الەكسەي سوي دارىگەرلەرگە كەشىككەن ۇستەمەاقى قالاي تولەنەتىنىن ايتتى

نۇر-سۇلتان. قازاقپارات - دەنساۋلىق ساقتاۋ ءمينيسترى الەكسەي سوي كوروناۆيۋرسپەن كۇرەسكە اتسالىسقان دارىگەرلەردىڭ دەر كەزىندە الماعان ۇستەمەاقىسى قالاي تولەنەتىنىن ءتۇسىندىردى، دەپ حابارلايدى قازاقپارات ءتىلشىسى.

ءمينيستردىڭ ايتۋىنشا، ۇستەمەاقىدان قاعىلعان مامانداردىڭ قۇجاتى وڭىرلىك كوميسسيالار جۇمىس ىستەپ تۇرعان كەزدە قارالىپ ۇلگەرمەي قالعان. ءبىراق ونى كەيىن قوزعاپ، تيەسىلى اقشانى الۋعا مۇمكىندىك بار.

«سول كەزدە ارنايى نورمالار كۇشىندە بولدى. ءاربىر اكىمدىكتىڭ جانىندا وڭىرلىك كەڭەستەر جۇمىس ىستەگەن بولاتىن. ونى اكىمنىڭ ورىنباسارلارى باسقاردى. قۇرامىنا ازاماتتىق قوعام وكىلدەرىنەن باستاپ ءتۇرلى ماماندار كىردى. سونداي ءتارتىپ كۇشىندە بولعان كەزدە بەرىلىپ، قارالعان وتىنىشتەردىڭ بارىنە ءتيىستى جاۋاپ بەرىلدى. وڭ شەشىم شىعارىلعاندار بويىنشا ۇستەمەاقى بارىنە بەرىلدى»، - دەيدى ۆەدومستۆو باسشىسى.

ونىڭ سوزىنە قاراعاندا، دارىگەرلەردىڭ بۇل ماسەلەسىن جەرگىلىكتى اكىمدىكتەر شەشۋى ءتيىس. نەمەسە قۇقىقتىق جولمەن، سوتتاسىپ شەشۋگە بولادى.

«وسىنداي جايتتار تۋىنداپ جاستا، قۇقىقتىق تارتىپپەن شەشىلۋى كەرەك. جەرگىلىكتى اكىمدىكتىڭ نەمەسە كاسىپوداقتاردىڭ ەسەبىنەن وتەپ بەرۋ تەتىكتەرى دە بار. ياعني، بۇل ماسەلە دە شەشىلىپ جاتىر. اكىمدىكتەر وسىنداي ماسەلە تۋىنداپ جاستا، ءوز قاراجاتى ەسەبىنەن نەمەسە قوعامدىق قورلار ارقىلى وتەپ وتىر»، - دەگەن مينيستر بيىل دەنساۋلىق ساقتاۋ سالاسىنا بولىنگەن قاراجات بىلتىرعىدان 200 ميلليارد تەڭگەگە كوپ ەكەنىن ەسكە سالدى.

«بىلتىر 1 تريلليون 662 ميلليون 991 مىڭ تەڭگە بولسا، 2021-جىلعا ءبىز 1 تريلليون 862 ميلليون 672 مىڭ تەڭگە قارجىلاندىرۋ الدىق. ياعني 200 ميلليارد تەڭگەدەي كوپ ءبولىنىپ وتىر. ونىڭ ءبىر بولىگى كوروناۆيرۋستان ەمدەۋ جانە قاۋىپتى ايماقتاردا رەجيمدىك جاعدايدا جۇمىس ىستەپ جۇرگەن مەديتسينا قىزمەتكەرلەرىنە ۇستەمەاقى تولەۋگە باعىتتالدى»، - دەدى الەكسەي سوي.