نۇر-سۇلتان قالاسىندا قانىش ساتبايەۆقا ەسكەرتكىش ورناتىلدى
ەسكەرتكىشتىڭ اشىلۋ راسىمىنە قازاقستان رەسپۋبليكاسىنىڭ مەملەكەتتىك حاتشىسى قىرىمبەك كوشەربايەۆ قاتىستى، دەپ حابارلايدى اقوردا.
مەملەكەتتىك حاتشى ءوز سوزىندە قانىش ساتبايەۆتىڭ الاش ارداقتىلارىمەن مۇراتتاس بولعانىن ايتتى. ۇلتقا قىزمەت ەتۋدە اعا بۋىندى ۇلگى ەتكەنىن، ەل ىسىندە بارلىق سالاعا بەلسەنە ارالاسقانىن، قازاقستان عىلىمىنىڭ وركەندەۋىنە ەلەۋلى ۇلەس قوسقانىن اتاپ ءوتتى.
- «ءوز ەلىنىڭ قارا تاسىن ماقتان ەتە الماعان، وزگە جەردىڭ التىنىن دا ماقتاپ جارىتپاق ەمەس» دەگەن ەكەن قانىش ساتبايەۆ. وسى ويعا سالساق، حالقى قانىشىن قال- قادىرىنشە ارداقتاپ، ەسىمىن ۇلىقتاپ كەلەدى. عۇلاما عالىمنىڭ اتىنا بۇعان دەيىن قالا، كوشە اتاۋلارىنىڭ بەرىلۋى - سونىڭ ايعاعى. كەشەگى قازاق تاۋ-كەن-مەتاللۋرگيا ينستيتۋتىنىڭ بۇگىندە ق. ي. ساتبايەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتى اتالۋى دا زور مارتەبە. بۇل - ۇلتىنىڭ ۇلى پەرزەنتىنە كورسەتكەن قۇرمەتىنىڭ ءبىر پاراسى عانا، - دەدى قىرىمبەك كوشەربايەۆ.
جوبانى پاۆلودار وبلىسىنىڭ اكىمدىگى مەن عالىمنىڭ جەرلەستەرى - باياناۋىل جۇرتشىلىعى جانە ءمۇسىنشى اسقار نارتوۆ جۇزەگە اسىردى. ءىس-شاراعا پرەمەر-ءمينيستردىڭ ورىنباسارى ەرالى توعجانوۆ، ق ر پرەزيدەنتىنىڭ اكىمشىلىگى باسشىسىنىڭ ءبىرىنشى ورىنباسارى داۋرەن ابايەۆ، ءبىلىم جانە عىلىم ءمينيسترى اسحات ايماعامبەتوۆ، ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ، نۇر-سۇلتان قالاسىنىڭ اكىمى التاي كولگىنوۆ، پاۆلودار وبلىسىنىڭ اكىمى ءابىلقايىر سقاقوۆ، قانىش ساتبايەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتىنىڭ رەكتورى مەيرام بەگەنتايەۆ جانە باسقا دا قوعام وكىلدەرى قاتىستى.
