قاسىم-جومارت توقايەۆ بەلارۋس پرەمەر-ءمينيسترى رومان گولوۆچەنكونى قابىلدادى
قازاقستان مەن بەلارۋستىڭ ساۋدا-ەكونوميكالىق، عىلىمي-تەحنيكالىق، گۋمانيتارلىق سالالارداعى بايلانىستارىن، سونداي-اق، ينتەگراتسيالىق بىرلەستىكتەر اياسىنداعى ىقپالداستىعىن وڭ باعالادى.
قاسىم-جومارت توقايەۆ ەكى مەملەكەت باسشىلارىنىڭ تىعىز بايلانىس جاساپ تۇراتىنىن جانە جوعارى دەڭگەيدە قول جەتكىزگەن ۋاعدالاستىقتاردىڭ ءساتتى جۇزەگە اسىرىلاتىنىن ەرەكشە اتاپ ءوتتى.
- ءسىزدىڭ بۇل ساپارىڭىزدىڭ باعدارلاماسى تىعىز ەكەن. قوستاناي وبلىسىنا باردىڭىز. بۇل ونەركاسىپ جانە اۋىل شارۋاشىلىعى الەۋەتى تۇرعىسىنان وتە ماڭىزدى. ناقتى كەلىسىمدەرگە قول جەتكىزىلىپتى. سەنبى كۇنى پرەزيدەنتتەرىڭىز الەكساندر لۋكاشەنكومەن سويلەستىم. ەكى مەملەكەت اراسىنداعى ستراتەگيالىق سەرىكتەستىكتى ودان ءارى دامىتۋ ماسەلەلەرى جونىندە پىكىر الماستىق. قازاقستان ءۇشىن بەلارۋس، شىن مانىندە، ستراتەگيالىق سەرىكتەس ءارى وداقتاس ەل. ىنتىماقتاستىعىمىزدى نىعايتىپ، دامىتا بەرۋ ءۇشىن بارلىق مۇمكىندىكتى جاسايمىز، - دەدى قازاقستان پرەزيدەنتى.
قاسىم-جومارت توقايەۆ ەكىجاقتى كەلىسسوزدەردىڭ قورىتىندىسى قازاقستان مەن بەلارۋس قاتىناستارىنىڭ كوكجيەگىن ودان ءارى كەڭەيتە بەرۋگە مۇمكىندىك بەرەتىنىنە سەنىم ءبىلدىردى.
- ارينە، بۇل ۋاعدالاستىقتار ءبىر ساتتىك ەمەس، سوندىقتان وعان بايىپپەن قاراپ، جۇكتەلگەن مىندەتتەمەلەردى ورىنداۋىمىز كەرەك. ياعني، بوس سوزگە مالدانباي، ءسىزدىڭ تاراپىڭىزدان جانە ۇكىمەتتەر دەڭگەيىندەگى كەلىسسوزدەر بارىسىندا ايتىلعان بارلىق ماسەلەنى ناقتى شەشۋ قاجەت، - دەدى مەملەكەت باسشىسى.
بەلارۋس پرەمەر-ءمينيسترى رومان گولوۆچەنكو الەكساندر لۋكاشەنكونىڭ سالەمىن جەتكىزدى جانە ەكى ەلدىڭ ساۋدا-ەكونوميكالىق بايلانىستارىنىڭ پەرسپەكتيۆالارىنا ەگجەي-تەگجەيلى توقتالدى.
- ءبىز ءاردايىم وداقتاس ءارى سەرىكتەس ەلمىز. ادامي فاكتور - ىسكەرلىك قاتىناستاردى دامىتۋ ءۇشىن اسا ماڭىزدى. سوندىقتان پاندەميادان كەيىنگى كەزەڭدە ساۋدا-ەكونوميكالىق ىنتىماقتاستىعىمىزدىڭ قارقىندى داميتىنىنا سەنىمدىمىز. بەلارۋستىڭ قازاقستانعا، ال قازاقستاننىڭ بەلارۋسكە شىعاراتىن ەكسپورتى جىلدام ارتىپ كەلەدى. بۇل قازاقستان ءۇشىن وتە جاقسى فاكتور بولىپ تابىلادى، - دەدى رومان گولوۆچەنكو.
