ازيا حالقى تاعامدى نەگە اعاش تاياقشامەن جەيدى؟

نۇر-سۇلتان. قازاقپارات - بۇكىل الەم تاعامدى قاسىقپەن نە شانىشقىمەن ىشسە، ازيا ەلىنىڭ حالقى نەگە ەكەنى بەلگىسىز، ەكى قۇرالدىڭ ورنىنا ءبىر نارسەنى - اعاش تاياقشانى قولدانادى. «ەلدەن ەرەكشە» مادەنيەتتىڭ تامىرى وتە تەرەڭدە جاتىر.

كونە ارحەولوگيالىق دەرەكتەرگە سۇيەنسەك، قىتايلار مۇنداي تاياقشالاردى وسىندان 4-5 مىڭ جىل بۇرىن قولدانعان ەكەن. بىردەن ايتا كەتەيىك، ول كەزدە قىتايلار ونى تاماق جەۋ ءۇشىن ەمەس، قازاندا پىسىرىلگەن ىستىق تاماقتى الۋ مەن ارالاستىرۋ ءۇشىن پايدالانعان. ءبىراق كەيىن كەلە اقىرىڭداپ بۇل ادەتتى داستارحان ادەبىنە قاراي ويىستىرىپ، ءبىزدىڭ زامانىمىزعا دەيىنگى 500-400-جىلدارى استى جەۋگە قولدانا باستاعان.

سول جىلدارى قىتايدا دەموگرافيالىق «بۋم» بولىپ، حالىق سانى جاپپاي ءوسىپ كەتەدى. قاراقۇرىم حالىقتى اسىراۋ قيىن ەكەنى بەلگىلى. سودان ەلگە ازىق-تۇلىك جەتپەي، اس-سۋعا قولى جەتكەندەر ونى از-ازداپ جەپ، ازىق تۇتقان. ال از استى جەۋگە تاياقشا وتە ىڭعايلى. ونى ءبولۋ ءۇشىن پىشاق تا قاجەت ەمەس.

ونىڭ ۇستىنە، اعاش تاياقشانى جاساۋ قيىن ەمەس، ارزان. شىعىنى از. ونى دايىنداۋ ءۇشىن ۇلكەن ءوندىرىستىڭ دە قاجەتى جوق.

اعاش تاياقشانىڭ پايدا بولۋى مەن تاراۋىنا ىقپال ەتكەن تاعى ءبىر جايت - كونفۋتسيدىڭ ءىلىمى. ابىز عۇلاما حالقىن قان-توگىستەن، پىشاق-قىرقىستان اۋلاق بولۋعا شاقىرعان كورىنەدى. بۇل فيلوسوفيا قىتاي حالقىنىڭ قانىنا ءسىڭىپ، پىشاقتان اۋلاق بولۋى الدىمەن داستارحاننان باستاسا كەرەك. شانىشقىنى قولدانبايتىنى دا سودان. ال بامبۋك تاياقشانىڭ ۇشىن بايقاعان ادام بولسا، ونىڭ ۇشكىر ەمەس، جارتىلاي پۇشاق ەكەنىن اڭعارادى.

كەيىن بۇل مادەنيەت ازيانىڭ باسقا حالقىنا دا تارادى. جاپونيا، كورەيا مەن ۆەتنامعا تارالدى. قىتاي مەن جاپوننىڭ تاياقشاسىندا ءبىرشاما ايىرماشىلىق بار. قىتاي تاياقشالارى بامبۋكتەن جاسالادى دا، تۇتقا جاعى بىرىگىپ جاتادى. ال جاپونداردا بۇلاي ەمەس، ەكى تاياقشا بولەك- بولەك بولادى. ونىڭ ۇستىنە، جاپوندار العاشىندا تاياقشانى تەك ءدىني سالتاناتقا بولا قولدانعان. كەيىن كەلە داستارحانعا جايعاستى.

تاعى ءبىر ايتا كەتەتىن نارسە، ازيا ايماعىندا وسەتىن كۇرىش دۇنيەجۇزىنىڭ باسقا جەرلەرىندە وسەتىن كۇرىشتەن ازداعان ايىرماشىلىعى بار. ازياداعى كۇرىش تۇقىمىندا كراحمال كوبىرەك، سوندىقتان جابىسقاق كەلەدى دە تاياقشامەن الۋ وڭايىراق. تاياقشانىڭ تارالۋىنا، ءبىر جاعىنان، وسى قاسيەتى دە سەبەپ بولسا كەرەك.

massaget.kz