ماسكاسىز ومىرگە قاشان ورالامىز - مينيستر جاۋاپ بەردى

نۇر-سۇلتان. قازاقپارات - دەنساۋلىق ساقتاۋ ءمينيسترى الەكسەي سوي قازاقستاندىقتاردىڭ قاشان ماسكاسىز ومىرگە ورالا الاتىنىن ايتتى، دەپ حابارلايدى قازاقپارات ءتىلشىسى.

«ول ءۇشىن ءبىز حالىقتىڭ نەگىزگى بولىگىنە ەكپە جاساپ ۇلگەرۋىمىز كەرەك. جوسپار بويىنشا ۆاكسينالاۋدى كۇزدىڭ باسىنا قاراي اياقتاۋ جوسپارى بار. قىركۇيەكتە ازاماتتارعا بارىنشا كوپ ەكپە جاساۋىمىز كەرەك. كورىپ وتىرسىزدار، امەريكا قۇراما شتاتتارىنداعى، يزرايلدەگى جاعداي حالىقتىڭ نەگىزگى بولىگىن ۆاكسينالاعاننىڭ ارقاسىندا ءبىرشاما جاقساردى. ازاماتتاردىڭ 60 پايىزىنا دەيىن ۆاكسينا سالعاندىقتان، ماسكاسىن شەشىپ، قالىپتى ومىرگە ورالىپ جاتىر. ۇجىمدىق يممۋنيتەت بولعاندا ازاماتتار ءبىر-ءبىرىن ۆيرۋستان قورعاي الادى. ال قازىر بىزدە ۆاكسينا العاننىڭ وزىندە ماسكانى شەشسە، اۋرۋ جۇقتىرۋ تاۋەكەلى بار. ويتكەنى نەگىزگى بولىگى ۆاكسينا الىپ بىتكەن جوق. ۆاكسينا دەگەنىمىز - ۆيرۋس ادامنان ادامعا جۇققان كەزدە ەكپە العان ادامنان اۋرۋ جۇقتىرۋ تىزبەگىن ۇزەتىن قۇرالى»، - دەيدى مينيستر.

الەكسەي سوي كۇزگە دەيىن حالىقتىڭ 60 پايىزى ۆاكسينا السا، قالىپتى ومىرگە ورالۋ مۇمكىن ەكەنىن ايتتى.

«ۆاكسينا العان ادامنىڭ سانى نەعۇرلىم كوپ بولسا، ۆيرۋستىڭ تارالۋ مۇمكىندىگى سوعۇرلىم تارىلا تۇسەدى. سوندىقتان كۇزگە دەيىن ازاماتتاردىڭ 60 پايىزىن ۆاكسينامەن قامتۋعا تىرىسامىز. سوندا عانا ءبىز ماسكا رەجيمىن كەزەڭ- كەزەڭمەن الا باستايمىز. وتانداستارىمىزدى تەگىن ۆاكسينا الۋعا شاقىرامىز. قازاقستاننىڭ ۆاكسينانى تەگىن ۇسىنىپ وتىرعانى دا جەتىستىك. ايتپەسە اقىلى ەكپە سالىپ جاتقان ەلدەر دە بار»، - دەدى دەنساۋلىق ساقتاۋ ءمينيسترى.

اۆتور: ەسىمجان ناقتىباي