پرەمەر-مينيستر: قىزمەت كورسەتۋ، ءبىلىم سالاسىن ۆاكسينالاۋ مىندەتتى

نۇر-سۇلتان. قازاقپارات - ۇكىمەت وتىرىسىندا پرەمەر-ءمينيسترى اسقار مامين اكىمدەرگە ۆاكسينالاۋ قارقىنىن ارتتىرۋدى تاپسىردى، دەپ حابارلايدى قازاقپارات ءتىشىسى.

«سانيتارلىق- ەپيدەميولوگيالىق احۋال وزگەرىپ بارادى. وڭىرلەردە ۆيرۋستى جۇقتىرعان ادامداردىڭ سانى وسۋدە. اۋرۋحانالارداعى ورىنداردىڭ جۇكتەمەلىگى 27 پايىز، ال جانساقتاۋ بولىمىندە 24 پايىزدى قۇراپ وتىر. ەلوردادان باسقا «قىزىل» ايماققا تاعى ءتورت ءوڭىر كىردى. «سارى» مەن «جاسىل» ايماقتا التى وڭىردەن بار. «قىزىل» ايماقتارداعى بارلىق وڭىردە شەكتەۋ شارالارى قولدانىلىپ، مونيتورينگ توپتارىنىڭ جۇمىسى كۇشەيتىلۋى ءتيىس»، - دەدى ۇكىمەت باسشىسى.

اسقار مامين وسى جايتتىڭ ءبارىن ەسكەرىپ، رەزەرۆتەگى ينفەكسيالىق ورىنداردىڭ دايىندىعىن پىسىقتاپ، ءدارى-دارمەك پەن مەديتسينالىق بۇيىمداردىڭ جەتكىلىكتى بولۋىن قامتاماسىز ەتۋدى تاپسىردى

«بۇگىنگى كۇنى ۆاكسينانىڭ I كومپونەنتىن 3,3 ميلليونعا جۋىق ادام سالدىردى. شامامەن 2 ميلليون ادام Ⅱ كومپونەنتتى ەكتىردى. ءبىراق بۇل جەتكىلىكسىز. اكىمدەر ۆاكسينا سالۋ قارقىنىن كۇشەيتۋ كەرەك. بۇل اسىرەسە ماڭعىستاۋ، اتىراۋ جانە باتىس قازاقستان وبلىستارىنا قاتىستى. قىزمەت كورسەتۋ، ءبىلىم بەرۋ سالاسىندا مىندەتتى ۆاكسينالاۋ قاجەتتىگى ايقىن بايقالىپ وتىر»، - دەدى پرەمەر-مينيستر.

اۆتور: ەسىمجان ناقتىباي