الەمدىك نارىقتا دوللاردىڭ نىعايۋى تەڭگەگە قالاي اسەر ەتتى

الماتى. قازاقپارات - الەمدىك نارىقتا ا ق ش دوللارى باعامىنىڭ جاھاندىق دەڭگەيدە كۇرت نىعايۋى تەڭگەگە قالاي اسەر ەتكەنىن ۇلتتىق بانكتىڭ مونەتارلىق وپەراتسيالار دەپارتامەنتى ديرەكتورىنىڭ ورىنباسارى يۆان سەرديۋك ءتۇسىندىرىپ بەردى، دەپ حابارلايدى قازاقپارات ءتىلشىسى.

تەڭگە نىعايعاننان كەيىن اپتانىڭ باسىنان باستاپ باعام 425,64 كە دەيىن قايتا السىرەدى. مۇنداي اۋىتقۋعا نە تۇرتكى بولعانىن ۇلتتىق بانك وكىلى ايتتى.

«شىنىندا دا، تەڭگە باعامىنىڭ وڭ سەرپىنى بۇگىن توقتاپ، ساۋدا- ساتتىق 426,67 گە (نەمەسە الدىڭعى جابۋدىڭ 0,24 پايىزى) دەيىن السىرەي وتىرىپ اشىلدى. ينفلياتسيانىڭ جەدەلدەۋىنە بايلانىستى جاھاندىق نارىقتار الەمدىك ورتالىق بانكتەردىڭ مونەتارلىق جاعدايلاردى كۇشەيتۋ تۇرعىسىنداعى ريتوريكاسىن مۇقيات قاداعالاپ وتىر. بۇعان ا ق ش فەدەرالدى قور جۇيەسىندە وتكەن وتىرىسى دالەل بولا الادى. بۇگىن تۇندە ا ق ش فەدەرالدى قور (رەزەرۆ) ف ر ج جۇيەسى نەگىزگى مولشەرلەمەنىڭ نىسانالى اۋقىمىن 0-0,25 پايىز دالىزىندە ساقتاپ قالدى، بۇل رەتتە 2021 -جىلعا ارنالعان ينفلياتسيا بولجامىن 2,4 پايىزدان 3,4 پايىزعا دەيىن كوتەردى. وتىرىستىڭ ناتيجەسى بويىنشا، اشىق نارىقتار جونىندەگى كوميتەتتىڭ ون سەگىز وكىلىنىڭ ون ءۇشى 2023 -جىلى نەگىزگى مولشەرلەمەنىڭ ارتۋىن كۇتسە، 7 وكىل مولشەرلەمەنىڭ العاش رەت كوتەرىلۋى 2022 -جىلدان باستالاتىنىن بولجايدى. ناتيجەسىندە، نەگىزگى مولشەرلەمە بولجامدارىنىڭ مەدياناسى 2023 -جىلدىڭ سوڭىندا 0,12 پايىزدان 0,63 پايىزعا دەيىن وسەتىن بولىپ قالىپتاستى. سونىمەن قوسا، اكتيۆتەردى ساتىپ الۋ باعدارلاماسىن كەزەڭ- كەزەڭمەن توقتاتۋدى بەيرەسمي تۇردە تالقىلاۋ باستالدى»، - دەيدى يۆان سەرديۋك.

ونىڭ ايتۋىنشا، ينفلياتسيا بولجامدارىن قايتا قاراۋ جانە ف ر ج مولشەرلەمەسىنىڭ جوعارىلاۋىن كۇتۋ اياسىندا ا ق ش دوللارىنىڭ دامىعان ەلدەر ۆاليۋتالارىنىڭ قورجىنىنا شاققانداعى يندەكسى (DXY) ءبىر كۇندە 1 پايىزعا نىعايدى. ا ق ش قازىناشىلىق وبليگاتسيالارىنىڭ كىرىستىلىگى ءبىر كۇندە شامامەن 10 بىرلىك تولەمگە ءوستى، بۇل دا ا ق ش دوللارىنىڭ نىعايۋىنا قولداۋ كورسەتەدى.

«ا ق ش ف ر ج ريتوريكاسىن كۇشەيتۋ جاعىنا وزگەرتۋى دامۋشى نارىقتاردىڭ بارلىق ۆاليۋتاسى ءۇشىن تاۋەكەل فاكتورى بولىپ تابىلادى. ا ق ش-تىڭ قازىناشىلىق وبليگاتسيالارى كىرىستىلىگىنىڭ ءوسۋى دوللاردىڭ جاھاندىق باعامىنىڭ نىعايۋىنا ىقپال ەتەدى. ا ق ش ف ر ج اشىق نارىقتار جونىندەگى كوميتەتتىڭ وتىرىسىنان كەيىن ەكونوميكاسى دامىپ كەلە جاتقان ەلدەردىڭ 20-دان استامىنىڭ ۆاليۋتاسى السىرەدى. مىسالى، 15-16-ماۋسىم ارالىعىندا وڭتۇستىك افريكا راندى 1,9 پايىزعا، مەكسيكا پەسوسى 1,8 پايىزعا، تۇرىك ليراسى مەن رەسەي ءرۋبلى 0,6 پايىزعا السىرەدى.

رەسەي رۋبلىنىڭ سەرپىنى 16-ماۋسىمدا وتە قۇبىلمالى بولدى. جەنەۆاداعى ا ق ش پەن رەسەي پرەزيدەنتتەرى اراسىنداعى العاشقى كەلىسسوزدەن كەيىن رۋبل قىسقا ۋاقىت ىشىندە 71,63 دەڭگەيىنە دەيىن نىعايدى، ويتكەنى ينۆەستورلار ەلشىلەردى ماسكەۋ مەن ۆاشينگتونعا قايتارۋ تۋرالى ۋاعدالاستىقتى وڭ باعالادى. كەيىننەن رۋبل باعامى ءبىر دوللار ءۇشىن 72,65 جەتىپ السىرەدى»، - دەدى ول.

دامۋشى ەلدەردىڭ ۆاليۋتالارى جالپى السىرەۋ ۇردىسىمەن قوسا مۇناي باعاسىنىڭ تومەندەۋى دە تەڭگە ءۇشىن تەرىس فاكتور بولدى.

مۇناي باررەلىنىڭ قۇنى 2019 -جىلدان باستاپ 16-ماۋسىمدا 74,9 دوللارعا دەيىن ءوستى. الايدا، 17 ماۋسىمداعى تاڭعى جاعداي بويىنشا، 73,9 دوللارعا دەيىن 0,7 پايىزعا تومەندەدى. ا ق ش دوللارى باعامىنىڭ جاھاندىق نىعايۋى دا مۇنايعا قىسىم كورسەتىپ وتىر. مۇناي باعاسىنىڭ تومەندەۋى 2020 -جىلعى ناۋرىزداعى دەڭگەيگە جەتكەن قورلاردىڭ تومەندەۋى تۋرالى دەرەكتەرمەن توقتاتىلدى. كاليفورنيادا شەكتەۋلەردى جەڭىلدەتۋ، ۆيرۋستى جۇقتىرۋدىڭ جاڭا جاعدايلارىن تومەندەتۋ جانە حالىق جۇمىلدىرۋدىڭ ءوسۋى قورلارعا اسەر ەتتى.

17-ماۋسىمداعى تۇزەتۋگە قاراماستان، تەڭگە ءۇشىن ءۇردىس وڭ بولىپ قالدى. اپتا باسىنان بەرى تەڭگە 0,48 تەڭگەگە (ءبىر دوللار ءۇشىن 427,15 تەن 426,67 گە دەيىن) نىعايدى.

اۆتور: الما مۇقانوۆا