعى ءبىر كەزدەسۋ تۇركىستاندا «تۇران» مەن قوستانايدىڭ «توبىل» كوماندالارى اراسىندا ءوتتى.
ماتچ الاڭ يەلەرى ءۇشىن ءساتتى باستالعان ەدى. ءبىرىنشى كەزەڭنىڭ 16-مينۋتىندا تۇركىستاندىق تەمىرلان ءامىروۆ مەرگەندىك تانىتسا، 33-مينۋتتا ونىڭ كوماندالاس ارىپتەسى ولجاس كەرىمجانوۆ ءوزىنىڭ قاقپاسىنا گول سوعىپ الدى. ال 56-مينۋتتا قوستانايلىق كلۋبتان توني سيلۆا پەنالتيدى مۇلتىكسىز ورىنداسا، 76-مينۋتتا تەمىرلان ءامىروۆ تارازى باسىن تەڭەستىردى.
ودان كەيىن «توبىل» ساپىنان سەرگەي مالىي - 84، ەلگۋدجا لوبجانيدزە 87-مينۋتتاردا گول سوعىپ، قورىتىندى ەسەپتى بەلگىلەدى. ويىندا قوستانايلىق كلۋب 4:2 ەسەبىمەن جەڭىپ، تۋرنير كەستەسىندە كوش باسىنا قايتا شىقتى.
ەكىنشى ويىن كۇنىن قىزىلوردادا «قايسار» مەن شىمكەنتتىڭ «ورداباسى» كلۋبتارى تۇيىندەدى.
كەزدەسۋ بارىسىندا ماقسات بايجانوۆ 42-مينۋتتا قارسىلاستار قاقپاشىسىن قاپى قالدىردى.
وسىلايشا الاڭ يەلەرى قارسىلاسىن 1:0 ەسەبىمەن تىزە بۇكتىردى.
ايتا كەتسەك، اتالعان تۋردا ءۇش ويىن وتكىزىلىپ، «قايرات» «اتىراۋدى» 5:0، «استانا» «شاحتەردى» 4:3، «اقتوبە» «اقجايىقتى» 2:1 ەسەبىمەن جەڭدى. اتالعان تۋردى 4- شىلدەدە ساعات 19.00 دە «تاراز» بەن «كاسپي» (اقتاۋ) كەزدەسۋى تۇيىندەيدى.
