قاسىم-جومارت توقايەۆ وليمپيادا ويىندارىنا قاتىساتىن قازاقستان قۇراماسىمەن كەزدەستى - فوتو
قازاقستان قۇراما كومانداسىنىڭ نەگىزگى بولىگى كەزدەسۋگە الماتى وبلىسىنداعى «اقبۇلاق» وليمپيادالىق ورتالىعىنان تەلەكوپىر ارقىلى قاتىستى. وندا سپورتشىلار توكيوعا اتتانار الدىنداعى سوڭعى جاتتىعۋ جيىندارىن وتكىزىپ جاتىر.
پرەزيدەنت وليمپياداعا باراتىن سپورتشىلاردىڭ الدىندا سويلەگەن سوزىندە الەمنىڭ باستى سپورت باسەكەسىندە ەل نامىسىن قورعاۋ مارتەبەلى مىندەت، ۇلكەن ابىروي، زور جاۋاپكەرشىلىك ەكەنىن ايتتى.
مەملەكەت باسشىسى تاۋەلسىزدىك جىلدارىندا قازاقستاننان وليمپيادانىڭ 16 جەڭىمپازى، 71 جۇلدەگەرى شىققانىن، جۇزدەن استام ءىرى سپورت كەشەنى، ونىڭ ىشىندە,16 حالىقارالىق دەڭگەيدەگى نىساندار بوي كوتەرگەنىن اتاپ ءوتتى.
قاسىم-جومارت توقايەۆ اسا كۇردەلى كەزەڭدە توكيودا جاعىلاتىن وليمپيادا الاۋى بۇكىل ادامزات ءۇشىن جاھاندىق ىندەتپەن كۇرەستىڭ سيمۆولى بولاتىنىن ايتتى. پرەزيدەنت الەمنىڭ تۇگەلگە جۋىق ەلىندە ۇزاققا سوزىلعان لوكداۋننىڭ قالىپتى تىنىس- تىرشىلىككە اۋىر سوققى جاساعانىنا توقتالدى.
- سىزدەر حالىقارالىق دەڭگەيدەگى وزدەرىڭىزدىڭ كوشباسشىلىق ورىندارىڭىزدى نىعايتۋ ءۇشىن ناعىز چەمپيونعا ءتان مىنەز كورسەتىپ، وليمپيادا ليتسەنزياسىن يەلەندىڭىزدەر. وسىنداي قيىن-قىستاۋ جاعدايدا سىزدەر سپورتتىڭ ءوزىن-ءوزى شەكتەيتىن قاتاڭ رەجيمىن ساقتاپ، وزگەلەرگە ۇلگى كورسەتتىڭىزدەر، - دەدى قاسىم-جومارت توقايەۆ.
پرەزيدەنت قازاقستاندىقتاردىڭ وليمپيادا ويىندارى بارىسىندا ءبىزدىڭ سپورتشىلارعا كورسەتەتىن كۇشتى قولداۋى ولارعا قوسىمشا رۋح بەرەتىنىنە سەنىم ءبىلدىردى.
- تاۋەلسىزدىگىمىزدىڭ 30 جىلدىعىندا وليمپيادا تۇعىرىنا كوتەرىلۋ سىزدەردىڭ عانا جەتىستىكتەرىڭىز ەمەس، بۇكىل ۇلتىمىزدىڭ ابىرويى. وليمپيادا شىڭى مىڭداعان جاستى سپورتپەن شۇعىلدانۋعا، سالاۋاتتى ءومىر سالتىن ۇستانۋعا جانە كوزدەگەن ماقساتتارىنا جەتۋگە شابىتتاندىرادى، - دەدى قاسىم- جومارت توقايەۆ.
مەملەكەت باسشىسى ءوز سوزىندە بۇقارالىق جانە بالالار مەن جاسوسپىرىمدەر سپورتىن دامىتۋعا باسىمدىق بەرىلەتىنىن اتاپ ءوتتى. - بۇقارالىق سپورتتى دامىتۋ ارقىلى ءبىز ۇلتىمىزدىڭ دەنساۋلىعىن جاقسارتامىز جانە بۇكىل ەلىمىز ماقتان تۇتاتىن وليمپيادا جەڭىمپازدارىنىڭ - سپورت جۇلدىزدارىنىڭ جاڭا بۋىنىن تاربيەلەپ شىعارامىز. مۇنداي ساياسات سپورت سەكسيالارى مەن اۋلالىق كلۋبتاردىڭ دامۋىنا تىڭ سەرپىن بەرەدى. سونداي-اق بالالار جاتتىقتىرۋشىلارىن ىنتالاندىرۋعا ىقپال ەتىپ، دارىندى اتلەتتەردىڭ جاڭا شوعىرىن ايقىنداۋعا سەپتىگىن تيگىزەدى، - دەدى پرەزيدەنت. قاسىم-جومارت توقايەۆ سپورتشىلارىمىزدىڭ توكيودا رەكوردتىق ناتيجەلەر كورسەتەتىنىنە، ەلىمىزدىڭ الەمدەگى جەتەكشى سپورت دەرجاۆالارىنىڭ اراسىنداعى بەدەلىن نىعايتاتىنىنا سەنىم ءبىلدىردى. پرەزيدەنتتىڭ ايتۋىنشا، اتلەتتەردىڭ ءاربىر جەڭىسىنىڭ ارتىندا، كوبىنەسە نازاردان، كامەرالاردان تىس قالاتىن، ولاردىڭ جاتتىقتىرۋشىلارىنىڭ قاجىرلى ەڭبەگى تۇر.
ءراسىم بارىسىندا قاسىم-جومارت توقايەۆ قازاقستان رەسپۋبليكاسىنىڭ مەملەكەتتىك تۋىن العاش رەت ەكى بىردەي تۋ ۇستاۋشىعا - جەڭىل اتلەتيكادان وليمپيادا چەمپيونى ولگا رىپاكوۆا مەن بوكستان الەم چەمپيوناتىنىڭ كۇمىس جۇلدەگەرى قامشىبەك قوڭقابايەۆقا تابىستادى.
ولگا رىپاكوۆا مەملەكەت باسشىسىنا جىلى قابىلداپ، ىزگى تىلەك بىلدىرگەنى ءۇشىن ۇلتتىق قۇرامانىڭ اتىنان العىس ايتتى.
- ءسىزدىڭ اق تىلەگىڭىز - بىزگە ەرەكشە كۇش- جىگەر بەرەدى. حالقىمىزدىڭ رياسىز ماحابباتىن سەزىنەمىز جانە وزىمىزگە جۇكتەلگەن جاۋاپكەرشىلىكتى تۇسىنەمىز. سوندىقتان وتانىمىزدىڭ ابىرويىن ارتتىرۋ ءۇشىن بار كۇشىمىزدى سالىپ، شەبەرلىگىمىزدى پاش ەتەمىز، - دەدى ولگا رىپاكوۆا. قامشىبەك قوڭقابايەۆ پرەزيدەنتكە وتانداستارىمىزدىڭ سەنىمىن اقتاۋ ءۇشىن قۇراما كوماندا بارىن سالاتىنىن جەتكىزدى.
- ءسىزدىڭ قولىڭىزدان ەلىمىزدىڭ تۋىن الۋ - ۇلكەن ابىروي، زور جاۋاپكەرشىلىك. وليمپياداعا قاتىسۋشى سپورتشىلار قاستەرلى سانايتىن وسى تۋدىڭ توكيو تورىندە ءجيى كوتەرىلىپ، ءانۇرانىمىزدىڭ شىرقالۋى ءۇشىن بارىمىزدى سالامىز، - دەدى بوكستان قازاقستان قۇراما كومانداسىنىڭ كاپيتانى.
