سەناتورلار سايلاۋ تۋرالى كونستيتۋتسيالىق زاڭنىڭ جوباسىن قارادى

نۇر- سۇلتان. قازاقپارات - ۆلاديمير ۆولكوۆتىڭ توراعالىعىمەن كونستيتۋتسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتىنىڭ كەڭەيتىلگەن وتىرىسى ءوتتى.

وتىرىس بارىسىندا سەناتورلار «قازاقستان رەسپۋبليكاسىنداعى سايلاۋ تۋرالى» قازاقستان رەسپۋبليكاسىنىڭ كونستيتۋتسيالىق زاڭىنا وزگەرىستەر مەن تولىقتىرۋلار ەنگىزۋ تۋرالى» كونستيتۋتسيالىق زاڭنىڭ جوباسىن قارادى، دەپ حابارلايدى قازاقپارات ق ر پارلامەنتىڭ سەناتىنىڭ باسپا ءسوز قىزمەتىنە سىلتەمە جاساپ.

اتالعان زاڭ جوباسى مەملەكەت باسشىسىنىڭ تاپسىرماسىن ورىنداۋ ماقساتىمەن اۋداندىق ماڭىزى بار قالالاردىڭ، اۋىلداردىڭ، كەنتتەردىڭ جانە اۋىلدىق وكرۋگتەردىڭ اكىمدەرىن تىكەلەي سايلاۋ جۇيەسىن ەنگىزۋ ءۇشىن ازىرلەنىپ جاتىر. سونداي- اق، قۇجاتتا ساياسي پارتيالاردىڭ سايلاۋ كەزىندەگى ءوتۋ شەگىن تومەندەتۋ كوزدەلگەن. بۇل ساياسي باسەكەلەستىكتى ارتتىرۋ ءۇشىن قاجەت. سوعان سايكەس ساياسي پارتيالارعا دەپۋتاتتىق كورپۋستان ورىن الۋ ءۇشىن سايلاۋشىلاردىڭ 5 پايىز داۋسىن جيناسا جەتكىلىكتى بولماق.

ودان بولەك، بارلىق دەڭگەيدەگى سايلاۋ بيۋللەتەندەرىنە «بارىنە قارسىمىن» دەگەن جازۋ قوسىلادى. كوميتەتتىڭ كەڭەيتىلگەن وتىرىسىندا سەناتورلار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سايلاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن دا قارادى. زاڭ جوباسىنىڭ نەگىزگى مىندەتتەرى جەرگىلىكتى ءوزىن- ءوزى باسقارۋ جۇيەسىن نىعايتۋ، جەرگىلىكتى حالىقتىڭ ءوز كونستيتۋتسيالىق قۇقىقتارىن پايدالانۋ كەزىندەگى بەلسەندىلىگىن ارتتىرۋ جانە ساياسي پارتيالاردىڭ ءرولى مەن جاۋاپكەرشىلىگىن كۇشەيتۋ بولىپ تابىلادى. ودان بولەك، قۇجاتتا اۋىل اكىمىن سايلاۋ، ونىڭ قۇزىرەتىن توقتاتۋ، ساياسي پارتيالاردىڭ اۋىل اكىمدىگىنە كانديداتتاردى شىعارۋ تارتىبىنە جانە تاعى باسقا ماسەلەلەر بويىنشا وزگەرىستەر مەن تولىقتىرۋلار ەنگىزۋ قاراستىرىلعان. زاڭ جوبالارى پالاتانىڭ قاراۋىنا جولداندى.