قىرعىزستان مەن تاجىكستان اتىستى تولىقتاي توقتاتۋ تۋرالى كەلىسىمگە كەلدى

بىشكەك. قازاقپارات - قىرعىزستان مەن تاجىكستاننىڭ ۇلتتىق قاۋىپسىزدىك كوميتەتىنىڭ باسشىلارى كامچىبەك تاشيەۆ پەن سايمۋمين ياتيموۆ باسپا ءسوز كونفەرەنسياسىن وتكىزىپ، كەلىسسوزدەر جۇرگىزدى، دەپ حابارلايدى قازاقپاراتتىڭ مەنشىكتى ءتىلشىسى.

قىرعىزستان ۇلتتىق قاۋىپسىزدىك كوميتەتىنىڭ باسشىسى كامچىبەك تاشيەۆ كەلىسسوزدەر قورىتىندىسى بويىنشا 4 پۋنكتتەن تۇراتىن حاتتاما قابىلدانعانىن ايتتى.

«بۇل حاتتاما ەكى ەلدىڭ مۇددەسىنە سايكەس كەلەدى. ءبىزدىڭ حالىقتار قيىن كەزەڭدەردى باستان وتكەرۋدە. ەكى ەلدە دە تراگەديا بولدى. بىزگە جۇمىستى جۇرگىزۋ قيىنعا سوقتى، ءبىراق سوعان قاراماستان ءبىزدىڭ مەملەكەت باسشىلارىنىڭ نۇسقاۋىمەن ءبىز اتىستى تولىعىمەن توقتاتىپ، بارلىق اسكەري قۇرامداردى وزدەرىنىڭ تۇراقتى ورنالاستىرۋ ورىندارىنا الىپ كەتۋگە شەشىم قابىلدادىق. بۇدان بىلاي قۇرمەتتى كورشىلەرىمىزدىڭ كۇش-جىگەرى مەن ءبىزدىڭ كۇش-جىگەرىمىز ارقىلى ەلدەرىمىزگە، اسىرەسە شەكارا ماڭىنداعى ايماقتارعا بەيبىتشىلىك پەن تىنىشتىق كەلەدى»، - دەيدى تاشيەۆ.

تاجىكستان ۇلتتىق قاۋىپسىزدىك كوميتەتىنىڭ باسشىسى سايمۋمين ياتيموۆ كەلىسسوزدەر بارىسىندا مەملەكەت باسشىلارىنىڭ باستاماسىمەن ناتيجەلى اڭگىمە بولعانىن ايتتى.

«شەكارالاس اۋدانداردا بولعان قايعىلى جاعداي ەشقاشان قايتالانباۋى كەرەك. بۇل اۋماقتا ءبىزدىڭ حالىقتار ءومىر سۇرەتىندىكتەن، ولار دوستىق قارىم- قاتىناستا جانە ولاردىڭ اراسىندا ەشقانداي كەلىسپەۋشىلىك جوق. ءبىز، ساياساتكەرلەر، بارلىق ماسەلەلەردى شەشىپ، حالقىمىزعا ءداستۇرلى بەيبىتشىلىك پەن دوستىقتا ءومىر سۇرۋگە مۇمكىندىك بەرۋىمىز كەرەك. قىرعىز- تاجىك جەرىندە بەيبىتشىلىك پەن تۇراقتىلىققا قول جەتكىزۋ تۋرالى پرينسيپتىك كەلىسىم جاسالدى. ءبىز مۇنى ىستەي الاتىنىمىزعا جانە ونى تەزىرەك شەشەتىنىمىزگە سەنىمدىمىن جانە ءبىزدىڭ حالىقتارىمىز ءارقاشان دوستىق پەن ءوزارا تۇسىنىستىك قارىم-قاتىناستا ءومىر سۇرەدى»، - دەيدى ول.

اۆتور: زارينا قاھارمان