ۆاكسينالاردىڭ باعاسى قانشا تۇرادى

نۇر- سۇلتان. قازاقپارات - ورتالىق كوممۋنيكاتسيالار قىزمەتىندە وتكەن بريفينگىدە «س ق- فارماتسيانىڭ» باسقارما ءتوراعاسى ەرحات ەسقاليەۆ قولدانىستاعى ۆاكسينالاردىڭ باعاسى تۋرالى اقپارات بەردى، دەپ حابارلايدى قازاقپارات.

«بىزدە ۆاكسينا باعاسىنا قاتىستى ساياسات مەملەكەتتىك دەڭگەيدەگى كەلىسسوزدەر ارقىلى ايقىندالادى. ونىڭ كولەمى اشىق كوزدەردە جاريالانعان. ناقتىراق ايتساق «سامۇرىق قازىنا» ساتىپ العان Hayat-Vax ۆاكسيناسىنىڭ كەلىسىمشارتىنا ءبىز دە كومەكتەسكەنبىز. باعا 31 دوللار بولدى. شىن مانىندە نارىقتا ودان دا جوعارى باعا بار. بەلۋارس تا وسى باعامەن ساتىپ الدى. ياعني، باعا ماسەلەسى اشىق. ءوندىرۋشى ەلدەر باعانى رەسمي تۇردە ۇسىنادى. بىزگە كوروناۆيرۋس ينفەكسياسىنىڭ تارالۋىن بولدىرماۋ جونىندەگى ۆەدومستۆوارالىق كوميسسيا ارقىلى كولەمى مەن باعاسى، اۆانستار بويىنشا تاپسىرما بەرىلەدى. ءبىز سونىڭ نەگىزىندە ساتىپ الامىز»، - دەدى كومپانيا باسشىسى.

«س ق- فارماتسيا» ج ش س باسقارما ءتوراعاسى سپۋتنيك v ۆاكسيناسىنىڭ باعاسى ارزانداتىلعانىن قايتالاپ ەسكە سالدى.

«سپۋتنيك v بويىنشا ايتساق، وتاندىق ءوندىرۋشى سۋبستانسيادان ۆاكسينا جاساپ وتىرعانىن بىلەسىزدەر. باسىندا رەسەي تاراپى جاريالاعان باعا قازىرگىدەن جوعارى بولاتىن. كەيىن 21 دوللارعا دەيىن ءتۇسىردى. وسى باعانى ساقتاپ وتىرمىز. قاراعاندىداعى فارماتسيەۆتيكالىق كەشەن وسى باعا بويىنشا جەتكىزەدى. ال باسىندا ءبىر دوزاسى 26 دوللار بولاتىن. قازىر نارىقتا ۆاكسينا ءۇشىن مايدان ءجۇرىپ جاتىر دەۋگە بولادى. ەۋروپادا بىرنەشە جەتكىزۋشىمەن سوت ءجۇرىپ جاتىر. ءۇندىستاندا ۆاكسينا ۋاقىتىندا جەتپەي جاتىر. ال ءبىزدىڭ ەل جاساعان كەلىسىمدەردىڭ ورىندالۋى قاتاڭ باقىلاۋدا»، - دەدى ەرحات ەسقاليەۆ.

اۆتور: ەسىمجان ناقتىباي