جالعان بانكنوتتاردى قالاي انىقتاۋعا بولادى
2021 -جىلدىڭ قاڭتار- ناۋرىز ايلارى ارالىعىندا ۇلتتىق بانك پەن ەكىنشى دەڭگەيدەگى بانكتەر 760950 تەڭگەگە قولدان جاسالعان 237 اقشا بەلگىسىن (236 بانكنوت جانە 1 مونەتا) انىقتادى. وتكەن جىلمەن سالىستىرساق، بىلتىر وسى كەزەڭدە قولدان جاسالعان 226 بانكنوت تابىلعان بولاتىن. جالپى كولەمنەن الىپ قاراعاندا، وسى جىلدىڭ ءبىرىنشى توقسانىندا قولدان كوپ جاسالعان اقشالار - نومينالى 2000 جانە 5000 تەڭگەلىك بانكنوتتار بولدى - %65 جانە %23، باسقا بانكنوتتار مەن مونەتالاردىڭ ۇلەسى - %12. جالعان بانكنوتتاردىڭ كوپ بولىگى - الماتىدا (169)، از بولىگى - قىزىلوردا (2) مەن جامبىل وبلىستارىندا (2) انىقتالدى.
بانكنوتتىڭ ءتۇپ نۇسقاسىن جالعان اقشادان اجىراتۋ ءۇشىن ونىڭ بىرنەشە بەلگىسىن ءبىلۋ جەتكىلىكتى. ەلدەگى جالعان بانكنوتتاردىڭ نەگىزگى بولىگى جەڭىل تەحنولوگيامەن جاسالادى، ولار ءتۇپنۇسقاداعى نەگىزگى بەلگىلەردى تەك يميتاتسيالاۋمەن عانا شەكتەلەدى. ياعني، ارنايى جابدىقسىز- اق جالعان بانكنوتتاردى قولمەن ۇستاپ، مۇقيات قاراپ تا انىقتاۋعا بولادى. ءتۇپنۇسقا بانكنوتتىڭ بىرنەشە ايرىقشا بەلگىسى بار. بىرىنشىدەن، ول وزىنە ءتان ەرەكشە شىتىرلايدى، ەكىنشىدەن - ارنايى رەلەفى بار.
سونىمەن قاتار بارلىق بانكنوتتا كورۋ قابىلەتى ناشار ادامدار ءۇشىن ساۋساق ۇشىمەن اجىراتۋعا بولاتىن بەلگىلەر بار. 1000، 2000، 5000، 10000 جانە 20000 تەڭگەلىك بانكنوتتاردا ءتۇس وزگەرتەتىن بوياۋمەن جاعىلعان بەينەلەر بار. كولبەۋ بۇرىشىن وزگەرتكەن كەزدە ورنەك ءتۇسى جاسىلدان التىنعا وزگەرەدى. سونىمەن بىرگە جارىققا توسىپ قاراعان كەزدە جازۋى بار تۇتاس ءجىپ رەتىندە انىق كورىنەتىن، جازۋى بار پۋنكتير تۇرىندەگى تۇتاس ماگنيتتى جانە ۇزىك- ۇزىك جىپكە نازار اۋدارعان ءجون. بانكنوتتاردىڭ وسى ءبىر ەرەكشەلىكتەرى ارنايى جابدىقتى پايدالانباي- اق ءتۇپنۇسقانى لەزدە كوزبەن قاراپ، تەكسەرىپ شىعۋعا مۇمكىندىك بەرەدى.
