قازاقستاننىڭ مەملەكەتتىك رامىزدەرى دۇنيەجۇزىلىك اركتيكا مۇراعاتىنا ورنالاستىرىلدى

نۇر- سۇلتان. قازاقپارات - قازاقستاننىڭ نورۆەگياداعى ەلشىسى ەركىن احينجانوۆ نورۆەگيالىق سۆالبارد پروۆينتسياسىنىڭ (شپيتسبەرگەن ارحيپەلاگى) اكىمشىلىك ورتالىعى - لونگير قالاسىنا ءىس- ساپارمەن باردى، دەپ حابارلايدى قازاقپارات.

سۆالبارد حالىقارالىق عىلىمي- زەرتتەۋ قاۋىمداستىعى ءۇشىن ەرەكشە ماعىناعا يە. سولتۇستىك پوليۋسكە جاقىن ورنالاسقاندىعىنا جانە بىرەگەي كليماتتىق جاعدايعا بايلانىستى بۇل جەردە بىرنەشە ەلدىڭ عىلىمي ستانسالارى جانە تەلەكوممۋنيكاتسيا، مەتەورولوگيا، سەيسمولوگيا، عارىشتىق زەرتتەۋلەر مەن ت. ب. سالالارىنداعى ءبىرقاتار ماڭىزدى جوعارى تەحنولوگيالىق وبەكتىلەر جۇمىس جاسايدى.

«بيىل قازاقستان تاۋەلسىزدىگىنىڭ 30 جىلدىعىن اتاپ وتەدى. بۇگىنگى تاڭدا ءبىزدىڭ ەل پوستكەڭەستىك كەڭىستىكتەگى ەكىنشى، ال ورتالىق ازياداعى ەڭ ءىرى ەكونوميكا. پرەزيدەنت قاسىم- جومارت توقايەۆتىڭ باسشىلىعىمەن قوعامدىق- ساياسي مەن ەكونوميكالىق سالالاردا كەشەندى رەفورمالار جۇزەگە اسىرىلۋدا. سونىمەن قاتار، ەلىمىز حالىقارالىق ارىپتەستىكدىڭ جاڭا مۇمكىندىكتەرىن بەلسەندى تۇردە زەرتتەۋدە. ءبىز سۆالباردتىڭ جەتەكشى كومپانيالارىمەن ينۆەستيتسيالىق جانە عىلىمي- تەحنيكالىق ىنتىماقتاستىقتى تالقىلاۋ ءۇشىن كەلدىك»، - دەدى ە. احينجانوۆ سۆالبارد گۋبەرناتورىنىڭ مىندەتىن اتقارۋشى ءسولۆي ەلۆەدالمەن وتكەن كەزدەسۋ بارىسىندا.

ساپار اياسىندا سۆالباردتاعى دۇنيەجۇزىلىك تۇقىم قويماسىنىڭ ۇيلەستىرۋشىسى وسمۋند اسدالمەن، سونداي- اق جەردەگى «SvalSat» جەرسەرىك ستانساسىنىڭ ديرەكتورى مايا- ستينا ەكستەدتپەن مازمۇندى كەزدەسۋ ءوتتى. عىلىم، تەحنولوگيا جانە ءبىلىم سالالارىنداعى ءوزارا ءىس- قيمىل ماسەلەلەرى سۆالباردتاعى ۋنيۆەرسيتەت ورتالىعى مەن نورۆەگ پوليارلىق ينستيتۋتىندا تالقىلاندى.

وسىمەن بىرگە قازاقستاندىق دەلەگاتسيا تاريحي مەن مادەني تۇرعىدان ماعىنالى، ماڭىزدى ءىرى دەرەكتەر، زياتكەرلىك مەنشىك جانە ت. ب. اقپاراتى بار تسيفرلىق دەرەكتەردى ساقتايتىن دۇنيەجۇزىلىك اركتيكا مۇراعاتىنا (AWA) باردى. مالىمەتتەر 500 جىلدان استام قىزمەت ەتە الاتىن قۇرىلعىلاردا ساقتالادى، ولار ماڭگى توڭدا تەرەڭدەگى بولات قويماعا ورنالاستىرىلعان.

قازاقستاننىڭ ۇلتتىق رامىزدەرى كۇنى قارساڭىندا مەملەكەتتىك تۋ، ەلتاڭبا، ءانۇران، كونستيتۋتسيا جانە 1991 -جىلعى 16 -جەلتوقسانداعى «قازاقستان رەسپۋبليكاسىنىڭ مەملەكەتتىك تاۋەلسىزدىگى تۋرالى» زاڭى بار اقپاراتتىق فايلدار اتالعان مۇراعاتقا ورنالاستىرىلدى. فايلدار دۇنيەجۇزىلىك اركتيكا مۇراعاتىن باسقاراتىن «Piql» كومپانياسىنىڭ ارنايى تەحنولوگياسىمەن الدىن الا ارحيۆاتسيالانعان بولاتىن.