نۇر-سۇلتاندا ازەربايجان ساۋدا ءۇيى اشىلدى

نۇر-سۇلتان. قازاقپارات - ەلوردادا ازەربايجان ساۋدا ءۇيى اشىلدى، دەپ حابارلايدى قازاقپارات ءتىلشىسى.

بۇگىن باۋىرلاس ازەربايجان مەن قازاقستان رەسپۋبليكالارىنىڭ ەكونوميكالىق بايلانىسى نىعايتۋعا جول اشاتىن ەرەكشە شارا ءوتتى.

ەكى ەل پرەزيدەنتتەرىنىڭ تاپسىرماسى بويىنشا باكۋدە قازاقستان ساۋدا ءۇيى اشىلسا، نۇر-سۇلتاندا ازەربايجان ساۋدا ءۇيى اشىلدى. ساۋدا ءۇيىنىڭ اشىلۋىنا كەلگەن قوناقتارعا ازەربايجان رەسپبليكاسىنىڭ قازاقستانداعى توتەنشە جانە وكىلەتتى ەلشىسى راشاد ماممادوۆ لەبىز ءبىلدىردى.

«بۇگىنگى شارانى مەرەكەلىك شارا دەپ ايتۋعا بولادى. ازەربايجاننىڭ تاۋەلسىزدىك كۇنى قارساڭىندا قازاقستان استاناسىندا وسىنداي ەرەكشە شاراعا كۋا بولىپ وتىرسىزدار. 28- مامىردا ازەربايجان 103 جىلدىعىن اتاپ وتەدى. وسىنداي مەرەكەلىك وقيعالاردىڭ الدىندا ازەربايجان ساۋدا ءۇيىن اشىپ وتىرمىز. مۇنداي نىساندى اشۋعا ەكى ەل پرەزيدەنتتەرى باستاماشى بولعانىن ايتۋ كەرەك. بۇل - ازەربايجاننىڭ قازاقستانداعى العاشقى ءارى جالعىز ساۋدا ءۇيى. الداعى ايلاردا بۇل ورتالىقتىڭ اقتاۋ جانە الماتى قالالارىندا فيليالدارى اشىلادى. كەلەشەكتە قازاقستاننىڭ بۇكىل اۋماعىندا وسىنداي بولىمشەلەر اشىلادى دەپ ۇمىتتەنەمىز»، - دەدى ديپلومات.

ونىڭ ايتۋىنشا، ساۋدا نىسانى ازەربايجاننان قازاقستانعا ەكسپورتتاۋعا بولاتىن ءونىم شىعاراتىن ورتا جانە شاعىن كاسىپرورىندار ءۇشىن جاقسى مۇمكىندىك بولماق. ال قازاقستاندىق تۇتىنۋشىلار ازەربايجاننىڭ ءدامدى ازىق- تۇلىگى مەن ونەركاسىپ ونىمدەرىنە تىكەلەي قول جەتكىزە الادى.

«كوروناۆيرۋس پاندەمياسى بارلىق ەلدەردىڭ جوسپارىن وزگەرتىپ، اراداعى ساۋدا بايلانىسىنا كەرى اسەر ەتكەنىنە قاراماستان، قازاقستان مەن ازەربايجان پاندەمياعا دەيىنگى بايلانىستاردى دامىتا تۇسۋگە قاجەتتى قادامداردى جاساپ وتىر. قازىردىڭ وزىندە ەكى ەل اراسىندا ىشكى جانە ترانزيت جۇك اينالىمىنىڭ كولەمى ارتىپ وتىر. ەلدەرىمىزدىڭ ينفراقۇرىلىمعا سالعان ميللياردتاعان ينۆەستيتسيالارى ەكونوميكانىڭ بەلسەندى دامۋىنا مۇمكىندىك اشىپ، بۇكىل ءوڭىردىڭ دامۋىنا جاقسى الەۋەت اشىپ وتىر»، - دەدى راشاد ماممادوۆ.

قازاقستان تاراپىنان ءسوز العان ەنەرگەتيكا ۆيتسە-ءمينيسترى اسەت ماعاۋوۆ قازاقستان مەن ازەربايجان اراسىنداعى بايلانىس ساۋدا-ەكونوميكالىق، كولىك-لوگيستيكا، ەنەرگەتيكا، مادەني-گۋمانيتارلىق جانە باسقا دا سالالارداى قامتيتىنىن ەسكە سالدى.

«بىرنەشە جىل بۇرىن باكۋ-تبيليسي-كارس حالىقارالىق تەمىرجول جەلىسىنىڭ اشىلۋىنا كۋا بولدىق. ول ءسوزسىز جىبەك جولى بويىنداعى ەلدەر ءۇشىن ەكونوميكالىق ىنتىماققا جاڭا سەرپىن بەردى. سونداي-اق، كەزەكتى وتىرىسى بيىل نۇر-سۇلتان قالاسىندا ءوتۋى جوسپارلانىپ وتىرعان قازاقستان- ازەربايجان ساۋدا-ەكونوميكالىق ىنتىماقتاستىق كوميسسياسىنىڭ جۇمىسى ەكىجاقتى قاتىناستاردى دامىتۋعا ىقپال ەتەدى. مەملەكەت باسشىلارى اراداعى تاۋار اينالىمىن ەكى ەسە ارتتىرۋعا مىندەت قويدى. بۇل مىندە ەكى اراداعى بايلانىستىڭ باۋىرلاستىق رۋحىنا سايكەس كەلەدى»، - دەدى ۆيتسە- مينيستر.

بىلتىر قازاقستان مەن ازەربايجان اراسىنداعى ساۋدا اينالىمى 170 ميلليون دوللار بولعان. ساۋدا جانە ينتەگراتسيا ۆيتسە-ءمينيسترى قايرات تورەبايەۆتىڭ ايتۋىنشا، بۇل ولقىلىقتى ورنىن تولتىرۋعا كوپتەگەن مۇمكىندىك بار.

«بۇل ساۋدا ءۇيى ەكى ەل اراسىنداعى ساۋدا اينالىمىن ارتتىرۋعا ارنالعان. ازەربايجان مەن قازاقستان تەك باۋىرلاس ەلدەر عانا ەمەس، ستراتەگيالىق سەرىكتەستەر. اراداعى قارىم-قاتىناس 100 جىلدان بەرى جالعاسىپ كەلەدى. تاۋەلسىزدىك العان كۇننەن باستاپ ەكونوميكالىق بايلانىستى نىعايتىپ كەلەمىز. بىلتىر پاندەميالىق شەكتەۋلەرگە بايلانىستى اراداعى ساۋدا اينالىمىنىڭ دوللارعا شاققانداعى 30 پايىزعا ءتۇسىپ كەتتى. الايدا كولەمى سول كۇيىندە ساقتالىپ وتىر. ونىڭ الدىڭعى جىلدارى اراداعى ساۋدا اينالىمىنىڭ كولەمى 200 ميلليون دوللار بولاتىن. سول قارقىندى قالپىنا كەلتىرىپ، ءارى قاراي ءوسىرۋ ءۇشىن وسىنداي ساۋدا ءۇيى اشىلىپ وتىر. بۇعان دەيىن اراداعى ەكونوميكالىق قاتىناس ەنەرگەتيكالىق كەلىسىمدەر اياسىندا جۇرەتىن. ال بۇدان بىلاي ساۋدا مەن ينتەگراتسيالىق پروتسەستەرگە باسىمدىق بەرىلەدى. ازەربايجان مەن تۇركيانىڭ اراسى تەمىرجول ارقىلى جالعاناتىنىن ەسكەرسەك، ازەربايجانعا ۇلكەن ءۇمىت ارتۋعا بولادى»، - دەيدى قايرات تورەبايەۆ.

ەلوردادا اشىلعان ساۋدا ءۇيى ۇلكەن كولەمدە تاۋار تاسىمالدايتىن كاسىپكەرلەرگە دە، قاراپايىم تۇرعىندارعا قىزمەت كورسەتەتىن بولادى. تۇرعىندار وزىنە قاجەتتى ازەربايجاندىق ونىمدەردى ساتىپ السا، يمپورتتاۋشىلار ءار ءونىمنىڭ ساپاسىن تەكسەرىگەننەن كەيىن وسى نىسان ارقىلى ۇلكەن كولەمدە كەلىسىمدار جاساي الادى.