ەلىمىزدە ۆاكسينالاۋ سانىن ارتتىرۋ تالاپتارى كۇشەيتىلمەك
بۇل تۋرالى ق ر پرەمەر-ءمينيسترىنىڭ ورىنباسارى ەرالى توعجانوۆ ورتالىق كوممۋنيكاتسيالار قىزمەتىندە ايتتى، دەپ حابارلايدى قازاقپارات ءتىلشىسى.
«ۆاكسينالاۋ بويىنشا ەش ماسەلە كورىپ وتىرعان جوقپىن. قازىر ءبىز ازاماتتارىمىزعا ۆاكسينا الۋعا جاعداي جاساۋىمىز كەرەك. قاجەتتى ۆاكسينا كولەمى قازاقستاندا بار. العاشىندا مۇنى ەرىكتى تۇردە دەپ جاريالاعان ەدىك. ءبىراق، جاڭا سىن-قاتەرلەردى ەسكەرە وتىرىپ، قوسىمشا شارالار قابىلداۋعا ءماجبۇر بولدىق»، - دەدى ەرالى توعجانوۆ.
سپيكەردىڭ ايتۋىنشا، ەلىمىزدە 2,4 ميلليون دوزا ۆاكسينا بار جانە وعان قوسىمشا تاعى 2 ميلليون ۆاكسينا جەتكىزىلەدى.
«ءبىزدىڭ باستى مىندەتىمىز - ازاماتتارعا ۆاكسينا الۋدى قولجەتىمدى ەتۋ. قازىرگى ۋاقىتتا قازاقستاندا 2,4 ميلليون دوزا ۆاكسينا قورى بار. وعان قوسىمشا ەكى اپتادا تاعى 2 ميلليون ۆاكسينا جەتكىزۋدى قامتاماسىز ەتەمىز. شىندىعىندا، ۆاكسينالاۋ قارقىنى كوڭىل كونشىتپەي وتىر. مۇنى ءبارىڭىز جاقسى بىلەسىزدەر. بۇل ءبىرقاتار وبلىستار مەن نۇر-سۇلتان قالاسىنا قاتىستى. سوندىقتان، ۆاكسينالاۋ سانىن ارتتىرۋ تالاپتارى كۇشەيەدى، تاۋلىگىنە 70 مىڭ دوزاعا دەيىن جەتكىزۋ مىندەتىن قويىپ وتىرمىز. وسى مەجەگە ۇمتىلاتىن بولامىز»، - دەدى ەرالى توعجانوۆ.
