ەلوردادا بايسەيىتوۆا مەن يمانوۆ كوشەلەرى جارتىلاي جابىلادى

نۇر- سۇلتان. قازاقپارات - ەلوردانىڭ جول قوزعالىسى قاۋىپسىزدىگىن قامتاماسىز ەتۋ ماقساتىندا كۇلاش بايسەيىتوۆا كوشەسى مەن يمانوۆ كوشەسىندەگى كوپىردىڭ جول توسەمىن ورتاشا جوندەۋ جۇمىستارى باستالادى، دەپ حابارلادى قالا اكىمدىگىنىڭ رەسمي سايتى.

بۇل باعىتتاعى جۇمىستار كولىك جانە جول- كولىك ينفراقۇرىلىمىن دامىتۋ باسقارماسى نۇر- سۇلتان قالاسى پوليتسيا دەپارتامەنتىنىڭ اكىمشىلىك پوليتسيا باسقارماسىنىڭ كەلىسىمىمەن جۇزەگە اسىرىلادى. 3- جانە 4 -شىلدە كۇندەرى جوندەۋ جۇمىستارىنىڭ جۇرگىزىلۋىنە بايلانىستى يمانوۆ كوشەسىندەگى كوپىر، ياعني ق. مۇڭايتپاسوۆ كوشەسىنەن ا. يانۋشكيەۆيچ كوشەسىنە دەيىنگى ارالىق جارتىلاي جابىلاتىن بولادى. اتاپ ايتقاندا، جول توسەمىنىڭ بەتكى قاباتىن توسەۋ جۇمىستارى جۇرگىزىلەتىن بولادى.

سونىمەن قاتار، بيىل 3-9 شىلدە ارالىعىندا كۇلاش بايسەيىتوۆا كوشەسىندە كونستيتۋتسيا كوشەسىنەن قاراساي باتىر كوشەسىنە دەيىنگى بولىگى ءىشىنارا جابىلادى.

«قالا جولدارىندا كەپتەلىس تۋدىرماس ءۇشىن ەلوردا تۇرعىندارى مەن قوناقتارى قوزعالىس باعىتىن الدىن الا جوسپارلاۋى قاجەت. كەلتىرىلگەن قولايسىزدىقتار ءۇشىن كەشىرىم سۇرايمىز جانە جوندەۋ جۇمىستارىنىڭ جۇرگىزىلۋىنە تۇسىنىستىكپەن قاراۋدى سۇرايمىز»، - دەلىنگەن كولىك باسقارماسىنىڭ حابارلاماسىندا.