اباي بايگەنجين: قازاقستاندىقتارعا سالىنىپ جاتقان ۆاكسينا ەڭ تابىستى ازىرلەمەلەردىڭ ءبىرى

نۇر- سۇلتان. قازاقپارات - «ۇلتتىق عىلىمي مەديتسينالىق ورتالىق» اكسيونەرلىك قوعامىنىڭ باسقارما ءتوراعاسى، مەديتسينا عىلىمدارىنىڭ دوكتورى اباي بايگەنجين قازاقستاندىقتارعا سالىنىپ جاتقان ۆاكسينالاردىڭ قاۋىپسىز ءارى ءتيىمدى ەكەنىن ايتتى، دەپ حابارلايدى قازاقپارات ءتىلشىسى.

«ءبىز ماسكەۋگە ارنايى بارىپ، پروفەسسور گينتسبۋرگ باسقاراتىن ن. گامالەيا اتىنداعى ۇلتتىق زەرتتەۋ ورتالىعىندا بولدىق. ەكى كۇن ىشىندە بىزگە «سپۋتنيك V « ۆاكسيناسىنىڭ بۇكىل تىزبەگى مەن دامۋ مەحانيزمى كورسەتىلدى. ءبىز بۇل ۆاكسينا كەڭەس داۋىرىندە جاسالعان ەڭ ءساتتى ازىرلەمەلەردىڭ ءبىرى ەكەنىنە كوز جەتكىزدىك. ءبىز كوروناۆيرۋستىڭ قانداي قاۋىپتى اۋرۋى ەكەنىن جاقسى بىلەمىز. ونىمەن كۇرەسۋدىڭ ۆاكسينادان باسقا بالاما جولى جوق»، - دەدى مەديتسينا عىلىمدارىنىڭ دوكتورى.

عالىم ۆاكسينا اۋرۋ تۋعىزبايتىنىن، ويتكەنى ونداعى ۆيرۋس بولشەكتەرى ولتىرىلگەن كۇيدە بولاتنىن كلينيكالىق زەرتتەۋلەر ايقىن كورسەتكەنىن ايتادى.

«ەلوردادا ۆاكسينالاۋ پۋنكتەرىن قوعامدىق ورىنداردا ورنالاستىرىپ جاتقانىمىز وتە دۇرىس. مۇنداي پاندەميا جاعدايىنان ءبارىمىز ءبىر باعىتتا ويلاپ، ۆاكسينا الساق قانا امان شىعا الامىز. قۇرمەتتى قالا تۇرعىندارى، دارىگەرلەر، مەن سىزدەردىڭ ارىپتەستەرىڭىزدىڭ ءبىرى رەتىندە، ەلوردا تۇرعىنى رەتىندە ۆاكسينادان قورىقپاۋعا شاقىرامىن»، - دەدى اباي بايگەنجين.

بۇعان دەيىن حابارلاعانىمىزداي، نۇر- سۇلتان قالاسىنىڭ قوعامدىق دەنساۋلىق ساقتاۋ باسقارماسىنىڭ باسشىسى تيمۋر مۇراتوۆ كوروناۆيرۋسقا قارسى ۆاكسينا ەگۋ الدىندا انتيدەنەلەردىڭ بار- جوعىن انىقتاۋ قاجەتتىلىگىنە قاتىستى پىكىر بىلدىرگەن بولاتىن.

اۆتور: ەسىمجان ناقتىباي