قاسىم-جومارت توقايەۆ ەلباسىنا ورناتىلعان ەسكەرتكىشتىڭ اشىلۋ راسىمىنە قاتىستى
ەسكەرتكىش ەلوردادا ءاليحان بوكەيحان مەن كەرەي، جانىبەك حاندار كوشەلەرىنىڭ قيىلىسىنداعى جۋىردا اشىلعان ساياباقتىڭ اۋماعىندا ورنالاسقان. ەسكەرتكىشتى اشقان پرەزيدەنت جيىنعا قاتىسۋشىلاردىڭ الدىندا ءسوز سويلەدى.
قاسىم-جومارت توقايەۆ جىل سايىن ەلوردا كۇنى قارساڭىندا قالانىڭ رۋحاني كەلبەتىن كوركەيتە تۇسەتىن جاڭا كەشەندەر اشىلاتىنىن اتاپ ءوتىپ، بىلتىر وسى يگى داستۇرمەن ەلباسى كىتاپحاناسى مۋزەيىنىڭ بوي كوتەرگەنىن جانە ونىڭ الدىنان اشىلعان ساياباق قالا تۇرعىندارى ءۇشىن جايلى دەمالىس ورنىنا اينالعانىن ايتتى.
- سوندىقتان بۇگىن ءبىز ەلباسى نۇرسۇلتان ءابىش ۇلى نازاربايەۆتىڭ قۇرمەتىنە ورناتىلعان تاريحي ەسكەرتكىشتى ءدال وسى جەردە اشىپ وتىرمىز. مەرەيلى جىلدا مۇنداي ساۋلەت تۋىندىسىنىڭ بوي كوتەرۋى - زاڭدى قۇبىلىس، - دەدى پرەزيدەنت.
قاسىم-جومارت توقايەۆ مەملەكەتتىلىكتىڭ نەگىزىن قالىپتاستىرۋعا، ەلىمىزدىڭ شەكارا شەبىن ايقىنداۋعا، حالىقارالىق كەلىسىمدەرمەن ءبىرجولا شەگەندەۋگە، جاھاندىق داعدارىستى ەڭسەرۋگە، حالىقارالىق بەدەلىن نىعايتۋعا نۇرسۇلتان نازاربايەۆتىڭ زور ۇلەس قوسقانىن اتاپ ءوتتى.
- ەلباسى كوپتەگەن حالىقارالىق باستاما كوتەرىپ، مەملەكەتىمىزدى جاھاندىق ساياساتتىڭ تورىنە شىعاردى. ونى بۇكىل الەم ۇلى ساياساتكەر، تاريحي تۇلعا رەتىندە بىلەدى. قاسيەتتى وتانىمىز - قازاقستاننىڭ بۇگىنگى جانە ەرتەڭگى ۇرپاعى وسىنداي ۇلت پەرزەنتىنە قاراپ، بوي تۇزەيدى، - دەدى پرەزيدەنت.
مەملەكەت باسشىسى تاۋەلسىزدىكتىڭ العاشقى جىلدارىنداعى اسا قاۋىپتى سىن-قاتەرلەر مەن جاپپاي قيراعان قيىن-قىستاۋ كەزەڭدە ەلباسى حالىقتىڭ وزىنە دەگەن سەنىمىن ۇيالاتىپ، ەرتەڭگى كۇنگە دەگەن ءۇمىت وتىن جاعا بىلگەنىن اتاپ ءوتتى.
- حالىقتى اۋقىمدى وزگەرىستەرگە تالماي جەتەلەگەن تۇڭعىش پرەزيدەنت اسا جاۋاپتى وزگەرىستەردىڭ، اۋقىمدى رەفورمالاردىڭ ناقتى ىسكە اسىرۋشىسىنا جانە تاۋەلسىزدىگىمىزدىڭ سيمۆولىنا اينالدى، - دەدى مەملەكەت باسشىسى.
بۇدان بولەك قاسىم-جومارت توقايەۆ مەملەكەتىمىزدىڭ ساياسي جانە ەكونوميكالىق جەتىستىكتەرىنىڭ نەگىزىندە ەلباسىنىڭ بىرەگەي باستامالارى جاتقانىنا نازار اۋداردى.
- ەلباسىنىڭ ستراتەگيالىق باعىتى - ەلىمىزدى ودان ءارى جاڭعىرتۋعا نەگىزدەلگەن ساياساتىمىزدىڭ بەرىك نەگىزى. قۇبىلمالى الەمدە رەفورمالاردى تابىستى جۇزەگە اسىرۋ ءۇشىن بىزگە ايقىن يدەولوگيالىق باعدار، ورنىقتى ءارى قۇندى نەگىز قاجەت، - دەدى پرەزيدەنت.
وسى رەتتە قاسىم-جومارت توقايەۆ ۇلت مۇددەسىنە قىزمەت ەتكەن كورنەكتى قايراتكەرلەرگە ەسكەرتكىش قويۋ - تاريحي تۇلعالارىمىزعا شىنايى قۇرمەت كورسەتۋ دەگەن پىكىر ءبىلدىردى.
وسىعان بايلانىستى پرەزيدەنت جاقىن كۇندەرى الاشتىڭ ءۇش ارىسى - ءاليحان بوكەيحانعا، احمەت بايتۇرسىن ۇلىنا، ءمىرجاقىپ دۋلات ۇلىنا، عۇلاما عالىم قانىش ساتبايەۆقا جانە باسقا دا كورنەكتى تۇلعالارعا ارنالعان ەسكەرتكىشتەر اشىلاتىنىن ايتتى.
جيىن سوڭىندا مەملەكەت باسشىسى قازاقستان حالقىن كەلە جاتقان ەلوردا كۇنىمەن قۇتتىقتادى.
