پرەزيدەنت مەملەكەتتىك تۋ كوتەرۋ راسىمىنە قاتىستى

نۇر-سۇلتان. قازاقپارات - قازاقستان پرەزيدەنتى ەلوردا كۇنىنە ارنالعان مەرەكەلىك ءىس-شارانى ءداستۇرلى تۇردە اشاتىن مەملەكەتتىك تۋ كوتەرۋ سالتاناتتى راسىمىنە قاتىستى، دەپ حابارلايدى قازاقپارات اقورداعا سىلتەمە جاساپ.

- بيىل قاستەرلى تاۋەلسىزدىگىمىزگە - 30 جىل. سوندىقتان بۇل ءراسىمنىڭ تاريحي ءمان-ماڭىزى ايرىقشا. كوك تۋىمىز - تاۋەلسىز قازاقستاننىڭ ەڭ باستى ءرامىزى. حالقىمىز ءۇشىن ازاتتىقتان اسىل، بايراقتان بيىك قۇندىلىق جوق. قازاقتىڭ تاريحى «تۋىڭ جىعىلماسىن!» دەگەن ءبىر اۋىز تىلەككە سىيىپ تۇر. بابالارىمىز قاشاندا تۋىن بيىك ۇستاعان. ەلدىگى سىنعا تۇسكەن ساتتە بايراق استىنا بىرىگىپ، تۇتاستىعىن تانىتقان. ەرلىك پەن بىرلىكتىڭ ءداستۇرى ۇرپاقتان ۇرپاققا جالعاسىپ، تاۋەلسىزدىك داۋىرىنە ۇلاستى. ەگەمەن ەلدىڭ كوك بايراعى - مىزعىماس مەملەكەتتىگىمىزدىڭ بەلگىسى، - دەدى پرەزيدەنت.

قاسىم-جومارت توقايەۆ جوعارى اسكەري وقۋ ورنىنىڭ تۇلەكتەرىنىڭ الدىندا سويلەگەن سوزىندە مەملەكەتتىك تۋىمىز بەن ەلىمىزدىڭ باس قالاسى ۇلت بىرلىگىنىڭ جارقىن سيمۆولى ەكەنىن ايتتى.

- ەلوردامىز - قازىرگى قازاقستاننىڭ بەتكە ۇستار باس قالاسى. ەلىمىزدىڭ ورتالىق مەگاپوليسى بولاشاققا جول اشاتىن ورداعا، جالپى ۇلت بولىپ ۇيىسۋدىڭ جانە شىنايى پاتريوتيزمنىڭ ۇلگىسىنە اينالدى. تۇڭعىش پرەزيدەنت - ەلباسى مەن ميلليونداعان وتانداسىمىزدىڭ قاجىرلى ەڭبەگىنىڭ ارقاسىندا بوي كوتەرگەن قالا - حالقىمىزدىڭ ماقتانىشى. وتانىمىزدىڭ جۇرەگى ءدال وسى جەردە سوعىپ تۇر. اسا ماڭىزدى شەشىمدەردىڭ ءبارى وسى جەردە قابىلدانىپ، سالماقتى وي-پىكىرلەر ورتاعا سالىنىپ، بىرەگەي جوبالار جۇزەگە اسىرىلىپ جاتىر، - دەدى مەملەكەت باسشىسى.

قازاقستان پرەزيدەنتىنىڭ پىكىرىنشە، ەلوردا دارىندى، جىگەرلى وتانداستارىمىزدىڭ، سونداي-اق، وزگە مەملەكەتتەردىڭ كوپتەگەن ازاماتتارىنىڭ باس قوساتىن ورتالىعىنا اينالدى.

قاسىم-جومارت توقايەۆ ۇلى دالا كىندىگىندە قاسيەتتى تۋدى بيىكتە جەلبىرەتە وتىرىپ، ەركىندىك پەن ەگەمەندىك مۇراتىنا بەيىلدى ەكەنىمىزدى اتاپ ءوتتى.

- ەلوردا كۇنى ادامداردى قولداپ، شابىتتاندىرۋ، بىرلىكتىڭ كۇشىن، ءوزارا كومەكتىڭ ماڭىزدىلىعى مەن ءار ازاماتتىڭ ورتاق ىسكە قوسقان ۇلەسىنىڭ قۇندىلىعىن دارىپتەۋ ءۇشىن اسا ماڭىزدى. ەلوردا تۇرعىندارى ەكپە سالۋ ناۋقانى مەن شەكتەۋ شارالارىن ساقتاۋ كەزىندە الدىڭعى قاتاردا بولۋى قاجەت. جاپپاي ۆاكتسينالاۋ قالىپتى تىنىس- تىرشىلىككە قايتا ورالۋدىڭ، ادامداردىڭ دەنساۋلىعىن ساقتاۋدىڭ جالعىز جولى ەكەنىن دۇرىس ءتۇسىنۋىمىز كەرەك. «ءبىز بىرگەمىز» ۇرانى اسا قاتەرلى ىندەتكە قارسى كۇرەستەگى جەڭىسىمىزدىڭ بويتۇمارى بولاتىنىنا سەنىمدىمىن، - دەدى قاسىم-جومارت توقايەۆ.

ءراسىم بارىسىندا جوعارى اسكەري وقۋ ورنىنىڭ 12 ۇزدىك تۇلەگى قازاقستان پرەزيدەنتى - قازاقستان رەسپۋبليكاسىنىڭ جوعارعى باس قولباسشىسىنىڭ قولىنان وفيتسەر پوگونىن الدى.

- وقۋلارىڭىزدىڭ ءساتتى اياقتالعانى قۇتتى بولسىن، جاس وفيتسەرلەر! وفيتسەرلىك شەن - بۇل، ەڭ ءبىرىنشى، وتان الدىنداعى زور جاۋاپكەرشىلىك. بولاشاقتا كوماندير اتانىپ، جاس ساربازدارعا ءتالىم بەرەسىزدەر. سوندىقتان وتانشىل، باتىل جانە ايبىندى بولىپ، ۇلگى كورسەتۋ اسا ماڭىزدى. مۇلتىكسىز قىزمەت ەتۋ - بارىڭىزگە ورتاق مىندەت. انتقا ادال بولۋ، تاۋەلسىز ەلىمىزدى قورعاۋ - قاستەرلى پارىز، - دەدى مەملەكەت باسشىسى.

جيىن سوڭىندا قاسىم-جومارت توقايەۆ بارلىق قاتىسۋشىلاردى كەلە جاتقان ەلوردا كۇنىمەن قۇتتىقتاپ، وتانىمىزدىڭ ءوسىپ-وركەندەي بەرۋىنە تىلەكتەستىك ءبىلدىردى.