مەملەكەت باسشىسى شارىن شاتقالىندا قازا تاپقان مەرەي يبراگيموۆتىڭ جاقىندارىنا كوڭىل ايتتى
بۇل تۋرالى ق ر پرەزيدەنتىنىڭ باسپا ءسوز حاتشىسى بەرىك ءۋالي Facebook پاراقشاسىندا جازدى، دەپ حابارلايدى قازاقپارات.
مەملەكەت باسشىسى 29 -مامىر كۇنى الماتى وبلىسىنداعى شارىن شاتقالىندا بولعان قايعىلى وقيعانى ۇلكەن كۇيزەلىسپەن قابىل الدى. قاسىم- جومارت توقايەۆ قايتىس بولعانداردىڭ جاقىن تۋىستارىنا كوڭىل ايتىپ، جاراقات العانداردىڭ تەزىرەك ساۋىعىپ كەتۋىنە تىلەكتەستىك ءبىلدىردى.
«شاكىرتتەرىن قۇتقارامىن دەپ ءوزى قۇربان بولعان بىلىكتى مامان مەرەي نۇرعازى ۇلى ءومىرىن ۇستازدىققا ارنادى. وقۋشىلارىنىڭ سۇيىكتى مۇعالىمى بولدى. تابيعات توسىن مىنەز كورسەتكەن اپاتتى جاعدايدا جاس ۇستاز باتىلدىق تانىتىپ، وقۋشىسىنا جانكەشتىلىكپەن كومەك كورسەتۋگە ۇمتىلدى. 26 جاسىندا ومىردەن قىرشىن كەتكەن مەرەي نۇرعازى ۇلىنىڭ ەرلىگى مەن جارقىن بەينەسى ۇمىتىلمايدى»، - دەلىنگەن كوڭىل ايتۋ جەدەلحاتىندا.
مەملەكەت باسشىسىنىڭ جارلىعىمەن ادام ءومىرىن ساقتاپ قالۋعا بايلانىستى قيىن- قىستاۋ جاعدايدا كورسەتكەن ەرجۇرەكتىگى مەن جانقيارلىعى ءۇشىن مارقۇم مەرەي يبراگيموۆ «ەرلىگى ءۇشىن» مەدالىمەن ناگرادتالدى.
