ءسىڭىر سوزىلۋ - حولەستەرين كوبەيگەنىنىڭ بەلگىسى

نۇر-سۇلتان. قازاقپارات -«حولەستەريننىڭ كوبەيگەنى جاقسى ەمەس» دەگەندى ءجيى ەستيمىز. حولەستەرين جاقسى جانە جامان دەپ بولىنەدى.

جامان حولەستەرين دەگەن قان تامىرىنىڭ ىشىندە قابىرعا تۇسىندا بەرىش بوپ جابىسىپ قالاتىن ليپيد (ماي) تەكتەس قوسپا. بەرىش بوپ بەكىپ قالعان مۇنداي ليپيد ارتەريا بويىمەن قاننىڭ جۇرۋىنە كەدەرگى كەلتىرىپ، جۇرەككە، باسقا دا اعزاعا كۇش تۇسىرەدى.

حولەستەريننىڭ كوبەيىپ كەتكەنى جامان ەكەنىن ءبارىمىز بىلسەك تە، ايقىن بەلگىلەرىن بايقاي بەرمەۋىمىز مۇمكىن. كانادا ەلىندەگى بريتان كولۋمبيا ۋنۆەرسيتەتىنىڭ (UBC) جاقىندا جاريالاعان ەڭبەگىندە اعزادا حولەستەرين كوتەرىلىپ كەتكەنىن بىلدىرەتىن بەلگىنىڭ ءبىرى - توبىقتىڭ، تىلەرسەك تۇسىنىڭ سىزداپ اۋرۋى دەپ كورسەتكەن.

«حولەستەرين قان تامىرىندا جينالادى دا، كوبەيىپ كەتكەن جاعدايدا قان تامىرىنان شەتكە تاراپ، سىڭىرگە بارىپ جابىسادى. اسىرەسە اياقتىڭ توبىق پەن تىلەرسەك بولىگىندە كوپ جينالادى. مۇنى ءبىز تىعىزدىعى تومەن ليپوپروتەين مەن سىڭىردە جينالعان كوللاگەننىڭ بيوحيميالىق قۇرامىن سالىستىرعۆن كەزدە بىلدىك. حولەستەرين سىڭىرگە كەپ جينالعان سايىن قابىنۋ اسقىنادى دا، ادامنىڭ ءجۇرىپ- تۇرۋى قيىندايدى. اياعى سىزداپ اۋىرادى. كەيدە توبىقتىڭ ۇستىنەن جارا شىعۋى مۇمكىن»، - دەپ تۇسىندىرەدى ۋنيۆەرسيتەت زەرتتەۋشىلەرى.

مەديتسينادا بۇل پروتسەسس ءسىڭىر كسانتوماسى دەپ اتالادى. توبىقتاعى جارا اسقىنعان كەزدە كسانتوماعا اينالادى دا، ادامنىڭ ءجۇرۋى قيىنداپ كەتەدى.

«ءبىزدىڭ ويىمىزشا، كسانتوما اسقىنا كەلە سىڭىردەگى سۇيىقتىقتى ازايتىپ، قۇرعاتىپ جىبەرەدى. سودان ءسىڭىر تەز سوزىلادى. ال ءسىڭىر جۇمسارعان سايىن، ءۇزىلىپ كەتۋ قاۋپى ارتادى. ادام اياعى سودان اۋىرادى»، - دەيدى ءسىڭىر اناتومياسىن 10 جىل زەرتتەگەن، فيزيوتەراپيا دوتسەنتى الەكس سكوتت.

مامانداردىڭ ايتۋىنشا، قانداعى حولەستەريندى ازايتۋ ءۇشىن ەڭ الدىمەن ديەتانى جوندەۋ كەرەك. مايلى تاعامداردى ازايتىپ، قۋىرىلعان ەت پەن ىرىمشىكتى، مايلى ءسۇت پەن سارى مايدى جەۋدى شەكتەگەن ءجون.

حولەستەريندى ازايتۋدىڭ باسقا دا جولدارى جايلى ءبىز مىنا سىلتەمەدە جازعان ەدىك.

massaget.kz