قازاقستان پرەزيدەنتى «ۇرپاق تەڭدىگى» اتتى جاھاندىق فورۋمدا بەينە ۇندەۋ جاسادى

نۇر-سۇلتان. قازاقپارات - قاسىم-جومارت توقايەۆ «ب ۇ ۇ - ايەلدەر» قۇرىلىمىنىڭ فرانسيا جانە مەكسيكا ۇكىمەتتەرىمەن بىرلەسىپ ۇيىمداستىرعان «ۇرپاق تەڭدىگى» اتتى جاھاندىق فورۋم قاتىسۋشىلارىنا بەينە ۇندەۋ جاسادى.

بۇل تۋرالى قازاقپارات اقوردانىڭ رەسمي سايتىنا سىلتەمە جاساپ حابارلايدى.

ۆيرتۋالدى فورماتتا وتكەن جيىن گەندەرلىك تەڭدىك سالاسىنداعى جاھاندىق كۇش-جىگەردى ۇيلەستىرۋگە ارنالعان. فورۋمنىڭ نەگىزگى ماقساتى - وسى پروتسەسكە تارتىلعان بارلىق قاتىسۋشىنىڭ ناقتى مىندەتتەمەلەرىنە نەگىزدەلگەن كوپجاقتى مەحانيزم قالىپتاستىرۋ.

مەملەكەت باسشىسى ءوز سوزىندە قازاقستان تاۋەلسىزدىك العاننان باستاپ 30 جىل بويى ايەلدەردى قولداۋعا باعىتتالعان ساليقالى ساياساتتى دايەكتى تۇردە جۇرگىزىپ كەلە جاتقانىن اتاپ ءوتتى.

- 2030-جىلعا دەيىنگى وتباسى جانە گەندەرلىك ساياسات تۇجىرىمداماسىن باستى نەگىزگە العان بەرىك قۇقىقتىق بازا قالىپتاستىردىق. وتكەن ايدا ادام قۇقىعىنا قاتىستى الداعى ۋاقىتتا اتقارىلاتىن شارالار تۋرالى جارلىققا قول قويدىم. ونىڭ نەگىزگى باعىتتارىنىڭ ءبىرى - گەندەرلىك تەڭدىكتى قامتاماسىز ەتۋ. گەندەرلىك ماسەلەنى شەشۋ - وڭىرلىك ولشەم بويىنشا ەلىمىزدىڭ سىرتقى ساياساتتاعى باسىمدىقتارىنىڭ ءبىرى، - دەدى قاسىم-جومارت توقايەۆ.

سونىمەن قاتار پرەزيدەنت قازاقستاننىڭ «گەندەرلىك زورلىق-زومبىلىققا قارسى ءىس-قيمىل كواليتسياسى» جانە «ەكونوميكالىق ادىلدىك پەن قۇقىق جونىندەگى ءىس-قيمىل كواليتسياسى» سياقتى ەكى سەرىكتەس بىرلەستىككە قوسىلاتىنىن مالىمدەدى.

بۇل مەملەكەتتىڭ ءبىرقاتار مىندەتتەمە قابىلداعانىن بىلدىرەدى.

اتاپ ايتقاندا ايەلدەر مەن قىزدارعا قاتىستى زورلىق-زومبىلىقتىڭ تارالۋى تۋرالى جالپى ۇلتتىق زەرتتەۋ جۇمىسىن قولعا الۋ جونىندە شەشىمىن ايتتى.

مەملەكەت باسشىسى گەندەرلىك تەڭدىك جانە زورلىق-زومبىلىقتىڭ الدىن الۋ بويىنشا وزىق تاجىريبەمەن ءبولىسۋ ءۇشىن ورتالىق ازيادا وڭىرلىك ءبىلىم پلاتفورماسىن قۇرۋ تۋرالى باستاما كوتەردى.

قاسىم-جومارت توقايەۆ ب ۇ ۇ مەن ەۋروپالىق وداقتىڭ ورتالىق ازيا مەن اۋعانستانعا ارنالعان «جارىق ساۋلەسى» وڭىرلىك باستاماسىنا ينۆەستيتسيا سالۋعا دايىن ەكەنىن اتاپ ءوتتى.

بۇدان بولەك پرەزيدەنت ايەل كاسىپكەرلەردى قولداۋ ءۇشىن ەلىمىزدىڭ بارلىق وڭىرىندە رەسۋرستىق ورتالىقتار قۇرۋ جوسپارى تۋرالى مالىمەت بەردى.

مەملەكەت باسشىسى زاڭنامالىق دەڭگەيدە قابىلدانىپ جاتقان شارالار تۋرالى ايتا كەلىپ، ايەلدەر ءۇشىن تىيىم سالىنعان ماماندىقتار ءتىزىمىن قايتا قاراۋعا، سونداي-اق، ايەلدەر مەن بالالاردى الەۋمەتتىك جانە قۇقىقتىق تۇرعىدان قولداۋدى كۇشەيتۋگە نيەتتى ەكەنىن جەتكىزدى.

قاسىم-جومارت توقايەۆ ءسوزىنىڭ سوڭىندا ايەلدەردىڭ تەڭدىگى مەن قاۋىپسىزدىگىن قورعاۋعا، ولاردىڭ قۇقىقتارى مەن مۇمكىندىكتەرىن كەڭەيتۋگە باعىتتالعان يگى ءىستى ەلىمىزدىڭ تولىق قولدايتىنىن ناقتىلادى.