نۇر-سۇلتاندا جەتكىنشەكتى سوققىعا جىققان ەر ادام قىلمىستىق جاۋاپقا تارتىلادى
بيىلعى جىلدىڭ 28-مامىرىندا ساعات 21:35 كەزىندە «102» نومىرىنە بارايەۆ كوشەسىنىڭ بويىنداعى ۇيلەردىڭ ءبىرىنىڭ اۋلاسىندا بەيتانىس ەر ادام جاس ءوسپىرىمدى سوققىعا جىققانى تۋرالى حابار تۇسكەن. وسى وقيعا بويىنشا پوليتسياعا 36 جاستاعى قالا تۇرعىنى جەتكىزىلدى.
ونىڭ ايتۋىنشا، سول كۇنى بەتىن قان باسقان 10 جاستاعى قىزى ۇيىنە كەلىپ، اۋلادا 13 جاستاعى بالانىڭ ونىڭ بەتىنەن دوپپەن تەپكەنىن ايتىپ شاعىمدانعان. بۇنى ەستىگەن قىزدىڭ اكەسى اۋلاعا شىعىپ، قىزىنا تيىسكەن جەتكىنشەكتى ۇرىپ جىبەرگەن. جەتكىنشەك اۋرۋحاناعا جاتقىزىلعان. وسى وقيعا بويىنشا قىلمىستىق ءىس قوزعالدى.
«نۇر-سۇلتان قالاسىنىڭ پوليتسيا دەپارتامەنتى ەرەسەكتەر تاراپىنان مۇنداي ارەكەتتەرگە جول بەرىلمەيتىنىن ەسكەرتەدى. قولدانىستاعى زاڭعا سايكەس، بالالاردىڭ قۇقىقتارىن بۇزۋ جانە ولاردىڭ دەنساۋلىعىنا زيىن كەلتىرگەنى ءۇشىن جاۋاپكەرشىلىك قاراستىرىلعان»، - دەلىنگەن پوليتسيا دەپارتامەنتىنىڭ باسپا ءسوز قىزمەتى تاراتقان اقپاراتتا.
