اسحات ايماعانبەتوۆ: باسقارۋشى ەليتانى ۇنەمى جاڭارتىپ وتىرۋ قاجەت
بۇل تۋرالى ءبىلىم جانە عىلىم ءمينيسترى اسحات ايماعانبەتوۆ جەلىدەگى پاراقشاسىندا جازدى، دەپ حابارلايدى قازاقپارات.
«رەفورمالاردى جۇزەگە اسىراتىن - بىلىكتى كادرلار. سوندىقتان وڭتايلى وزگەرىستەر ورىن الۋى ءۇشىن تاجىريبەلى جانە وزىندىك جاڭا كوزقاراسى قالىپتاسقان جاڭا بۋىن وكىلدەرىن تارتۋ قاجەت. وزدەرىڭىز بىلەتىندەي، ەل پرەزيدەنتى جاستاردى مەملەكەتتى باسقارۋ ىسىنە تارتۋ ماسەلەسىنە كوپ كوڭىل بولەدى. ماسەلەن، جاستار كادرلىق رەزەرۆىن قالىپتاستىرۋ، مەملەكەتتىك قىزمەتتى رەفورمالاۋ جانە مەملەكەت باسشىسىنىڭ باسقا دا باستامالارى قولعا الىندى. ءبىز پرەزيدەنتتىڭ ساياساتىن، سونىڭ ىشىندە ءبىلىم بەرۋ جۇيەسىنە جاڭا كوشباسشىلاردى تارتۋ بويىنشا جۇمىستاردى جالعاستىرىپ كەلەمىز. جاڭا كوشباسشىلار - ءوز ەلىن، جەرىن سۇيەتىن پاتريوتتاردان قۇرالعان جاس ۇرپاق. كوبىنىڭ حالىقارالىق تاجىريبەسى بار، ولار - كاسىبي ورتادا كەڭىنەن تانىمال جانە مامان رەتىندە قالىپتاسقان تۇلعالار. تاعايىندالعان باسشىلاردىڭ باسىم بولىگى «بولاشاق» باعدارلاماسىنىڭ تۇلەكتەرى جانە الەمنىڭ ۇزدىك جوعارى وقۋ ورىندارىندا ءبىلىم العان بولسا، ەندى ءبىر بولىگى نازاربايەۆ ۋنيۆەرسيتەتىندە وقىعان نەمەسە جۇمىس ىستەگەن ماماندار»، - دەدى مينيستر.
ونىڭ ايتۋىنشا تەك سوڭعى ءۇش ايدىڭ ىشىندە اباي اتىنداعى قازۇپۋ، قوجا احمەت ياساۋي اتىنداعى قازاق- تۇرىك ۋنيۆەرسيتەتى، قىزدار ۇلتتىق ۋنيۆەرسيتەتى، ساتبايەۆ ۋنيۆەرسيتەتى، قوزىبايەۆ ۋنيۆەرسيتەتى سياقتى جەتەكشى جوعارى وقۋ ورىندارىنىڭ رەكتورلارى بولىپ زور الەۋەتى مەن مول تاجىريبەسى بار كوشباسشىلار تاعايىندالدى.
«بۇل رەتتە ادامي كاپيتالدى دامىتۋ جونىندەگى مەملەكەتتىك ساياساتتى ازىرلەۋ جانە ىسكە اسىرۋ كەزىندە جەرگىلىكتى جەرلەردەگى جاعدايدى نەعۇرلىم ساپالى جانە تولىق ەسكەرۋ ءۇشىن ءبىز وڭىرلەردە قىزمەت اتقارىپ جاتقان مامانداردى جۇمىسقا بەلسەندى تۇردە تارتۋعا تىرىسامىز. جاس كوشباسشىلار ءوز ءبىلىمى مەن تاجىريبەسىن ەلىمىزدىڭ گۇلدەنۋى جولىندا پايدالانىپ، ەڭبەك ۇلەستەرىن قوسقىلارى كەلەدى. ولاردىڭ ءارقايسىسىنا ۇلكەن ءۇمىت ارتىلىپ وتىر»، - دەدى مينيستر.
