قازاقستانداعى ا ق ش ەلشىسى ۆاكسينادان كەيىنگى جاي-كۇيىن ايتتى
«الدىمەن قاسيەتتى رامازان ايىندا جىلى تىلەكتەرىمدى بىلدىرگىم كەلەدى. ورازا قابىل بولسىن! بىرگە جينالىپ، كوپتەگەن ريزىقتارعا شۇكىرشىلىك ەتۋدىڭ جانە ارامىزدان كەتكەن ادامداردى ەسكە الۋدىڭ ماڭىزدىلىعى بيىل ەرەكشە سەزىلەدى. الداعى رامازان ايلارىندا الەۋمەتتىك قاشىقتى ساقتاپ، ماسكا تاعۋ قاجەتتىگى بولماسىن دەپ شىن جۇرەكتەن تىلەيمىن. بۇل تاقىرىپتا مەن وپتيميستىك كوزقاراستامىن، ءبىز پاندەميانى جەڭۋگە جاقىنداپ قالدىق. ۆاكسينالار بۇكىل الەمدە، سونىڭ ىشىندە ا ق ش ەلشىلىكتەرىندە دە سالىنىپ جاتىر. مەن ءوزىم العاشقى دوزانى وتكەن اپتادا الدىم جانە مۇمكىندىگىنشە بارلىق قازاقستاندىقتاردى ۆاكسينا الۋعا شاقىرامىن»، - دەدى ۋ. موزەر ا ق ش ەلشىلىگى ۇيىمداستىرعان ونلاين دوڭگەلەك ۇستەلدە.
ەلشى امەريكالىق Moderna ۆاكسيناسىن العان جانە ەكپەدەن كەيىنگى جاي-كۇيىن ايتىپ بەردى. «مەن Moderna ۆاكسيناسىن الدىم جانە ەكپەدەن كەيىن سول قولىمنىڭ اۋىرسىنعانىن بايقادىم. ءبىراق، مەن ەكپەنى وڭ قولىما العان ەدىم، بۇل شىندىق. كەلەسى كۇنى شانشۋ بولعانىن سەزدىم، باسقا ەشقانداي اسەرى بايقالمادى. بالالارىم دا Moderna جانە Phizer ۆاكسينالارىن الدى، ولار ەكىنشى ەكپەدەن كەيىن جاناما اسەر كوبىرەك بولاتىنىن ايتۋدا. ءبىراق، قورقاتىن جايت ەمەس، از عانا ۋاقىتقا السىزدىك سەزىلۋى مۇمكىن»، - دەپ جاۋاپ بەردى ەلشى جۋرناليستەر سۇراعىنا. سونىمەن بىرگە، ۋ. موزەر ا ق ش- تاعى ۆاكسينالاۋ جۇمىستارى جونىندە باياندادى.
«دۇيسەنبى كۇنى ا ق ش ءۇشىن وتە ماڭىزدى كۇن بولدى. ويتكەنى، ءبىزدىڭ پرەزيدەنت بايدەن مىرزا 19-ساۋىردەن باستاپ، 16 جاسقا تولعان ءاربىر ەرەسەك ازاماتتىڭ ۆاكسينا الاتىنىن مالىمدەدى. ەلدە ۆاكسينا كولەمى جەتكىلىكتى جانە شامامەن جازدىڭ سوڭىنا دەيىن ۇجىمدىق يممۋنيتەتكە قول جەتكىزەتىن شىعارمىز. قازاقستاندا دا تەزىرەك ۇجىمدىق يممۋنيتەت بولۋىن تىلەيمىز. ەگەر سىزدە ۆاكسينا الاتىن مۇمكىندىگىڭىز بولسا، وتىنەمىن، الىڭىز. ويتكەنى بۇل ەلىڭىز ءۇشىن، ءوزىڭىز ءۇشىن جانە بۇكىل الەمنىڭ ساۋلىعى ءۇشىن وتە ماڭىزدى»، - دەپ قورىتىندىلادى ا ق ش ەلشىسى.
