مەملەكەت باسشىسى ماجارستاننىڭ سىرتقى ىستەر ءمينيسترىن قابىلدادى

نۇر-سۇلتان. قازاقپارات - مەملەكەت باسشىسى ماجارستاننىڭ سىرتقى ىستەر جانە سىرتقى ساۋدا ءمينيسترى پەتەر سيارتونى قابىلدادى، دەپ حابارلايدى اقوردانىڭ رەسمي سايتى.

كەزدەسۋ بارىسىندا قاسىم-جومارت توقايەۆ قازاقستان مەن ماجارستان اراسىنداعى سەنىمدى ساياسي ديالوگقا، دايەكتى ەكونوميكالىق جانە ينۆەستيتسيالىق ىنتىماقتاستىققا، COVID-19 پاندەمياسىنىڭ سىن- قاتەرلەرى كەزىندە ءوزارا قولداۋ كورسەتۋگە نەگىزدەلگەن ستراتەگيالىق سەرىكتەستىكتىڭ جوعارى قارقىنىن اتاپ ءوتتى.

قازاقستان پرەزيدەنتى بيىلعى 31- ناۋرىزدا «تۇركىستان - تۇركى الەمىنىڭ رۋحاني استاناسى» تاقىرىبىندا ونلاين رەجيمدە وتكەن تۇركىتىلدەس مەملەكەتتەردىڭ ىنتىماقتاستىق كەڭەسىنىڭ بەيرەسمي سامميتىنە قاتىسقانى ءۇشىن ماجارستاننىڭ پرەمەر-ءمينيسترى ۆيكتور وربانعا ريزاشىلىعىن جەتكىزۋدى تاپسىردى.

- جۇرگىزىلگەن كەلىسسوزدەر قازاقستان مەن ماجارستان اراسىنداعى قاتىناستاردىڭ ودان ءارى دامۋىنا تىڭ سەرپىن بەرەدى دەپ ۇمىتتەنەمىن. قازاقستان وسىدان 30 جىل بۇرىن ەۋروپا ەلدەرىنىڭ ىشىندە ءبىرىنشى بولىپ ماجارستاندا ءوز ەلشىلىگىن اشتى. ءبىزدىڭ قارىم-قاتىناستارىمىز ەرەكشە. قازاقستاندىقتار ماجارستاندى وتە جاقسى بىلەدى. ءسىزدىڭ ەلىڭىزدى جاقىن تارتادى. وسى مۇمكىندىكتى پايدالانا وتىرىپ، تۇركىتىلدەس مەملەكەتتەردىڭ ىنتىماقتاستىق كەڭەسىنىڭ جۇمىسىنا ەلەۋلى ۇلەس قوسقانى ءۇشىن پرەمەر-مينيستر ۆيكتور وربانعا ريزاشىلىعىمدى بىلدىرەمىن، - دەدى مەملەكەت باسشىسى.

ءوز كەزەگىندە پەتەر سيارتو كەزدەسۋگە مۇمكىندىك تۋعىزعانى ءۇشىن قازاقستان پرەزيدەنتىنە العىس ءبىلدىرىپ، ءوز ەلىنىڭ باسشىلىعىنىڭ سالەمىن جەتكىزدى. وسى رەتتە بۋداپەشتتىڭ قازاقستانمەن كەشەندى ىقپالداستىعىن ودان ءارى نىعايتۋعا، سونىڭ ىشىندە، تۇركى كەڭەسىنىڭ الەۋەتىن پايدالانا وتىرىپ تەرەڭدەتۋگە دايىن ەكەنىن ايتتى.

ماجارستاننىڭ سىرتقى ىستەر جانە سىرتقى ساۋدا ءمينيسترى تۇركىستاننىڭ رۋحاني استانا رەتىندەگى ماڭىزدى رولىنە توقتالدى.

- ءسىزدىڭ، پرەزيدەنت مىرزا جانە ەلباسىنىڭ ماجارستاندا بەدەلدەرىڭىز زور. ءبىز قازاقستان مەن ونىڭ حالقىنىڭ دوستىق، باۋىرلاستىق قاتىناسىن سەزىنەمىز. تۇركىتىلدەس مەملەكەتتەردىڭ ىنتىماقتاستىق كەڭەسىنە باقىلاۋشى رەتىندە قاتىسۋىمىز ەلدەرىمىز اراسىنداعى ستراتەگيالىق سەرىكتەستىكتىڭ ناتيجەسى. قازاقستان ءبىز ءۇشىن - ماڭىزدى ستراتەگيالىق سەرىكتەس، - دەدى پەتەر سيارتو.

تاراپتار ۆيكتور ورباننىڭ 2019-جىلى ساۋىردە قازاقستانعا جاساعان رەسمي ساپارى بارىسىندا قول جەتكىزگەن ۋاعدالاستىقتاردى جۇزەگە اسىرۋ جونىندەگى ەكىجاقتى قاتىناستارعا قاتىستى ءبىرقاتار ماسەلەنى تالقىلادى.