قوستاناي وبلىسىندا ءبىلىم ءبولىمىنىڭ باسشىسى وزىنە قول جۇمسادى

قوستاناي. قازاقپارات - قوستاناي وبلىسى مەڭدىقارا اۋدانى ءبىلىم ءبولىمىنىڭ باسشىسى قالىبەك جۇگىنىسوۆ ءوز- وزىنە قول جۇمسادى.

بۇل تۋرالى وبلىستىق ءبىلىم باسقارماسى تۇسىنىكتەمە جاسادى، دەپ حابارلايدى قازاقپارات ءتىلشىسى. ق. جۇگىنىسوۆتىڭ 2 - ماۋسىم كۇنى سۋيتسيد جاساعانى تۋرالى اقپاراتتى ب ا ق بۇگىن بەرە باستادى. وعان بىردەن وبلىستىق ۆەدومستۆو تۇسىنىكتەمە جاسادى.

«وكىنىشكە قاراي، مەڭدىقارا اۋدانى ءبىلىم ءبولىمىنىڭ باسشىسى قالىبەك بايجان ۇلى جۇگىنىسوۆتىڭ وزىنە قول سالعانى تۋرالى اقپاراتتى راستايمىز. قايعىلى جاعدايدىڭ ءمان- جايىنان ءبىلىم باسقارماسى حابارسىز، - دەدى وبلىستىق باسقارمادان. - قالىبەك بايجان ۇلى ارىپتەستەرى اراسىندا سىيلى جان ەدى. ول - ءوز ءىسىنىڭ مامانى، جاۋاپتى قىزمەتكەر بولدى. ءبىلىم باسقارماسىنىڭ ۇجىمى مارقۇمنىڭ تۋعان- تۋىستارى مەن جاقىندارىنا قايعىرىپ كوڭىل ايتادى».

سونىمەن قاتار جەرگىلىكتى ب ا ق- تا مارقۇمنىڭ وزىنە قول سالۋىنىڭ سەبەبى - وعان قاتىستى سىبايلاس جەمقورلىق فاكتىسى بويىنشا جۇرگىزىلگەن تەرگەۋ بولۋى مۇمكىن ەكەنى حابارلانعان.

«ءبىلىم باسقارماسىنا قۇقىق قورعاۋ ورگاندارىنان قالىبەك بايجان ۇلىنا قاتىستى سىبايلاس جەمقورلىق فاكتىسى بويىنشا جۇرگىزىلگەن سوتالدى تەرگەۋ تۋرالى رەسمي اقپارات تۇسپەدى»، - دەپ قوستى وبلىستىق ءبىلىم باسقارماسىنان.

اۆتور: ءبيبىحان سەرىكوۆا