قازاق تىلىندەگى اۋديوجازبانى ماتىنگە اينالدىراتىن قوسىمشا جاسالدى
قوسىمشا قازاق تىلىندە ايتىلعان، جازىلعان اۋديوجازبانى لەزدە ماتىنگە اينالدىرادى.
بۇل اسىرەسە، قازاق جۋرناليستەر ءۇشىن تاپتىرماس قۇرال. TezText - iOS جانە Android-قا ارنالعان سويلەۋدى تانۋ جۇيەلەرى مەن باعدارلامالاۋدىڭ ەڭ ۇزدىك جەتىستىكتەرىن قامتيتىن باعدارلامالىق جاساقتاما، ول قازاقستاندىق جۋرناليستەردىڭ كاسىبي قىزمەتىندە - قازاق تىلىندەگى اۋديوجازبانى ماتىنگە كوشىرىپ تەرۋگە كومەكتەسەدى.
باعدارلامالىق جاساقتاما ەلدەگى جۋرناليستيكا سالاسىنا ايتارلىقتاي كومەك كورسەتەدى جانە قازاق مەديانارىقتىڭ سيفرلىق مۇمكىندىكتەرىن كەڭەيتەدى.
قوسىمشانىڭ جۇمىس ىستەۋ تەتىگى مىناداي:
سمارتفونعا باعدارلامانى جازىپ العاننان كەيىن، اشىپ قوسامىز. قوسامىز دا ديكتوفون سياقتى سۇحبات الۋشىمەن ەكەۋارا اڭگىمەنى جازامىز. جازىپ بولعان سوڭ، «Stop» باتىرماسىن باسساق بولعانى - ءماتىن لەزدە ەكرانعا شىعا كەلەدى. ياعني، اۋىزشا اڭگىمە قاس-قاعىمدا ماتىنگە اينالادى.
بۇرىن جازىلعان اۋديوجازبالاردى دا ماتىنگە اينالدىرۋعا بولادى. ءبىراق ءبىر شارت بار:
اۋديوجازبا - جۋرناليستيكا سالاسىنا قاتىستى بولۋى ءتيىس. ياعني، باسقا سالانىڭ ماماندارى بۇل باعدارلامانى قولدانا المايدى.
«ءبىز قازاقشا جۋرناليستيكاعا ارنالعان قوسىمشانى جاساۋ ءۇشىن 10 مىڭ اۋديوماتىندى وڭدەپ شىقتىق. ونىڭ ىشىندە سۇحبات، تەلەباعدارلاما، كوركەم ءسوز، ادەبي شىعارمالاردىڭ اۋديونۇسقالارى بار. مۇنى باستان-اياق ەرىكتىلەر جاساپ شىقتى. وكىنىشتىسى، بۇل قوسىمشانى باسقا سالانىڭ ماماندارى قولدانا المايدى. ويتكەنى مۇندا تەك جۋرناليستيكا سالاسىنىڭ عانا مۇراعاتى - Big Data جيناقتالعان. تىلدىك مودەل مەن كاسىبي تەرميندەردى تانۋ - ءبارى جۋرناليستيكا سالاسىنا قاتىستى. باسقا سالاعا ارناپ شىعارۋ ءۇشىن ءبىز سول سالانىڭ مۇراعاتىن جيناقتاۋىمىز كەرەك ەدى»، - دەپ ءتۇسىندىردى «Galamat teh» كومپانياسىنىڭ وكىلى، باعدارلامانى جاساۋشىلاردىڭ ءبىرى نۇرعايىن ساكيەۆ.
ايتا كەتكەن ءجون، قازاقستاندىق كومپانيا بۇل باعدارلامانى ا ق ش ەلشىلىگىنىڭ قولداۋىمەن جاساپ شىققان. امەريكا قۇراما شتاتتارى مەن قازاقستان رەسپۋبليكاسى ەكىجاقتى جانە ايماقتىق ماسەلەلەردىڭ كەڭ اۋقىمى بويىنشا، سونىڭ ىشىندە قازاقستان جۋرناليستەرىنىڭ كاسىبيلىگىن ارتتىرۋ جانە قازاقستاندىق بۇقارالىق اقپارات قۇرالدارىنىڭ باسەكەگە قابىلەتتىلىگىن كۇشەيتۋ جونىندەگى باستامالارىن قولداۋ ماقساتىندا قارىم-قاتىناس ورناتتى.
«قازاق ءتىلى مەن جۋرناليستيكا سالاسىن دامىتۋعا مۇمكىندىك بەرەتىن جوبالاردى قولداۋعا ءبىز ءاردايىم ءازىرمىز»، - دەدى ەلشىلىك قىزمەتكەرلەرى.
massaget.kz
