قارجى ءمينيسترى قازاقستاننىڭ مەملەكەتتىك قارىزىنا بايلانىستى تۇسىنىك بەردى

نۇر-سۇلتان. قازاقپارات - پارلامەنت پالاتالارىنىڭ بىرلەسكەن وتىرىسىندا قارجى ءمينيسترى ەرۇلان جاماۋبايەۆ مەملەكەتتىك قارىزعا قاتىستى ەسەپ كوميتەتىنىڭ ەسكەرتۋىنە پىكىر ءبىلدىردى، دەپ حابارلايدى قازاقپارات ءتىلشىسى.

«ەسەپ كوميتەتى مەملەكەتتىك بورىشتىڭ وسۋىنە نازار اۋدارىپ، ونىڭ جالپى ىشكى ونىمگە قاتىناسى 29,4 پايىزعا جەتكەنىن جانە جاڭا بيۋدجەت ساياساتى تۇجىرىمداماسىندا بەلگىلەنگەن % 27 بولاتىن شەكتەۋدەن اسقانىن اتاپ ءوتتى. راسىندا، تۇجىرىمدامادا كورسەتىلگەن %27 ۇكىمەتتىڭ ءوزى بەلگىلەگەن ينديكاتيۆتىك كورسەتكىش، ال تۇجىرىمدامانىڭ ءوزى قازىر وزەكتى ەمەس. سوندىقتان ماكروەكونوميكالىق جاعدايدى جانە ەكونوميكا دامۋىنىڭ باسقا دا پارامەترلەرىن ەسكەرە وتىرىپ، جاڭا قۇجات ازىرلەنىپ جاتىر»، - دەدى ە. جاماۋبايەۆ ۇكىمەت پەن ەسەپ كوميتەتىنىڭ 2020 -جىلعا ارنالعان رەسپۋبليكالىق بيۋدجەتتىڭ اتقارىلۋى تۋرالى ەسەپتەرىن قاراۋ كەزىندە.

ونىڭ ايتۋىنشا، مەملەكەتتىك قارىزدىڭ جالپى ىشكى ونىمگە اراقاتىناسى ەۋرازيالىق ەكونوميكالىق وداق تۋرالى شارتتا جانە قازاقستان رەسپۋبليكاسىنىڭ 2025 -جىلعا دەيىنگى ۇلتتىق دامۋ جوسپارىندا بەلگىلەنگەن ليميتتەن اسپايدى.

«بارلىق بورىشتىق ينديكاتورلار ورىندالۋدا جانە قاۋىپسىز دەڭگەيدە ساقتالۋدا»، - دەدى مينيستر.

اۆتور: رۋسلان عابباسوۆ