ەگيپەت بارلىق سانيتارلىق شەكتەۋدى الىپ تاستادى

نۇر-سۇلتان. قازاقپارات - مىسىر ەلى قالىپتى تۇرمىسقا كوشتى. بۇگىننەن باستاپ ەلدە قاتاڭ شەكتەۋلەر الىندى. اتاپ ايتقاندا، بارلىق ويىن- ساۋىق مەكەمەلەرى جانە مۇراجايلار مەن تاريحي كەشەندەر اشىلادى.

وسىعان دەيىن ولارعا تەك شاعىن توپ كىرگىزىلەتىن، ال ەكسكۋرسياعا اي بۇرىن جازىلۋعا تۋرا كەلگەن. ەل بيلىگى كافە مەن مەيرامحانالار ماۋسىم ايىنىڭ باسىندا اشىلاتىنىن مالىمدەگەن ەدى. الايدا ەگيپەتتەگى ەپيداحۋال تۇراقتالماعاندىقتان بۇل مەكەمەلەر ءبىر مەزگىلدە جۇمىسىن باستاي العان جوق.

كاحرابا ايمان، ءدامحانالار جەلىسىنىڭ يەسى:

- ماۋسىمنىڭ باسىندا اشىلۋعا ءتيىس ەدىك. الايدا بۇل كۇندەرى كوروناۆيرۋستى جۇقتىرۋ كورسەتكىشى كۇرت ءوسىپ كەتتى. وعان قوسا ەلدە كوۆيدتىڭ جاڭا شتامدارى تاراي باستادى. مۇنىڭ ءبارى مەكەمەلەردىڭ اشىلۋىن قيىنداتىپ جىبەردى.

تەك مەملەكەتتىڭ قارجىلىق قولداۋىنا يە ەڭ تۇراقتى ورىندار جۇمىسىن باستادى. جەكەمەنشىك كومپانيالار ىندەت تولقىنىنىڭ باسىلۋىن كۇتتى. جۇمىسىن باستاعان ءدامحانالاردا كەلۋشىلەردىڭ سانى 70 پروتسەنتتەن اسپاۋى ءتيىس. الداعى كۇندەرى مەشىتتەر مەن شىركەۋلەر دە اشىلادى دەپ جوسپارلانىپ وتىر. وسىعان دەيىن عيباداتحانالارعا بارۋ قاتاڭ ەرەجەلەرمەن شەكتەلگەن ەدى، ال كەيبىرەۋى ايلاپ جابىق بولعان. الايدا وپپوزيتسيا ۇكىمەتتىڭ بۇل قادامىنا قارسى شىقتى.

اكرام گوماا، قوعام بەلسەندىسى:

- وسىدان ءبىر اپتا بۇرىن ۇكىمەت تامىز ايىندا ىندەتتىڭ جاڭا تولقىنى كەلەتىنىن ەسكەرتكەن. ال بىرنەشە كۇن وتىسىمەن بيلىك تولىعىمەن شەكتەۋلەردى الىپ تاستادى. بۇل دۇرىس پا؟ ءيا، بيزنەس تۇرالاپ قالدى، ءبىراق قازىر ەڭ الدىمەن اقشانى ەمەس، حالىق دەنساۋلىعىن ويلاۋ كەرەك.

قوعام بەلسەندىلەرى وسىنداي نەمقۇرايلىققا قارسى قول جيناي باستادى. ەگەر بيلىك قۇلاق اسپاسا، كەلەسى اپتادا نارازىلىق شارالارىن وتكىزەمىز. وسىنداي سىنعا جاۋاپ رەتىندە ەگيپەت دەپۋتاتتارى ەكى دەرەك كەلتىردى. ءبىرىنشىسى كوروناۆيرۋس جۇقتىرۋ كورسەتكىشى تومەندەگەن. ەكىنشىسى بىلتىرعى جىلدىڭ قارجىلىق ەسەبى. مەملەكەت قازىناسىنا قوماقتى سوما قۇياتىن تۋريزم تابىسى 2020 -جىلى 70 پروتسەنتكە ازايىپ كەتكەن.

ال ۇكىمەت جازعى ماۋسىمدا شيپاجايلاردى اشپاسا، بۇل كورسەتكىش 84 پروتسەنتكە جەتەر ەدى.

www.24.kz