قازاقستاننىڭ سىرتقى ىستەر ءمينيسترى قىرعىزستانعا رەسمي ساپارمەن باردى

نۇر-سۇلتان. قازاقپارات - قازاقستان رەسپۋبليكاسى پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇحتار تىلەۋبەردى قىرعىز رەسپۋبليكاسىنىڭ سىرتقى ىستەر ءمينيسترى رۋسلان كازاكبايەۆتىڭ شاقىرۋىمەن بىشكەك قالاسىنا رەسمي ساپارمەن باردى، دەپ حابارلايدى ق ر س ءى م باسپا ءسوز قىزمەتى.

ساپاردىڭ ءبىرىنشى كۇنى م. تىلەۋبەردى ءوزىنىڭ قىرعىز ارىپتەسى ر. كازاكبايەۆپەن كەلىسسوزدەر جۇرگىزدى. تاراپتار ەكىجاقتى ىنتىماقتاستىقتىڭ وزەكتى ماسەلەلەرىنىڭ كەڭ اۋقىمى، وڭىرلىك جانە حالىقارالىق كۇن ءتارتىبى بويىنشا «ساعاتتاردى تەڭەستىردى»، سونداي-اق جوعارى جانە اسا جوعارى دەڭگەيلەردە قول جەتكىزىلگەن ۋاعدالاستىقتاردى جەدەل ىسكە اسىرۋ بويىنشا ناقتى شارالاردى بەلگىلەدى. مينيسترلەر ەكىجاقتى تاۋار اينالىمىن ارتتىرۋ، ونەركاسىپتىك كووپەراتسيانى دامىتۋ جانە مادەني- گۋمانيتارلىق بايلانىستاردى نىعايتۋ جولدارىن تالقىلادى.

ينۆەستيتسيالاردى قورعاۋ جانە سۋ-ەنەرگەتيكا سالاسىنداعى ىنتىماقتاستىق ماسەلەلەرىنە ەرەكشە نازار اۋدارىلدى. م. تىلەۋبەردى قازاقستان ەكى جاقتى نەگىزگى قۇجاتتاردا - ماڭگىلىك دوستىق تۋرالى شارت جانە وداقتاستىق قاتىناستار تۋرالى شارتتا بەلگىلەنگەن قىرعىزستانمەن تاۋەلسىز دامۋ جىلدارىندا قالىپتاسقان تاتۋ كورشىلىك جانە وداقتاستىق قاتىناستاردى جوعارى باعالايتىنىن اتاپ ءوتتى. «ەلىمىزدىڭ جوعارى باسشىلىعى ءارقاشان ءسىزدىڭ رەسپۋبليكاڭىزبەن تىعىز جاقىنداسۋ باعىتىن ۇستانادى. ءبىز باۋىرلاس قىرعىزستاندا ءاردايىم بەيبىتشىلىك پەن تۇراقتىلىقتىڭ بولۋىنا شىن جۇرەكتەن مۇددەلىمىز»، - دەدى قازاقستان س ءى م باسشىسى.

ءوز كەزەگىندە قىرعىزستان س ءى م باسشىسى ر. كازاكبايەۆ قازاقستاندىق تاراپقا تۇراقتى قولداۋ كورسەتكەنى ءۇشىن العىسىن ءبىلدىردى، اتاپ ايتقاندا، پاندەميانىڭ كۇردەلى جاعدايىندا قازاقستاننىڭ كورسەتكەن گۋمانيتارلىق كومەگىن ەرەكشە اتاپ ءوتتى.

«قازاقستان ءبىز ءۇشىن باۋىرلاس رەسپۋبليكا، ماڭگىلىك دوس، سەنىمدى وداقتاس جانە ستراتەگيالىق سەرىكتەس. قازاقستاننىڭ تۇڭعىش پرەزيدەنتى - ەلباسى نۇرسۇلتان نازاربايەۆتىڭ ءوزارا ءتيىمدى ىنتىماقتاستىقتىڭ سەنىمدى جانە شىن مانىندە باۋىرلاستىق قاتىناستارىن قۇرۋداعى باعا جەتپەس ءرولىن اتاپ وتكىم كەلەدى. قازاقستان پرەزيدەنتى قاسىم-جومارت توقايەۆ ەلىمىزبەن ءوزارا ءىس- قيمىلدى نىعايتۋعا باعىتتالعان ساياسي باعىتتىڭ ساباقتاستىعىن جالعاستىرۋدا»، - دەدى ر. كازاكبايەۆ.

قىرعىزستان بۇرىنعىداي باۋىرلاس قازاقستانمەن ەكىجاقتى جانە كوپجاقتى قاتىناستاردى تەرەڭدەتۋگە باعىتتالعان سىرتقى ساياساتتى جۇرگىزەتىن بولادى، دەپ قوستى ول. قازىرگى ۋاقىتتا ستراتەگيالىق پەرسپەكتيۆادا ىنتىماقتاستىقتى ودان ءارى نىعايتۋ ءۇشىن قازاقستان مەن قىرعىزستان اراسىندا ءتيىستى تەتىكتەر قۇرىلىپ، جۇمىس ىستەۋدە - جوعارى مەملەكەتارالىق كەڭەس، ۇكىمەتارالىق كەڭەس، سىرتقى ىستەر مينيسترلەرى كەڭەسى، سونداي-اق ىنتىماقتاستىق جونىندەگى پارلامەنتارالىق كەڭەس. قازاقستان قىرعىزستان ەكونوميكاسىنىڭ ءىرى ينۆەستورلارىنىڭ قاتارىنا كىرەدى جانە 2005 -جىلدان باستاپ 2020 -جىلعا دەيىن جيناقتالعان تىكەلەي ينۆەستيتسيالار كولەمى 1 ميلليارد ا ق ش دوللار قۇرادى.

ءوز كەزەگىندە، ءبىزدىڭ ەلىمىز قىرعىزستاننىڭ سىرتقى ساۋدا اينالىمىندا 3-ورىن الادى. جوعارى دەڭگەيدەگى ۋاعدالاستىقتارعا سايكەس توعىسپالى تۇردە مادەنيەت كۇندەرىن ۇيىمداستىرۋ، بىشكەكتە اباي جانە نۇر-سۇلتاندا ماناس ەسكەرتكىشتەرىن اشۋ جانە بىرلەسكەن ءبىلىم بەرۋ باعدارلامالارىن ازىرلەۋ پىسىقتالۋدا.

قازاقستان قىرعىز جاستارىن ەلىمىزدىڭ جوعارى وقۋ ورىندارىندا وقىتۋ ءۇشىن جىل سايىنعى كۆوتالاردى ۇلعايتۋدى جوسپارلاۋدا. سونداي-اق، بىشكەكتە قازاقستاندىق الدىڭعى قاتارعى جوعارى وقۋ ورىندارىنىڭ ءبىرىنىڭ فيليالدارىن اشۋ مۇمكىندىگى زەرتتەلۋدە. مينيستر م. تىلەۋبەردى قىرعىزستاننىڭ جوگوركۋ كەنەش ءتوراعاسى تالانت مامىتوۆپەن كەزدەسىپ، پارلامەنتارالىق ىنتىماقتاستىقتى دامىتۋ ماسەلەلەرىن تالقىلادى. تاراپتار ەكى ەل اراسىنداعى كوپجوسپارلى ءوزارا ءىس- قيمىلدى ارتتىرۋعا ورتاق مۇددەلىلىك تانىتتى. ساپار اياسىندا قازاقستاندىق دەلەگاتسيا «اتا- بەييت» مەموريالدىق كەشەنىنە گۇل شوقتارىن قويۋ راسىمىنە قاتىستى.